މިދިޔަ ސީޒަންގައި ޔުނައިޓަޑް ވިކްޓަރީގެ ސީރިޔާގެ ގައުމީ ޓީމުގެ ގޯލް ކީޕަރު މުހައްމަދު އަލް ޔޫސުފް އާއި ޓީސީގެ އިބްރާހިމް ރިޒުވާން (ބަގޭ) ވިކްޓަރީ އަށް ސޮއި ކޮށްފި އެވެ.
މި ދެ ކުޅުންތެރިންވެސް ސޮއި ކުރީ އެއް އަހަރު ދުވަހުގެ މުއްދަތަށެވެ.
މިދިޔަ ސީޒަންގައި ޔުނައިޓަޑް ވިކްޓަރީގައި ޔޫސުފް ވަނީ މޮޅު ކުޅުމެއް ދައްކާފަ އެވެ. މި ދިޔަ ސީޒަންގެ އެފްއޭ ކަޕުގެ ކުއާޓާ ފައިނަލުން މާޒިޔާ ކަޓުވާލުމުގައި އެންމެ މުހިންމު ދައުރެއް އަދާ ކުރީ ޔޫސުފް އެވެ. އޭނާ ވަނީ ނަތީޖާ ނެރުމަށް ޖެހި ޕެނަލްޓީ ގައި، ޕެނަލްޓީ ދިފާއު ކޮށް ޕެނަލްޓީ ކާމިޔާބު ވެސް ކޮށްފަ އެވެ.
މީގެ ކުރިން، ވިކްޓްރީ އަށް ވަނީ މިދިޔަ ސީޒަންގައި އީގަލްސް އިން ފެނުނު މިސްރުގެ މުސްތަފާ މުހައްމަދު ސެޑިކް ވެސް ސޮއި ކޮށްފަ އެވެ. އަދި ނިއުރޭޑިއަންޓްގެ ޑިފެންޑަރު ބަލްގޭރިއާގެ ވެލިޗިކޯވް އާއި ޔުވީގެ ކެރިކް ވެސް ވަނީ ސޮއިކޮށްފަ އެވެ.
ވިކްޓަރީގެ ޕްރެކްޓިސް މިއަދު ފަށަނީ
ވިކްޓަރީގެ ޕްރެކްޓިސް މިއަދު ހަވީރު ފެށުމަށް އެޓީމުން ވަނީ ނިންމާފަ އެވެ. ވިކްޓަރީގެ އޮފިޝަލަކު ބުނީ ދިވެހި ކުޅުންތެރިންގެ ތެރެއިން އަދުހަމް ފިޔަވައި އެހެން ދިވެހި ކުޅުންތެރިން މިއަދު ޕްރެކްޓިސްއަށް ނިކުންނާނެ ކަމަށެވެ.
ވިކްޓަރީގެ ޕްރެކްޓިސް އޮންނާނީ ކުޅިވަރު އެކުވެނީގެ ޓާފް ދަނޑުގަ އެވެ.