މާދަމާ ރޭ ކުޅެން ހަމަޖެހިފައިވާ ޕްރެޒިޑެންޓް ކަޕް ފައިނަލް މާދާމާ ހަވީރު ކުޅޭ ގޮތަށް އެފްއޭއެމުން ނިންމައިފިއެވެ.
އެފްއޭއެމްގެ ޖެނަރަލް ސެކެޓްރީ ހުސައިން ޖަވާޒު (ޖަވާ) ވިދާޅުވީ ފައިނަލް މެޗް އަވަސް ކުރީ "ދެ ޓީމުން އެކަމަށް އެދިފައި ވުމުން" ކަމަށެވެ.
ފައިނަލުގައި ކުޅެނީ ޓީސީ އާއި އީގަލްސް އެވެ.
ރައީސުލްޖުމްހޫރިއްޔާގެ ވާދައިގެ ތައްޓަށް ކުޅެމުން އަންނަ ޕްރެޒިޑެންޓް ކަޕްގެ ފައިނަލު މެޗްގެ ޝަރަފުވެރި މެހެމާނަކަށް ވަޑައިގަންނަވާނީ ރައީސް އަބްދުﷲ ޔާމީން ކަމަށް ޖަވާ ވިދާޅުވިއެވެ.
އަވަސް އަށް އެނގިފައިވާ ގޮތުގައި ފައިނަލް މެޗް އަވަސް ކުރި އެއް ސަބަބަކީ މާދަމާ ރޭ ރައީސް ބައިވެރިވެވަޑައިގަންނަވާ އެހެން އިވެންޓެއްވެސް އޮތުމުން، މާދަމާ ރޭ ބާއްވާނަމަ ފަހަރެއްގައި ފައިނަލް މެޗްގައި ރައީސްއަށް ބައިވެރި ވަޑައިނުގެނެވިދާނެ ކަމަށް ފެންނާތީއެވެ.
ނަމަވެސް ޓީސީގެ އެސިސްޓެންޓް ކޯޗް އަހްމަދު އަހްސަން (ބަރޯ) ބުނީ ހަވީރު ކުޅެފިއްޔާ އެއްގޮތަކުން އެއީ ދެ ޓީމަށްވެސް އެޑްވާންޓޭޖަކަށް ވާނެ ކަމަށެވެ.