ދިވެހި އަންހެންވެރިންނަކީ ހަމަ ގައިމު ވެސް ޑްރާމާތަކަށް އަދާޔާ ހިލާފަށް ލޯބި ޖެހިފައިވާ ބައެކެވެ. ހިންދީ ޑްރާމާތައް ބެލުމުގައި ހޭދަކުރާ ވަގުތުން ވެސް އެކަން އެނގެ އެވެ. ހިންދީ ޑްރާމާތަށް ބެލުމަށް ކިތަންމެ ވަގުތެއް ދިވެހިން ހޭދަކުރި ނަމަވެސް ޓީވީތަކުން ދައްކާ ދިވެހި ޑްރާމާ ސީރީޒްތަކަށް ވެސް ހާއްސަ ސަމާލު ކަމެއް ގޭގައި ތިބޭ އަންހެންވެރިންދެ އެވެ. ވަގުތު ހޯދައިގެން ވެސް އެ ޑްރާމާއެއް އަންނަ ގަޑީގައި ޓީވީ ދޮށަށް ޖަމާވެ އެވެ.
ދިވެހި ޑްރާމާތަކުގެ ތެރެއިން ވެސް އެންމެ މަގުބޫލީ އަސަރުގަދަ، ޑްރާމާ ބޮޑު ހިތްދަތި ކަންކަން ދިމާވާ ޑްރާމާތަކެވެ. މީގެކުރިން ވެސް ދިވެހިންގެ މެދުގައި އެންމެ ގަދަޔަށް މަޝްހޫރުވެފައިވަނީ އެފަދަ ޑްރާމާތެވެ. ދިވެހި ޑްރާމާއެއް ޓީވީއަކުން ނުފެންނަތާ ވެސް އެތައް ދުވަހެއްވެފައިވާއިރު ދިވެހިން ހިތްކިޔާ މިފަދަ ޑްރާމާއެއް ވެސް ލޮލަށް ނުފެންނަތާ އެތައް ދުވަހެކެވެ.
އެހެނަސް ފިލްމީ ދެމަފިރިން ކަމަށްވާ އަހުމަދު އަމަން އަލީ އާއި މަރިޔަމް ޝަހުޒާ (ޝަހޫ) މިވަނީ އެ އިންތިޒާރަށް ނިމުން ގެނައުމަށް މަސައްކަތް ފަށާފަ އެވެ. އާ ޑްރާމާއެއްގެ ޝޫޓިން ފުވައްމުލައް ސިޓީގައި ވަނީ ފަށާފަ އެވެ. ފަނަރަ އެޕިސޯޑްގެ މި ޑްރާމާގެ 50 ޕަސެންޓްގެ ޝޫޓިން ހަތް ދުވަސް ތެރޭގައި ނިންމާފައިވާއިރު، ކުރިއަށް އޮތް 15 ވަރަކަށް ދުވަހުގެ ތެރޭގައި ޝޫޓިން އެއްކޮށް ނިންމާނެ އެވެ. ޑްރާމާއަށް ދީފައިވާ ނަމަކީ "ޝަކުވާއަކާ ނުލާ" އެވެ.
ޑްރާމާގެ އެއް މަންޒަރު އަވަށްޓެރި ލަންކާގައި ވެސް ޝޫޓުކުރުމަށް ހަމަޖެހިފައިވެ އެވެ. އެއީ ކައިވެނިކުރާ މަންޒަރެކެވެ.
ފުވައްމުލަކަށް އުފަން އަމަން ބުނީ، މި ޑްރާމާއަކީ ފިރިހެނެއްގެ ހަޔާތުގައި ދިމާވާ އެކިއެކި ކަންކަމުގެ މައްޗަށް ބިނާކޮށް ހަދާ ޑްރާމާއެއް ކަމަށެވެ. ކައިވެނީގެ ބޭރުން ގުޅުން ހިންގާ ފިރިހެނަކަށް ހަޔާތުގައި ދިމާވާ އެކިއެކި ކަންކަން މި ޑްރާމާއިން ފެންނާނެ ކަމަށް އަމަން ބުންޏެވެ. އެ ރޯލުން ފެންނާނީ އަމަން އެވެ. އިޖުތިމާއީ ގިނަ މައްސަލަތަކަކަށް ވެސް މި ޑްރާމާގައި އަލިއަޅުވާނެ އެވެ.
