މި އަހަރު ސީޒަނަކީ އަނެއްކާވެސް ބިދެސީ ކީޕަރުން ޓީމުތަކުގެ ގޯލަށް އިތުރުވި އަހަރެކެވެ. މިދިޔަ އަހަރު ފުރަތަމަ ޑިވިޝަންގައި ވާދަކުރި އަށް ޓީމުގެ ތެރެއިން ހަތަރު ޓީމުގެ ގޯލް ބަލަހައްޓާފައި ވަނީ ބިދޭސީ ކީޕަރުން ނެވެ. މި އަހަރަކީ އެ އަދަދު އެއަށްވުރެ ވެސް އިތުރުވާނެ އަހަރެކެވެ. އޮފް ސީޒަންގެ ޓްރާންސްފާ ޚަބަރުތައް ލިބޭ ގޮތުން މިއަހަރު ފުރަތަމަ ޑިވިޝަންގެ ދެ ޓީމު ފިޔަވައި އަނެއް ހުރިހާ ޓީމެއްގެ ގޯލުން ވެސް ފެންނާނީ ބިދޭސީ ކީޕަރުން ނެވެ.
ދިވެހި ކީޕަރުން ދޫކޮށް ޓީމުތަކުން ބިދޭސީ ކީޕަރުންނަށް ހޯދަން ޖެހެނީ ސަބަބުތައް ހުރެގެނެވެ. ރާއްޖޭގައި ރަނގަޅު ކީޕަރުން އުފެދޭ އަދަދު މަދީ އެވެ. ދިވެހި ކީޕަރުން އުފެދޭ މިންވަރު މަދުވުމުން ކުރިއަށް އޮތް ދެތިން އަހަރެއްގެ ތެރޭގައި ގައުމީ ޓީމުގެ ގޯލަށް ރިޕްލޭސް ކުރާނެ ރަނގަޅު ކީޕަރަކު ނެތުމުގެ ބިރުވެސް އެބައޮތެވެ. އޭގެ ހުރިހާ ގެއްލުމެއް އޮތީ ދިވެހި ފުޓްބޯޅަ އަށެވެ.
ބިދޭސީ ކީޕަރުން ރާއްޖެއަށް ޖަމާވާ މައްސަލާގައި ރާއްޖެ މިހާތަނަށް ދުށް އެންމެ ހުޝިޔާރު ކީޕަރު އިމްރާން މުހައްމަދު ވަނީ ވާހަކަ ދައްކާފަ އެވެ. އިމްރާން ބުނަނީ ދިވެހި ޓީމުތަކުން ބިދޭސީ ކީޕަރުން ނަށް ކުރާ އިންވެސްޓް ދޫކޮށް ލުމަށްފަހު، ދިވެހި ކީޕަރުންނަށް އިތުބާރު ކުރުމަށެވެ. އޭނާ ވަނީ އެގޮތަށް ވިސްނުން ބަދަލު ކުރަން އިލްތިމާސް ވެސް ކޮށްފައެވެ.
"ޓީމު ތަކުން އެބަޖެހޭ ދިވެހި ކީޕަރުންނަށް އިތުބާރު ކުރަން ރާއްޖޭގައި އެބަތިބި ވަރަށް މޮޅު ކީޕަރުން އެ ކީޕަރުންނަށް އިތުބާރުކޮށް ފުރުސަތު ދޭން ޖެހޭ. ފުރުސަތު ލިބިގެން އެ ކީޕަރުންގެ ފެންވަރު ސާބިތު ކޮށްދެވޭނީ،" އަވަސް އަށް ދިން އިންޓަވިއުގައި އިމްރާން ބުންޏެވެ.
ދިވެހި ހުނަރުވެރި ކީޕަރުންތަކެއް މީގެ ކުރިން ގަލޮޅު ދަނޑުން ފެނިފައިވެ އެވެ. ބައެއް ކީޕަރުންނަށް ކުރިމަތިވި މައްސަލަތަކުގެ ސަބަބުން އެ ކީޕަރުން ގަލޮޅު ދަނޑު ދޫކޮށް ދަށް ޑިވިޝަންތަކަށް ބަދަލުވީ އެވެ.
