ރާއްޖޭގެ ކުރީގެ އެއް ވަނަ ވޮލީ ކުޅުންތެރިޔާ އިބްރާޙިމް ނިޒާރު ގައުމީ ވޮލީ ޓީމުގެ އެސިސްޓެންޓް ކޯޗަކަށް ހަމަޖައްސައިފި އެވެ.
އަންނަ މަހު ބަނގުލަދޭޝްގައި ބާއްވާ އޭޝިއާގެ ސެންޓަރްލް ޒޯން ވޮލީބޯޅަ މުބާރާތުގައި ގައުމީ ޓީމުގެ އެސިސްޓެންޓްކަން ނިޒާރުގެ އިތުރުން ދެން ހަމަޖެއްސީ ކުރީގެ ކުޅުންތެރިޔާ އިބްރާހިމް ޝިހާމް (ސަޑިއްކެ) އެވެ.
ނިޒާރު ވަނީ ރާއްޖޭގެ އެއް ވަނަ ވޮލީ ކުޅުންތެރިޔާގެ މަގާމު ތިން ފަހަރެއްގެ މަތިން ހޯދާފަ އެވެ.
ކޯޗެއްގެ ގޮތުގައި ނިޒާރު ވަނީ، މީގެކުރިން 23 އަހަރުން ދަށުގެ ޓީމުގައި މަސައްކަތްކޮށްފަ އެވެ. އަދި ޕޮލިސް ކުލަބުގެ ކޯޗެއްގެ ގޮތުގައިވެސް މަސައްކަތް ކޮށްފައިވެއެވެ.
"އަޅުގަނޑުވެސް ބޭނުން ކޯޗިންގައި އިތުރު ތަޖުރިބާ ހޯދަން ގައުމީ ޓީމަށް ހަމަޖެއްސި ކޯޗްގެ ދަށުން މަސައްކަތް ކުރުމުގެ ފުރުސަތު ލިބުމަކީ އަޅުގަނޑަށްވެސް ކަންތައްތަކެއް ދަސްވާނެ ކަމެއް."
ނިޒާރު އާއި ސަޑިއްކެ އެސިސްޓެންޓް ކޯޗަކަށް ހަމަޖެއްސިއިރު ޓީމުގެ ހެޑްކޯޗަކަށް ހަމަޖައްސާފައިވަނީ ކުރިން ޓީމުގެ ޓްރެއިނަރެއްގެ ގޮތުގައި ހަމަޖެއްސި ލަންކާގެ ގައުމީ ޓީމުގެ ކުރީގެ ކޯޗް ސިސެރަ ކްމާރަ ވެންޑަކުން އެވެ.
ވީއޭއެމުން، ވެންޑަކުން ހެޑް ކޯޗް ކަމަށް ހަމަޖައްސާފައިވަނީ، ހެޑްކޯޗް ކަމަށް ރާއްޖޭގެ އެއް ވަނަ ވޮލީ ކޯޗް ސަތޯ އަށް ހުށަހެޅުމުން ވީއޭއެމުން ހުށަހެޅި ހުށަހެޅުމާ މެދު ސަތޯ ހިތްހަމަނުޖެހުމުންނެވެ.