އެހެން ކަމަށްވާ ނަމަ ތިރީގައި މި އޮތީ އޭގެ ލިސްޓެކެވެ. ހޮލީވުޑުން އަބަދުވެސް އެމީހުންގެ އެންމެ މޮޅެތި ފިލްމުތައް ޕްރިމިއާކުރާނީ އަހަރުގެ ފަހުކޮޅު، މި ހިސާބުގަ އެވެ. އެހެންވީމަ އެންޖެލީނާ ޖޯލީގެ ފިލްމަކުން ފަށަމާ ހިނގާށެވެ.
އެންޖެލީނާ ޖޯލީ އަކީ މޮޅު އެކްޓްރެސް އެކެވެ. މިހާރު ބުނަން ޖެހޭނީ އޭނާ އަކީ ވަރަށް މޮޅު ޑައިރެކްޓަރެކޭ ވެސްމެ އެވެ. އެކްޓަރެއްގެ ގޮތުގައި ގޯލްޑެން ގްލޯބާއި ޝަރަފްވެރި އޮސްކާ ހާސިލުކުރުމަށް ފަހު މިހާރު އޭނާގެ އަމާޒު ހިފާފައި ވަނީ އެންމެ މޮޅު ޑައިރެކްޓަރުގެ އެވޯޑަށްކަން ޔަގީނެވެ.
ފިލްމުގައި ކިޔައި ދެނީ އެމެރިކާގެ ވޯލްޑް ވާ ހީރޯއެއް ކަމަށްވާ ލުއިސް ޒަމްޕެރީނީގެ ވާހަކަ އެވެ. އޭނާ އަކީ ކުރިން މަޝްހޫރު އެތުލީޓެކެވެ. ދެ ވަނަ ބޮޑު ހަނގުރާމައިގެ ދުވަސްވަރު ޕެސިފިކް ސަރަހައްދަށް ގެއްލި އެންމެފަހުން ޖަޕާނު ސިފައިންގެ އަނިޔާވެރި ޖަލެއްގައި ބަންދުވެ ސަލާމަތްވާ ގޮތެވެ. މި ފިލްމު ސިނަމާތަކަށް ނުކުންނާނީ ޑިސެމްބަރު 25ގަ އެވެ.
މިއީ ޑްރާމާ އާއި ފެންޓަސީގެ ރަހަގަނޑު އެއްކޮށްފައިވާ ފިލްމެކެވެ. ފިލްމުގައި ދައްކުވައިދޭނީ ނުބައިކަން ގަދަވެގެންވާ ވިޗެއްގެ ސުންޕާކަމުން ސަލާމަތްވުމަށް އާއިލާއަކުން ކުރާ މަސައްކަތެކެވެ. މި ފިލްމުގެ ޑައިރެކްޓަރަކީ ރޮބް މާޝަލް އެވެ. އޭނާ އަކީ "ޕައިރޭޓް އޮފް ދަ ކެރީބިއަން: އޮން ސްޓްރޭންޖާ ޓައިޑްސް" ގެ ޑައިރެކްޓަރެވެ. މި ފިލްމު ވެސް ޕްރިމިއާކުރަނީ 25ގަ އެވެ.
މިއީ ތުރުކީގެ އެންމެ މޮޅު ޑައިރެކްޓަރު ކަމަށް ގިނަ ބަޔަކު އިއްތިފާގުވާ ނޫރީ ބިލްގޭ ޖިލާމްގެ ފިލްމެކެވެ. މި ފިލްމާ އެކު އޭނާ ވަނީ ނިމިގެން ދިޔަ ކޭން ފިލްމު ފެސްޓިވަލްގެ ރަން ވަނަ ޕާމް ޑޯ ހާސިލުކޮށްފަ އެވެ. މި ފިލްމު ޕްރިމިއާކޮށްފައިވީ ނަމަވެސް ދުނިޔޭގެ އެކި ކަންކޮޅުތަކުގައި ރަސްމީކޮށް ދައްކަން ފަށާނީ މި މަހުގެ 18ގަ އެވެ. ބިލްގޭ ޖިލާމްގެ މޮޅު ވާހަކަ އަޑު އަހާފައި ނުވާ ނަމަ 2011 ވަނަ އަހަރު އޭނާ ގެނެސްދިން "ވަންސް އަ ޕޯން އަ ޓައިމް އިން އެނަޓޯލިއާ" ބަލާށެވެ. އޭރުން އޭނާގެ ސްޓައިލް ތަފާތުކަން އެނގޭނެ އެވެ.
