މި ޒުވާން ހުނަރުވެރިޔާގެ ފާހަގަ ކުރެވެނީ ބަދަލު ކުޅުންތެރިޔެއްގެ ގޮތުގައި ނުކުމެ މޮޅު ކުޅުމެއް ދައްކާ ކުޅުންތެރިޔެއްގެ ގޮތުގައެވެ. އުމުރުން އެންމެ 18 އަހަރުގެ ހަސަން ރާއިފް (ހަންނަ) އެވެ. ކުލަބު އީގަލްސްގެ ސީނިއާ ޓީމާއެކު ބައެއް މެޗްތަކުގައި ފުރަތަމަ 11 އިން ޖާގަ ލިބުނަސް އުމުރުން ހަގު ކަމާއެކު އޭނާ ބޭނުން ކުރަމުންދަނީ ބަދަލު ކުޅުންތެރިޔެއްގެ ގޮތުގައެވެ. އެންމެ ވާދަވެރި މެޗްތަކުގައި އީގަލްސްގެ ކޯޗް އިހްސާން އަބްދުލް ގަނީ (ސާންތީ)، ހަންނަ އަށް ފުރުސަތު ދެނީ ފުރިހަމަ ވަމުން އަންނަ އޭނާގެ ހުނަރާއި އިތުރުވަމުން އަންނަ ފެންވަރަށް އިތުބާރު އޮންނާތީކަން ޔަގީނެވެ. ޕްރެޒިޑެންޓް ކަޕް ފައިނަލުގައި ވެސް ގިނަ މެޗްތަކެއް ޓީމާއެކު ކުޅެފައިވާ ކުޅުންތެރިން ބެންޗުގައި ތިބިއިރުވެސް އެ މެޗުން ރާއިފް އަށް ފުރުސަތު ދިނީ އެހެންވެ އެވެ.
މި ސީޒަންގައި އީގަލްސްއިން އާންމުންގެ ލޮލުގައި އަޅައިގަތުމުގެ ކުރިން ހަންނަ ފާހަގަ ވެފައިވަނީ މިދިޔަ އަހަރު މިނިވަން ޗެމްޕިއަންޝިޕް ފުޓްބޯޅަ މުބާރާތުގައި އުފަން ރަށް ސ. ހިތަދޫ ޓީމުންނެވެ.
އީގަލްސްގައި ތިބި އުމުރުން ހަގު ކުޅުންތެރިނަކީ ކުރިއަށް އޮތްތަނުގައި ރާއްޖޭގެ ފުޓްބޯޅައިގައި ޑޮމިނޭޓް ކުރާނެ ކުޅުންތެރިން، ކަމަށް ސާންތީ ބުނާއިރު އެ ލިސްޓްގެ އެންމެ ފުރަތަމަ ނަމަކަށް ހަންނަގެ ނަން ހިމެނޭނެ ކަމާމެދު އެއްވެސް މީހަކު ސުވަލެއް ނުއުފައްދާނެ އެވެ. އެއީ އުމުރުން 18 އަހަރުގައި ވެސް އޭނާގެ ފެންވަރު ދައްކަމުން ދާތީ އެވެ. ކޯޗުންގެ އިތުބާރާއި ޓީމުގެ ސީނިއާ ކުޅުންތެރިންގެ ހިތްވަރު އޭނާގެ މައްޗަށް އެބައޮތެވެ.
"ޑިވެލޮޕިން އަށް ބަލާއިރު އީގަލްސް އަކީ ވަރަށް ރަނގަޅު ޓީމެއް ޓްރެއިނިންއަށް ރަނގަޅު އެންވާރުމެންޓެއް ޓީމުގައި އެބައޮތް ތަފާތަކަށް ވެދާނެ އީގަލްސްގެ ޓްރެއިންތަކަށް ދެވޭ ޑެޑިކޭޝަން،" ހަންނަ ބުންޏެވެ.
ކުޅުމުގެ ސްޓައިލަށް ބަލައިފިނަ އޭނާގެ ކުޅުމުގެ ސްޓައިލް ގައުމީ ޓީމުގެ ކުރީގެ އެޓޭކިން މިޑްފީލްޑާ އިބްރާހިމް ފަޒީލު (އޮއްޕޮ) އާ ވައްތަރު ގޮތެއް ހުރެއެވެ. ނަމަވެސް ރާއިފް ވަކި ސްޓައިލެއް ކޮޕީއެއް ނުކުރެ އެވެ. އޭނާ ގަބޫލު ކުރާ ގޮތުގައި އޭނާގެ ކިބައިގައި ހުރީ އޭނާގެ ސްޓައިލްއެވެ.
"އޮއްޕޮ ގައުމީ ޓީމުގައި ކުޅުނު މެޗްތައް އަޅުގަނޑަށް ކޮންމެވެސް ވަރަކަށް ޓީވީން ފެނިފަ ހުރީ، ސީދާ ވަކި މީހަކު ކުޅޭ ގޮތަށް ކުޅޭކަށް ނޫޅެން ބަލަނީ ޓީމަށް ކަމެއް ކޮށްދެވޭތޯ،" ކުޅުމުގެ ސްޓައިލްއާ ބެހޭގޮތުން ސުވާލު ކުރުމުން ހަންނަ ބުންޏެވެ.
