ރާއްޖެ ޓީވީގެ ނޫސްވެރިޔާ މުހައްމަދު ވިސާމްގެ ފުލުހުންގެ ދައުރަށް ހުރަސް އެޅި ކަމަށް ބުނާ މައްސަލާގައި ހެކި ބަސް ނަގަން މިއަދު ތާވަލުކުރި އަޑުއެހުން ކެންސަލްކޮށްފި އެވެ. އޭނާގެ މައްޗަށް އުފުލާފައިވަނީ ފުލުހުންގެ ދައުރު އަދާކުރަން ހުރަސް އެޅިކަމުގެ ދައުވާ އެވެ.
މިއަދު 11:00 އަށް ތާވަލުކުރި ޝަރީއަތުގެ އަޑުއެހުން ކެންސަލް ކޮށްފައިވަނީ ވިސާމްގެ ދިފާއީ ވަކީލް ގަޑިއަށް ހާޒިރު ނުވެގެނެވެ. އޭނާގެ ވަކީލަކީ އަބްދުﷲ ހަސީނެވެ.
ވިސާމަށް ކުރާ މި ދައުވާގައި ބުނަނީ މާޗް 25، 2015 ވަނަ ދުވަހު މާލޭގައި މުޒާހަރާ ކުރަމުން ދަނިކޮށް، ބަންދުކޮށްފައިވާ ސަރަހައްދަކުން މީހަކު ހައްޔަރު ކުރަން ފުލުހުން މަސައްކަތް ކުރުމުން އެމީހާ ހައްޔަރުކުރީ ކީއްވެތޯ ބަލަން ބަންދުކޮށްފައިވާ ސަރަހައްދަށް ވިސާމް ވަދެފައިވާ ކަމަށެވެ. -- އެއީ އަދާލަތު ޕާޓީ އާއި އެމްޑީޕީއިން ކުރި މުޒާހަރާއެކެވެ.
މި ދައުވާއަށް ވިސާމް ވަނީ އިންކާރުކޮށްފަ އެވެ. އަދި ދިފާއުވާން ހެކި ވަނީ ހުށަހަޅާފަ އެވެ. ހުށަހަޅާފައިވަނީ ހަތަރު މީހެއްގެ ނަމެވެ. އޭގެ ތެރޭގައި މަޖިލިސް މެމްބަރު މުހައްމަދު އަބްދުލްކަރީމް (ރުކުމާ) ވެސް ހިމެނެ އެވެ.
ދައުލަތުން މި މައްސަލާގައި ދެ ފުލުހެއްގެ ނަން ހެކިންގެ ގޮތުގައި ހުށަހެޅި އެވެ. އެއީ އެ ދުވަހު އެ ސަރަހައްދުގައި ހަރަކާތްތެރިވި ދެ އެސްއޯ ފުލުހެއްގެ ނަމެވެ. މީގެ އިތުރުން އެ ދުވަހުގެ ވީޑިއޯ ފުޓޭޖަކާއި އެ ދުވަހު ފުލުހުން ބަންދުކޮށްފައިވާ ހިސާބު އަންގައިދޭ މެޕެއް ވެސް ހެކީގެ ގޮތުގައި ވަނީ ހުށަހަޅާފަ އެވެ.
ހެކި ބަސް ނެގުމަށް މީގެ ކުރިން ބޭއްވި އަޑުއެހުން ވަނީ ކެންސަލްކޮށްފަ އެވެ. މިއަދުގެ އަޑުއެހުން ވެސް ކެންސަލްކޮށްފައިވާއިރު މައްސަލައިގެ އަޑުއެހުމެއް ދެން އޮންނާނީ މި މަހުގެ 18 ވަނަ ދުވަހުއެވެ.
ވިސާމްގެ އިތުރު މައްސަލައެއް ވެސް ކުރިމިނަލް ކޯޓުގައި ދަނީ ބަލަމުންނެވެ. އެ މައްސަލާގައި އޭނާގެ މައްޗަށް ކުށް ސާބިތުވާ ކަމަށް ވަނީ ކަނޑައަޅާފަ އެވެ. އެއަށް އަދަބެއް ކަނޑައެޅުން އޮންނާނީ މި މަހުގެ 24 ވަނަ ދުވަހު އެވެ.
ދެހާސްފަނަރަ ވަނަ އަހަރު މުލިއާގެ ކައިރިން ފެނުނު ބޮން ޑިފިއުސްކުރަން ސިފައިން މާފަންނު ދަނޑުގައި ހަރަކާތްތެރިވަމުން ދަނިކޮށް ގާނޫނު ތަންފީޒުކުރާ މުއައްޒަފެއްގެ މަސައްކަތަށް ގަސްދުގައި ހުރަސް އެޅި ކަމަށް ބުނެ މި މައްސަލާގައި ވިސާމްގެ އިތުރުން ރާއްޖެ ޓީވީގެ ނޫސްވެރިޔާ ލީވާން ނަސީރާއި އެ ސްޓޭޝަންގެ ސީއޯއޯ ހުސެއިން ފިޔާޒުގެ މައްޗަށް ވެސް ވަނީ ދައުވާ އުފުލާފަ އެވެ.