އޭނާ މަޝްހޫރުވެފައި ވަނީ ވަރަށް ކުޑަ ހޭދައެއްކޮށްގެން ތަފާތު ފިލްމު އުފައްދާ ފަރާތެއްގެ ގޮތުގަ އެވެ. އޭނާގެ ފިލްމުތަކުން އެކްޓަރުންގެ ގޮތުގައި އާންމުކޮށް ފެންނާނީ ވެސް އާ މޫނުތަކެވެ. ނުވަތަ އާއިލާގެ މެމްބަރުންނާއި ރައްޓެހިންނެވެ.ފިލްމުތަކުގެ ސްޓައިލަށް ބަލާއިރު ސްޓެޓިކް ޝޮޓް )ކެމެރާގެ ހަރަކާތް ހުއްޓިފައި ހުންނަ( ތަކާއި އެއް މަންޒަރެއް ދިގުދެމިގެންދާ ޝޮޓްތަކާ ރައްޓެހިކަން ފާހަގަކޮށްލެވެ އެވެ. ބައެއް މީހުންނަށް މި ސްޓައިލް "ދިގު" ވެފައި "ފޫހި" ވެދާނެ އެވެ.
މިއީ "ދަ މާސްޓާ" އާއި "ބޫގީ ނައިޓްސް" އަދި "މެގްނޯލިއާ" ފަދަ ފިލްމުތައް ގެނެސްދީފައިވާ މަޝްހޫރު ޑައިރެކްޓަރު ޕޯލް ތޯމަސް އެންޑާސަންގެ އާ ފިލްމެވެ.
މިއީ ކްރައިމް ކޮމެޑީ ޑްރާމާ އެކެވެ. އެންޑަސަންގެ ފިލްމެއް ނަމަ އާންމުކޮށް އަންނާނީ މި ކުލަތަކެވެ. ސިނަމާތަކަށް ފިލްމު ނުކުންނާނީ މި މަހުގެ 12 ވަނަ ދުވަހު އެވެ.
ޑައިރެކްޓަރު ޓިމް ބާޓަންގެ ފިލްމަކާ ނުލައި މިކަހަލަ ލިސްޓެއް ނިންމާލާކަށް ނުވާނެ އެވެ. އޭނާގެ އާ ފިލްމަކީ "ބިގް އައިސް" އެވެ. މިއީ އެމެރިކާގެ އާދަޔާހިލާފު ކުރެހުންތެރިޔާ މާގްރެޓް ކީން އާއި އޭނާގެ ކުރެހުންތަކާއި އެ ކުރެހުންތަކުން ފައިދާ ނެގި އޭނާގެ އޭރުގެ ފިރިމީހާ ވޯލްޓާ ކީންގެ ވާހަކަ އެވެ.
މި މަކަރާއި ހީލަތް ފަޅާއަރާ ހިސާބަކީ ދެމަފިރިން މި ކުރެހުންތަކުން މަހުޖަނުންނަށް ބަދަލުވެ ކުރެހުންތަކުގެ ކްރެޑިޓް މާގްރެޓް ބޭނުންވާ ހިސާބުންނެވެ. އެއްވެސް މީހަކު އޭނާ ދައްކާ ވާހަކައެއް ގަބޫލެއް ނުކުރެ އެވެ. އެންމެފަހުން ދެ މީހުންގެ ކުރިމަތިލުން ނިމިގެން ދަނީ މޮޅަށް ކުރެހެނީ ކާކުތޯ ބެލުމަށް ކޯޓު ތެރޭގައި ބާއްވާ މުބާރާތަކުންނެވެ.
މި ފިލްމުގައ މާގްރެޓްގެ ރޯލު ކުޅެފައި ވަނީ އޮސްކާއާ މިހަފުން އެންމެ ރައްޓެހި އެކަމަކު އަދިވެސް އޭގެ ޓްރޮފީއެއް އަތު ޖެހިފައި ނުވާ އޭމީ އެޑަމްސް އެވެ. ދެން މި އުޅެނީ އޮސްކާ ހާސިލުކޮށްފައިވާ ކުޅަދާނަ އެކްޓަރު ކްރިސްޓޮފް ވޯލްޓްޒްއެވެ. މި ފިލްމު ވެސް ނެރޭނީ ޑިސެމްބަރު 25ގަ އެވެ. ފިލްމު ނެރެން ތައްޔާރުވަމުން އަންނައިރު މާގްރެޓް އަދިވެސް ދުނިޔޭގައި އެބަހުއްޓެވެ. އޭނާ އަށް 87 އަހަރެވެ. ކުރީގެ ފިރިމީހާވޯލްޓާ ވަނީ 2000 ވަނަ އަހަރު މަރުވެފަ އެވެ.