"މިކަމާ ވިސްނަން ޖެހޭނީ ހަމައެކަނި ކީޕަރުންނެއް ނޫން ކީޕަރުންގެ އިތުރުން މުޅި ފުޓްބޯޅަ ކޮމިޔުނިޓީ އެކަމާ ވިސްނަން އެބަޖެހޭ މިއީ ހަމައެކަނި ކީޕަރަށް ކުޅޭ ކުޅުންތެރިންގެ ޒިންމާއެއް ނޫން އެންމެންގެ ވެސް ޒިންމާ އެއް."
އެންމެންގެ ޒިންމާވާން ޖެހޭ ސަބަބު މިއޮތީ އެވެ.
"ކީޕަރު 10 ބޯޅަ ސަލާމަތް ކޮށްފައި އެންމެ ބޯޅަ އެއް ވަނަސް ކީޕަރުން އެބަ ކުށްވެރި ކުރޭ. އެކަމަކު ފޯވަޑަކަށް ލިބޭ 10 ބޯޅައިގެ ތެރެއިން އެންމެ ބޯޅާ އެއް ޖެހުނަސް އޭނާ ވަރުގެ މީހަކު ނުހުރޭ! ކީޕަރުން އަތުން އެންމެ ބޯޅައެއް ވަނަސް ކީޕަރުންނަށް ރަށްދު ކޮށް އެއްލާ ހަރުކަށި ބަސްތަކުން ކީޕަރަށް ކުޅެން ބޭނުންވާ ކުދިންވެސް ފޫހިވާ ގޮތްވޭ އެހެންވެ މިދަންނަވަނީ މިއީ އެންމެންގެ ޒިންމާ އެކޭ." އިމްރާން ތަފްސީލު ކޮށް ދިނެވެ.
ރާއްޖޭގެ ބައެއް ކުލަބުތަކުންނާއި އަމިއްލަ ފަރާތްކުން ވެސް ކުޅުންތެރިން އުފައްދަން އެކެޑެމީތައް ހިންގަ އެވެ. ނަމަވެސް ކީޕަރުން އުފެދޭލެ މަދެވެ. ކީޕަރުންނަށް ހާއްސަ ކޮށް ޓްރެއިނިން ދޭނެ ގޯލްކީޕިން ކޯޗުން ވެސް ރާއްޖޭގައި މަދެވެ.
ގިނަ ކުލަބުތަކުގައި ގޯލްކީޕަރު ޓްރެއިނަރަކަށް ހުންނަނީ ކީޕަރަކަށް ކުޅެ ނުވަތަ އެކަމުގެ ތަމްރީނުތައް ފުރިހަމަ ކޮށްފައިވާ މީހުންނެއް ނޫނެވެ.
އެފްއޭއެމުން ކޮންމެ އަހަރަކު ދެ ފަހަރު ކަހަލަ ގޮތަކަށް ކޯޗިން ތަމްރީން ކުރާ ކޯސްތައް ބާއްވަ އެވެ. ނަމަވެސް ގޯލް ކީޕިން ކޯޗުން ތަމްރީން ކުރާނެ ކޯހެއްގެ މުގައްރަރެއް އެކުލެވިފަ އެއް ނުވެއެވެ. ކީޕަރުން އުފައްދަން ބޭނުންނަމަ ކީޕަރުން ތަމްރީން ކުރަން ގޯލްކީޕިން ކޯޗުން ވެސް އުފައްދަން ޖެހެއެވެ.
ދިވެހި ކީޕަރުން ހޯދުމުގައި ޓީމުތަކަށް ދިމާވާ ދަތިތަކެއް ވެސް އެބައޮތެވެ. އެއީ ދިވެހި ކީޕަރުން ކިޔާ އަގު މަތިވުމެވެ. މާޅީ ގޮތުން ކުަލަބުތައް އޮތް ހާލަތުން ކީޕަރުންނަށް އެވަރުގެ މުސާރަ އެއް ދެވޭނެ ފެންވަރެއް ކުލަބުތަކުގައި ނެތެވެ. އެހެންވެ ބިދޭސީ ކީޕަރުން ގެންނަން ޖެހޭ އެއް ސަބަބަކީ ބިދޭސީ ކީޕަރުންގެ އަގު ދިވެހި ކީޕަރުންނަށް ވުރެ ނިސްބަތުން ކުޑަ ވުމެވެ.