އެކަމަކު އޭނާވެސް ނަމޫނާ އަކަށް ބަލާ ކުޅުންތެރިން އެބަތިއްބެވެ. އީގަލްސްގެ އަހްމަދު ރިޒުވާން (ރިޒޭ) އާއި ޓީސީގެ ދާދު އަދި ޝަމްވީލް ގާސިމް (ބޮންޑާ) އަކީ ހަންނައަށް ކަމުދާ ކުޅުންތެރިންނެވެ.
ހާއްސަކޮށް ބޮންޑާއަށް އޭނާގެ ހިތުގައި އިހްތިރާމެއް އޮވެއެވެ. ޓީސީގެ ވެސް އެންމެ ސީނިއާ ކުޅުންތެރިޔެއްގެ ގޮތުގައި ހުރި ބޮންޑާއަކީ ގަލޮޅު ދަނޑުން ފެންނަ އެންމެ ސީނިއާ އެއް ނަމެވެ. މިދިޔަ އަހަރު މިނިވަން 50 ޗެމްޕިއަންޝިޕްގައި ބޮންޑާ ސ. ހިތަދޫ ޓީމަށް ކުޅުނު އިރު ހަންނަ އަކީވެސް ޓީމުގެ މުހިންމު ކުޅުންތެރިޔެކެވެ.
"މިދިޔަ އަހަރު މިނިވަން ޗެމްޕިއަންޝިޕްގައި ބޮންޑާއާ އެކު އެއް ޓީމެއްގައިގައި ކުޅުމުގެ ފުރުސަތު ލިބުމަކީ އޭނާގެ ފަރާތުން ގިނަ ކަންކަމެއް ދަސްވި ކަމެއް އަޅުގަނޑުގެ ފުޓްބޯޅަ ކެރިއަރުގައި ބޮންޑާއަކީ ވަރަށް މުހިންމު ނަމެއް،" ހަންނަ ބުންޏެވެ.
ގައުމީ ކެޕްޓަން އަލީ އަޝްފާގަށް ފުޓްބޯޅައިގައި ދަގަނޑޭގެ ނަން ދެވި ރާއްޖޭގެ ފުޓްބޯޅަ ދަނޑުގައި ދަނގަޑޭ ނަމަކީ ބްރޭންޑަކަށްވީ ފަދައިން ރާއިފްގެ އަމާޒަކީ ހަންނަ އަށްވެސް ރާއްޖޭގެ ފުޓްބޯޅައިގެ ދަނޑުގައި މަގާމެއް ހޯދައިދިނުމެވެ. އުމުރުން 18 އަހަރުގައިވެސް އޭނާގެ ކިބައިގައި އެ އަޒުމު އެބައޮތެވެ. މަސައްކަތް ކޮށްފިއްޔާ ހާސިލު ނުވާންވީ ސަބަބެއް ވެސް ނެތެވެ.
ދިވެހި ފުޓްބޯޅައިގައި ޓެކްނިކަލް އެކްސްޕާޓުން ގަބޫލު ކުރާ ގޮތުގައި ދަގަނޑޭ މަޑުމަޑުން ރިޓަޔާ ކުރުމަށް ތައްޔާރުވައިރު ދަގަނޑޭ ރިޕްލޭސްމެންޓެއް އުފެއްދޭނެ ވަގުތު ދިވެހި ފުޓްބޯޅަ އަށް ލިބިނުވެ. ބައެއް ކޯޗުން ގަބޫލު ކުރާ ގޮތުގައި ދަގަނޑޭގެ ޖާގަ ފިލް ކުރެވޭނެ ބައެއް ކުޅުންތެރިން ގަލޮޅު ދަނޑުން ފެނިފައި ގެއްލިއްޖެ އެވެ.
ބައެއް ކުޅުންތެރިންނަށް ކުޅުމުގެ ތެރެއިން ކުރިމަތިވި އިންޖަރީއާއެކު ގެއްލުނީ އެވެ. އަނެއް ބައި ކުޅުންތެރިން ދިރިއުޅުމުގެ ހާލަތު ހުރިގޮތުން ދާއިރާ ބަދަލު ކޮށްލަން ޖެހި ފުޓްބޯޅަ ކެރިއާއާ އެއްކޮށް ދުރައް ޖެހެން މަޖުބޫރުވީ އެވެ. އަނެއްބައި ކުޅުންތެރިން އަހްލާގީ މަައްސަލަތަކާ ހުރެ ގެއްލިގެން ދިޔައީ އެވެ.
ނަމަވެސް ހަންނަގެ އަޒުމެއް އެބައޮތެވެ. އޭނާ ބުންޏެވެ:
"އިންޖަރީ ވިޔަސް އަޅުގަނޑެއް ނުގެއްލޭނަން ރިކާވަ ވެގެން އިރާދަ ކުރެއްވިއްޔާ އެނބުރި އަންނާނަން ފުޓްބޯޅަ ކެރިއާއަށް ހުރަހެއް އަންނާނެ އެއްވެސް ކަމެއް އަޅުގަނޑުގެ ފަރާތަކުން ނުފެންނާނެ މުޅި ފުޓްބޯޅަ ހުސްވެގެން ހުންނަން އެއީ އަޒުމަކީ."