ސިނާއީ އަވަށުގައި ކުނި މެނޭޖު ކުރަން ފަހުގެ ތައްޔާރީތައް ފަށައިފި

ސިނާއީ އަވަށުގައި ކުނި މެނޭޖު ކުރަން ފަށަން ފަހުގެ ތައްޔާރީތައް ފަށައި، ވޭސްޓް ޔާޑު ހަދާ ބިން އެންވަޔަރުމެންޓް މިނިސްޓްރީއާ މިއަދު ހަވާލުކޮށްފި އެވެ.

ބޮޑު ސަރަހައްދެއް ހިއްކައިގެން މާލޭގެ ދެކުނު ފަރާތުގައި ސަރުކާރުން ތަަރައްގީކޮށްފައިވާ ސިނާއީ އަވަށުގައި މިއަދު ބޭއްވި ރަސްމިއްޔާތުގައި މި ސަރަހައްދު އެންވަޔަރަންމެންޓް މިނިސްޓްރީއާ ހަވާލުކޮށްދެއްވީ ހައުސިން މިނިސްޓަރު ޑރ. މުހައްމަދު މުއިއްޒު އެވެ. އަދި އެންވަޔަމެންޓް މިނިސްޓްރީގެ ފަރާތުން ހަވާލުވެވަޑައިގަތީ މިނިސްޓަރު ތޯރިގު އިބްރާހިމް އެވެ.

މި ރަސްމިއްޔާތުގައި ހައުސިން މިނިސްޓަރު މުއިއްޒު ވިދާޅުވީ ސިނާއީ އަވަށުގެ އެންމެ މުހިންމު އެއް ބޭނުމަކީ މާލޭގައި ކުނީގެ މައްސަލަ ހައްލު ކުރުން ކަމަށާއި، މި ސަރަހައްދުގައި މަސައްކަތް ފެށުމުން ކުނީގެ މައްސަލަ ހައްލު ލިބިގެންދާނެ ކަމަށެވެ.

"އިންޑަސްޓްރިއަލް ވިލެޖަކީ ރައީސް ޔާމީންގެ އިސް ނެންގުވުމުގެ މަތިން ކުރިއަށް ގެންދެވޭ އެންމެ މުހިންމު މަޝްރޫއު. މިއަދާ ހަމައަށް ވަަރަށް ގިނަ ދަތިތައް މާލޭގެ ރައްޔިތުން ދިޔައީ ތަހައްމަލް ކުރަމުން. އެގޮތުން އިންޑަސްޓްރިއަލް ވިލެޖުގެ ސަބަބުން އެކަމަށް ހައްލު ލިބިގެން މިދަނީ،" މުއިއްޒު ވިދާޅުވި އެވެ.

ވޭސްޓް ކަލެކްޝަން ސެންޓަރަށް އުޅަނދު ފަހަރު ކައިރި ކުރާ ސަރަހައްދު -- އަފްޝީން ނަސީރު | އަވަސް

މާލޭގެ ކުނީގެ މައްސަލަ ހައްލު ކުރުމުގެ ގޮތުން ސަރުކާރުން ވަނީ ވޭސްޓް މެނޭޖުމަންޓް ކޯޕަރޭޝަން (ވެމްކޯ) އާ ހަވާލުކޮށްގެން ބޮޑު މަޝްރޫއެއް ވެސް ކުރިއަށް ގެންދަމުންނެވެ. މިގޮތުން ކުނި އުފުލާނެ 20 ޓްރައިސައިކަލް ހޯދުމަށް އެ ކުންފުނިން ވަނީ ބަޔަކާ ހަވާލުކޮށްފަ އެވެ. އަދި ތިލަފުށީ ކުނީގެ މައްސަލަ ހައްލު ކުރުމަށް 100 މިލިއަން ޑޮލަރުގެ ފެށުމަށްވެސް ސަރުކާރުން ދަނީ ތައްޔާރުވަމުންނެވެ.

"ކުނި އުކާލުމަށް މިހާރު އެތައް މިލިއަން ރުފިޔާއެއް ދޭ. އަދި ކުނީގެ ސަބަބުން ސްކޫލް ކުދިންނާއި މާލޭގެ ރައްޔިތުންނަށް ބޮޑެތި ދަތިތަކެއް ކުރިމަތިވޭ. އެހެން ކަމުން ރައީސް ޔާމީން ނިންމެވީ ދާއިމީ ހައްލެއް ގެނެސް ދިނުމަށް މަޝްރޫއެއް ކުރިއަށް ގެންދިއުމަށް،" މުއިއްޒު ވިދާޅުވި އެވެ.

މާލެ ސިނާއީ އަވަށަކީ 4.5 ހެކްޓަރުގެ ބިން ހިއްކަންއިގެން ހަދާފައިވާ ބޮޑު ސަރަހައްދެކެވެ. މި މަޝްރޫއަށް ސަރުކާރުން 170 މިލިއަނަށް ވުރެ ގިނަ ރުފިޔާ ހަރަދުކޮށްފައިވެ އެވެ. މި ބިމުގައި މާލޭގައި ހިނގާ ބޮޑެތި އިންޑަސްޑަސްްޓްރިއަލް ގުދަންތަކާއި ހެވީ ވެހިކަލްތައް ބަދަލު ކުރާއިރު، މި ބިމުގެ ބޮޑު ބައެއް ވަނީ ކުނީގެ މައްސަލަ ހައްލު ކުރުމަށް ހާއްސަ ކޮށްފަ އެވެ. އެގޮތުން މި ސަރަހައްދު ފައްކާކޮށްފައިވަނީ ކުނި އުފުލާ އެންމެ ބޮޑެތި އުޅަނދު ފަހަރު ވެސް ކައިރިކޮށްލެވޭ ގޮތަށެވެ.

މި ރަސްމިއްޔާތުގައި އެންވަޔަރަންމެންޓް މިނިސްޓަރު ތޯރިގު އިބްރާހިމް ވިދާޅުވީ އެންމެ ޒަމާނީ ފެންވަރަކަށް ކުނި މެނޭޖުކުރުމުގެ މަސައްކަތް ފެށުމުން ކުނީގެ މައްސަލައަށް ވެސް ބޮޑު ހައްލެއް ލިބިގެންދާނެ ކަމަށެވެ.

"ވޭސްޓް މެނޭޖުމަންޓް ޔާޑު ހެދިގެންދާނީ ކުނި މެޝާ ވެސް ކުރެވޭ ގޮތަށް. އެކަން ކުރުމަށް ކޮންސަލްޓެންސީ މަސައްކަތް ބަޔަކާ ހަވާލު ކުރެވިގެން ކުރި އަށް މި ދަނީ. ސަރުކާރުން ވަރަށް ބުރަ މަސައްކަތުން މި ތަން ހިއްކާފައި މި ވަނީ. ކުނީގެ މަސައްކަތް ކުރުން މާލެއާ ވަކި ކުރުމަކީ ސިއްހީ ގޮތުން ވެސް ރައްކާތެރި ކަމެއްގެ ގޮތުުގައި ސަރުކާރުން ދެކޭ،" ތޯރިގު ވިދާޅުވި އެވެ.