މިދިޔަ އަހަރު، ބޮޑު ސްކޮޑަކާއެކު، ނިކުތް މާޒިޔާ އަށް މިއަހަރު އައި އެންމެ ބޮޑު ބަދަލަކީ، މުހިންމު ބައެއް ކުޅުންތެރިން ދޫކޮށްލައި، ސްކޮޑް އޯވަހޯލް ކޮށްލުމެވެ. ހަމައެއާއެކު، މާޒިޔާގެ ހުންގާނު ޔޫރަޕްގެ ކޯޗަކާ ދިމާލަށް އަނބުރާލުން ވެސްވީ، މާޒިޔާއަށް ގެނުވި ތަފާތު ބަދަލަ ކަށެވެ. އެ ބަދަލުގެ ތަފާތުވެސް ފެނިއްޖެ އެވެ. މެސަޑޯނިއާގެ މަރުޖޮން ސްކޮލޮސްކީ އެޓީމާ ހަވާލުވެ އެ ޓީމުގައި ހިތްގައިމު ޕާސިން ގޭމެއް މުޑުވަށް ކޮށްފި އެވެ.
އިއްޔެ އީގަލްސްއާ ދެކޮޅަށް ކުޅުނު ޓްރެއިނިން މެޗްގައި މާޒިޔާ އިން ވަނީ ގިނަ ޕާސްތަކެއް ޖަހައި، ދަނޑުގައި ޑޮމިނޭޓް ކޮށްފަ އެވެ. ސްކޮަލަސްކީ ގެނައި ޕާސިން ގޭމުން، މާޒިޔާގެ ގޭމް ޕެލޭން ހަލުވި ވެއްޖެ އެވެ. ކުރިން އާންމުކޮށް، އަރިމަތިން ހަމަލާ އުފައްދާ ޓީމުގައި އޭނަ އެކަށައެޅި ޕާސިން ގޭމުން، ހުރިހާ ދިމާލަކުން، ހަމަލާތައް ވެސް ވަރުގަދަ އެވެ.
މާޒިޔާއިން ގެނެސްފައިވާ ބޭރު ކުޅުންތެރިންނަކީ، އެ ގޭމަށް ފައްކާ ކުޅުންތެރިން ތަކެކެވެ. ބޯޅަ ގެއްލުމުން، ބިދޭސީ ޑިފެންޑަރު މިލޮސް ކޮވަސެވިޗްގެ ހަރަކާތްތައް އަވަސްވެފައި ބޯޅަ ހޯދުމުގައި ހުށިޔާރެވެ.
މާޒިޔާގެ ބައެއް ޓްރެއިނިން ޝޭޝަންތަކުގައި ސްކޮލަސްކީ ވަނީ، ޕާސިން ގޭމަށް މުޅި ޓީމު ހަނުވަން މަސައްކަތް ކޮށްފަ އެވެ. އަދި އިއްޔަގެ މެޗުގައި އޭނަ ވަނީ، ތަފާތު ކުޅުންތެރިން ބޭނުން ކޮށްގެން، އޭނާގެ ސްޓައިލަށް ޓެސްޓް ކޮށްފަ އެވެ.
ޕްރެކްޓިސް މެޗެއްގައި ޕާސިން ގޭމެއް، ފަސޭހަ ކަމާއެކު ކުރެވިދާނެ އެވެ. ދެން އުފެދޭ ސުވާލަކީ މުޅި ސީޒަންގައި ގޭމް ޕްލޭން މެއިންޓެިން ކުރެވޭނެތޯ އެވެ.
"އަހަންނަށް އެބައޮތް، މި ގޭމް މެއިންޓެއިން ކުރެވޭނެ ކަމުގެ ޔަގީން ކަން، މުޅި ސީޒަންގައި މިގޮތަށް ދަމަހައްޓަން އަހަރެން މަސައްކަތް ކުރާނަން،" އިއްޔަ އީގަލްސްއާ ދެކޮޅަށް ކުޅުނު ޓްރެއިނިން މެޗަށްފަހު އަވަސްއަ ވާހަކަ ދައްކަމުން ސްކޮލަސްކީ ބުންޏެވެ.
އޭނާ ބުނީ މާޒިޔާގައި އޮތް ސްކޮޑަކީ، ބޭނުންވާ ގޮތަށް މަސައްކަތް ކުރަން ފަސޭހަ ސްކޮޑެއް ކަމަށާއި، ޓީމުގެ ޒުވާން ކުޅުންތެރިންގެ ފަރާތުންވެސް އޭނާ ބޭނުންވާ ބަދަލު ފެންނަ ކަމަށެވެ.