އެސްޓީއޯ ހޯމްއިމްޕްރޫވްމެންޓް ބަށިބޯޅަ މުބާރާތުގެ ޗެމްޕިއަންކަން ހުޅުމާލޭ ވިމެން ސްޕޯޓްސް ހޯދައިފިއެވެ.
މިއަދު ހަވީރު ކުޅުނު ފައިނަލް މެޗް މައްޗަންގޮޅި ވިދުވަރު ޓީމާ ވާދަކޮށް ހުޅުމާލޭ ވިމެން ސްޕޯޓްސް ހޯދީ ހަ ލަނޑުގެ ތަފާތުންނެނެވެ.
ވިމެން ސްޕޯޓްސް ހަދާފައިވަނީ 31 ލަނޑެވެ. ވިދުވަރު ޓީމަށް ހެދުނީ 24 ލަނޑު އެއްބޯޅައެވެ.
ހުޅުމާލޭ ވިމޭން ސްޕޯޓްސް ފައިނަލަށް ދަތުރު ކުރީ މުބާރާތުގެ މިދިޔަ ހަތަރު އަހަރުގެ ޗެމްޕިއަން ފ. ފީއަލީ އެކުވެރި ޒުވާނުންގެ ގުޅުން ބަލި ކުރުމަށްފަހުއެވެ.
މުބާރާތުގެ އެންމެ މޮޅު ކުޅުންތެރިޔާ ނުވަތަ ބަށި ރާނީ އަކީ ލ. މާބައިދޫ އިސްދަރިވަރުންގެ ގުޅުމުގެ އައިޝަތު ލުބުނާއެވެ. އެންމެ މޮޅު ޖެހުން ތެރިޔަކީ ލުބުނާއެވެ. އެންމެ މޮޅު ހިފުންތެރިޔަކީ ހުޅުމާލޭ ވިމޭން ސްޕޯޓްސްގެ އައިޝަތު ހިމްނާއެވެ. މުބާރާތުގެ އެންމެ މޮޅު ކުޅުންތެރިޔަކަށް ހޮވިފައިވަނީވެސް ރ. އިނގުރައީދޫ އުޖާލާ ޓީމުގެ މަރިޔަމް އާފިޔާއެވެ.