ހުސްވެފައިވާ ރާއްޖޭގެ ބާސްކެޓްބޯޅަ އެސޯސިއޭޝަން (އެމްބީއޭ) ގެ ރައީސް ކަމުގެ މަގާމަށް އަލުން ރައީސަކު ހޮވަން މިމަހު 15 ދުވަހު އިންތިހާބު ބާއްވަން އެމްބީއޭ އިން ނިންމައިފި އެވެ.
އެމްބީއޭގެ ރައީސް ކަމުގެ މަގާމު ހުސްވީ އޮކްޓޫބަރު މަހު 20 ވަނަ ދުވަހުގެ ރޭ ބޭއްވި އިންތިހާބުގައި ރައީސް ކަމަށް އިންތިހާބު ވެވަޑައިގެންނެވި ރައްޔިތުންގެ މަޖިލީހުގެ މައްޗަށްގޮޅި ދެކުނު ދާއިރާގެ މެންބަރު އަބްދުﷲ ސިނާން އިސްތިއުފާ ދެއްވުމުންނެވެ.
ސިނާން ވަނީ އެ ރޭ ބޭއްވި އިންތިހާބު ކާމިޔާބު ކުރުމަށްފަހު އިސްތިއުފާ ދެއްވިކަން އިއުލާން ކުރައްވާފައެވެ. ނަމަވެސް މިދިޔަ މަހު އެމްބީއޭގެ އެގްޒެކެޓިވް ކޮމިޓީ ހޯމް މިނިސްޓްރީގައި ރަޖިސްޓްރީ ކުރީ ރައީސްގެ ގޮތުގައި ސިނާންގެ ނަން ހިމަނައިގެންނެވެ.
ހޯމް މިނިސްޓްރީގެ ޑެޕިއުޓީ މިނިސްޓަރު އަދި ޖަމްއިއްޔާތަކާބެހޭ ރަޖިސްޓާ ޔޫސުފް އަބްދުލް ގަފޫރު (ޔޫސޭ) އޭރު ވިދާޅުވީ ސިނާން އިސްތިއުފާ ގަބޫލު ކުރެވޭނެ ގާނޫނީ އެއްވެސް ހަމައެއް އޭރު ނެތް ކަމަށެވެ.
"މިނިސްޓްރީގެ ލީގަލް ޑިޕާޓްމެންޓުގެ ލަފާގައި ވަނީ އެގްޒެކެޓިވް ކޮމިޓީއަށް ސައްހަ ހައިސިއްޔަތު ލިބޭނީ ހޯމް މިނިސްޓްރީގައި ރަޖިސްޓްރީ ކުރުމުން ކަމަށް. އެހެންވީމަ އޭރު އެ ހައިސްޔަތެއް ނެތް އިސްތިއުފާ ދެއްވަންޏާ އިސްތިއުފާ ދެއްވަން ޖެހޭނީ ހިންގާ ކޮމިޓީ މިނިސްޓްރީގައި ރަސްޖިސްޓްރީ ކުރުމަށްފަހު،" ޔޫސޭ އޭރު ވިދާޅުވި އެވެ.
ރައީސް ކަމުގެ މަގާމު ސިނާން ކާމިޔާބު ކުރެއްވީ އެމްއާރްޑީސީގެ ޑެޕިއުޓީ މެނޭޖިން ޑިރެކްޓާ އަހްމަދު މަމްދޫހް (މަންޑޭ) އާ ވާދަކޮށެވެ.
ކުރިމަތިލުން މިއަދުން ފެށިގެން އަށަކަށް
މިމަހު 15 ވަނަ ދުވަހު ބޭއްވުމަށް ހަމަޖެހިފައިވާ އިންތިހާބަށް ކުރިމަތި ލުމުގެ މުއްދަތު މިއަދު ވަނީ ހުޅުވާލާފައެވެ. އިންތިހާބަށް ކުރިމަތި ލުމުގެ އެންމެ ފަހު ވަގުތަކީ މިމަހު އަށް ވަނަ ދުވަހުގެ ނިޔަލަށެވެ.
އެމްބީއޭގެ މިހާރުގެ ޖެނަރަލް ސެކެޓްރީ ވިޝާމް ރަޝީދު ވިދާޅުވީ އިންތިހާބު ބާއްވާ ޖަލްސާ 17 ވަނަ ދުވަހަށް ބަދަލު ކުރުމަށް އެމްބީއޭއިން ވިސްނަމުންދާ ކަމަށެވެ. ނަމަވެސް މިހާރު އިއުލާންކޮށްފައިވާ ގޮތުން އިންތިހާބު އޮންނާނީ 15 ވަނަ ދުވަހުއެވެ.