އަންނަ އަހަރު އޭއެފްސީ ކަޕްގައި ދިވެހި ޕްރިމިއާ ލީގް ޗެމްޕިއަން މާޒިޔާއަށް ގުރޫޕް ސްޓޭޖުން ފުރުސަތު ލިބުނު އިރު، ގުރޫޕް ސްޓޭޖުން ޖާގަ ހޯދުމަށް އެފްއޭ ކަޕްގެ ޗެމްޕިއަން ކުލަބު ވެލެންސިއާ ޕްލޭއޮފްގައި ދެބުރުގައި ވާދަ ކުރަން ޖެހިއްޖެ އެވެ.
ޕްލޭއޮފް ކުޅޭނީ ދެ ބުރަކަށް ބަހާލައިގެންނެވެ. ފުރަތަމަ ބުރުގައި ވެލެންސިއާ ވާދަ ކުރާނީ ބޫޓާންގެ ލީގް ޗެމްޕިއަން ތިމްޕޫ ސިޓީއާ ދެކޮޅަށެވެ. ފުރަތަމަ ބުރުގެ ޕްލޭއޮފް މެޗުން މޮޅުވެއްޖެ ނަމަ، ދެ ވަނަ ޕްލޭއޮފްގައި ވާދަ ކުރަން ޖެހޭނީ، ފުރަތަމަ ޕްލޭއޮފުން މޮޅުވާ ދެ ޓީމެވެ.
ފުރަތަމަ ބުރުގެ ޕްލޭއޮފްގައި ދެން ހިމެނެނީ އިންޑިއާގެ މޯހަން ބަގާން އާއި ލަންކާގެ ކޮލަމްބޯ އެވެ.
ވެލެންސިއާ ކުޅޭ ޕްލޭއޮފް ފުރަތަމަ ބުރުގެ ފުރަތަމަ ލެގް މެޗް އޮންނަނީ އަންނަ މަހު 31 ވަނަ ދުވަހު ބޫޓާންގަ އެވެ. މާލޭގައި ކުޅޭ ލެގްގެ މެޗު އޮންނާނީ ފެބްރުއަރީ މަހު ހަތް ވަނަ ދުވަހު އެވެ.
ދެ ވަނަ ބުރުގެ ޕްލޭއޮފްގެ ފުރަތަމަ ލެގް މެޗް އޮންނާނީ ފެބްރުއަރީ، 21 ގައެވެ. ދެ ވަނަ ލެގް އޮންނާނީ 28 ފެބްރުއަރީ ގަ އެވެ.
އޭއެފްސީއިން އޭއެފްސީ ކަޕުގެ އޮނިގަނޑަށް ގެނައި ބަދަލާ ގުޅިގެން ގުރޫޕް ސްޓޭޖްގައި ކުޅޭނީ އިންޓަ ޒޯން ނުވަތަ އެ ޒޯނެއްގެ ޓީމުތައް އެޒޯނެއްގެ ޓީމުތަކާ ދެކޮޅަށެވެ.
ފަސް ޒޯން ހިމެނޭ ގުރޫޕް ސްޓޭޖްގެ އޮނިގަނޑުގައި ރާއްޖެ ހިމެނޭނީ ސައުތު އޭޝިއާގެ ޒޯންގަ އެވެ. އެ ޒޯންގައި މާޒިޔާގެ އިތުރުން މިހާރު ޖާގަ ކަށަވަރުވެފައިވަނީ ބަނގުލަދޭޝްގެ އަލްބާނީ ޑާކާ ލިމިޓެޑަށާއި އެންމެ ފަހުގެ ރަނަރަފް އިންޑީއާގެ ބެންގަލޫރު އެފްސީ އަށެވެ. ހަތަރު ވަނަ ޖާގަ ލިބޭނީ ޕްލޭއޮފްގެ ފައިނަލު ބުރުން މޮޅުވާ ޓީމަކަށެވެ.