މި ޑްރާމާގެ ވާހަކަ ލިޔެފައިވަނީ މީގެކުރިން ވެސް ބައެއް ޑްރާމާތަކާއި ފިލްމްތަކުގެ ވާހަކަ ލިޔެފައިވާ މަރިޔަމް މޫސާ އެވެ. ޑްރާމާ ޑައިރެކްޓްކޮށް ކެމެރާ ކުރަނީ އަލީ ރަޝީދު (ގޮޅާ އައްޔަ) އެވެ.
އަމަން ބުނާ ގޮތުގައި އާންމުން ދަންނަ މޫނަކަށް މި ޑްރާމާގައި ފެންނާނީ އޭނާ އާއި އަންހެނުން ޝަހޫ އެކަންޏެވެ. ދެން މުޅިން ވެސް ފެނިގެންދާނީ ފުވައްމުލަކު މީހުންނެވެ.
"ވަރަށް ހުނަރުވެރި ކުޅަދާނަ އެކްޓަރުން ފުވައްމުލަކުން ލިބިފައި މިހުރީ، ގާތްގަނޑަކަށް ފުވައްމުލަކު 50 އެއްހާ އެކްޓަރުން ފެންނާނެ، ޑްރާމާގައި ޝަހޫ ނޫނީ ދެން ހުސްވެސް ފެންނާނީ ފުވައްމުލަކު މީހުން،" އަމަން ބުންޏެވެ.
އަމަން ބުނީ، މި ޑްރާމާ ޝޫޓްކުރުމަށް ފުވައްމުލައް އިހުތިޔާރުކުރީ ތަފާތު ކޮށްލުމުގެ ގޮތުން ކަމަށެވެ. އަދި ފުވައްމުލަކީ އެންމެ ރީތި އަދި އެންމެ ތަފާތު ލޮކޭޝަންތައް ލިބެން ހުރި ރަށް ކަމަށެވެ.
މީގެ ކުރިން ވެސް "އުމުރަށް ސަލާން" އާއި "ވަކިވުމުގެ ކުރިން" ފަދަ ބެލުންތެރިންގެ ބޮޑު މަގުބޫލު ކަމެއް ލިބުނު ޑްރާމާތަކުން ފެނުނު އަމަން ލީޑް ރޯލު ފެނިގެންދާނެ ފުރަތަމަ ޑްރާމާއަކަށް "ޝަކުވާއަކާ ނުލާ" ވާނެ އެވެ.
އަންނަ ޖެނުއަރީ މަހުގެ މެދު ތެރޭގައި މި ޑްރާމާ ދައްކަން ފަށާނީ މުޅި އަލަށް ލޯންޗުކުރާ ޗެނަލަކުންނެވެ. އެ ޗެނަލަކީ މުނިފޫހިފިލުވުމަށް ހާއްސަ ޗެނަލެކެވެ. އެގޮތުން ޑްރާމާތަކާއި ލަވަތައް އެ ޗެނަލުން ދެއްކުމަށް ނިންމާފައިވާ ކަމަށް އަމަން ބުންޏެވެ.
މި ޑްރާމާގެ ތީމް ލަވައަކީ ވަރަށް ހާއްސަ ލަވަ އެކެވެ. އެ ލަވައަކީ މިހާރު ލަވަ ކިޔުމާ ދުރުގައި ތިބި، ކުރީގެ ވަރަށް މަޝްހޫރު ދެ ލަވަކިޔުންތެރިންގެ ލަވަ އެކެވެ. އެއީ އަލީ ރަމީޒާއި ފަޒީލާ އާމިރު (ފަޒީ) ކުރިން ކިޔައި އަދި ރިލީޒް ނުވެ އޮތް ލަވައެކެވެ.
ކޮންމެއަކަަސް ދިވެހި ޑްރާމާއެއްގެ އިންތިޒާރުގައި ތިބި މީހުންނަށް މި ޑްރާމާ ވެގެން ދާނީ ރަނގަޅު ހަދިޔާއަކަށެވެ. ކުރަމުންދާ އިންތިޒާރުގެ ނިމުމަކަށެވެ.