ނިއުރޭޑއިަންޓްގެ ފުޓްބޯޅަ އެކެޑެމީ އަންނަ މަހު ފަށާ ގޮތަށް ނިންމައި، ދެ ޖިންސުގެ ކުދިންނަށް ފުރުސަތު ހުޅުވާ ލައިފި އެވެ.
މިއީ ފުރަތަމަ ޑިވިޝަންގައި ވާދަ ކުރާ ކުލަބަކުން، އެކެޑެމީގައި އަންހެން ކުދިންނަށް ފުރުސަތު ހުޅުވާލަން ނިންމި ފުރަތަމަ ފަހަރެވެ.
ފުރަތަމަ ޑިވިޝަން ޓީމުތަކުގެ ތެރެއިން ނިއުއަކީ، އަންހެން ޓީމެއް ވެސް އޮންނަ ހަމައެކަނި ޓީމެވެ. ނިއުގެ އަންހެން ޓީމުން ވަނީ 2015 ވަނަ އަހަރު ބޭއްވި އެފްއޭއެމް ވިމެން ފުޓްބޯޅަ ޓޯނަމަންޓްގެ ޗެމްޕިއަންކަން ހޯދާފަ އެވެ.
ނިއުގެ ޖެނަރަލް ސެކެޓްރީ އަހްމަދު ނިޔާޒު މޫސާ ވިދާޅުވީ، ނިއުގެ އެކެޑެމީގެ ހެޑް ކޯޗެއްގެ ގޮތުގައި، އެޓީމަށް މިފަހަރު ގެނައި ޓްރޭނަރު ޕޯޗްގަލްގެ ޔަކީމް ވެލިންހޯ ހަމަޖައްސާ ފައިވާ ކަމަށެވެ. ވެލިންހޯ އަކީ ޔޫއެފްއާ ބީ ލައިސެންސް ހާސިލު ކޮށްފައިވާ ކޯޗެއް ވެސް މެއެވެ.
އޭނާ ވިދާޅުވީ، އެކެޑެމީގެ ޑައިރެކްޓަރަކަށް ހަމަޖައްސާނީ ރާއްޖޭގެ ފުޓްބޯޅައިގެ ތަޖުރިބާ ކާރެއް ކަމަށެވެ.
ނިއުގެ އެކެޑެމީގައި އުމުރުން ހަ އަހަރުން ފެށިގެން 19 އަހަރާ ދެމެދުގެ ކުދިން ބައިވެރި ކުރެވޭނެ އެވެ. ކުދިން ބައިވެރި ކުރަން ބޭނުންވާ ފަރަތްތަކުން ނިއުގެ ފޯން ނަންބަރު 7887979 އަށް އެކުއްޖެއްގެ މައުލޫމަތު ހިމަނައި އެސްއެމްއެސް ކުރުމުން ބައިވެރި ވެވޭނެ އެވެ.
ނިޔާ ވިދާޅުވީ އެކެޑެމީ ހަރަކާތްތައް ފެށުމަށް އޯޕަން ޑޭ އެއް ބޭއްވުމަށް ހަމަޖެހިފައިވާ ކަމަށެވެ.