ވެލެންސިއާގެ ކުރީގެ ކޯޗް އަހްމަދު މުޖުތަބާ އެނބުރި ވެލެންސިއާ އަށް އައިސް އެ ޓީމުގެ ކޯޗިން ސްޓާފެއްގެ ގޮތުގައި މަސައްކަތް ކުރަން ފަށައިފި އެވެ.
އޭއެފްސީ ކަޕް ޕްލޭއޮފް މެޗަށް ތައްޔާރުވާ، ވެލެންސިއާގެ ޕްރެކްޓިސް ޝެޝަންގައި އިއްޔެ އޭނާ ވަނީ ބައިވެރި ވެފަ އެވެ.
ނަމަވެސް، އޭނާ އޭއެފްސީ ކަޕް ޕްލޭއޮފް މެޗުގައި ވެލެންސިއާ ޓީމާއެކު ނުދާނެ އެވެ. ބޫޓާންގެ ތިމްޕޫ އެފްސީއާ ދެކޮޅަށް މިއަންނަ ހޯމަ ދުވަހު ކުޅޭމެޗަށް ވެލެންސިއާ ބޫޓާން އަށް ދާން ފުރާނީ، މިއަދު ހަވީރު އެވެ.
ޕްލޭޮއޮފް މެޗުގައި، ވެލެންސިއާ ޓީމަށް އިރުޝާދު ދޭނީ، މިދިޔަ އަހަރު ހެޑް ކޯޗެއްގެ ގޮތުގައި ހުރި ކުރީގެ ގޯލް ކީޕަރު، މުހައްމަދު އިގްބާލް އެވެ.
ވެލެންސިއާގެ އޮފިޝަލަކު ބުނީ، ވެލެންސިއާގެ ކޯޗިން ޓީމަށް، ފެސްކޯ ގެނައީ އޭނާ އަކީ މީގެ ކުރިން ވެލެންސިއާގައި މަސައްކަތް ކޮށްފައިވާ ކޯޗަކަށް ވުމުން އޭނާގެ ތަޖުރިބާ، ޓީމަށް މުހިންމު ކަމަށް ފެންނާތީ ކަމަށެވެ.
ފެސްކޯ އަކީ 'އޭ' ލައިސެންސް ހާސިލު ކޮށްފައިވާ ކޯޗެކެވެ.
ވެލެންސިއާގެ ޓެކްނިކަލް ޑައިރެކްޓާ އިސްމާއިލް އާސިފް ބުނީ، ފެސްކޯ އަކީ، އޭނާ އާއެކު، އޭވައިއެލް ގައި މަސައްކަތް ކުރި ކޯޗެއް ކަމަށާއި، ފެސްކޯ އާއެކު މަސައްކަތް ކުރަން ފަސޭހަ ވާނެ ކަމަށެވެ.
"ފެސްކޯ އަކީ ތަޖުރިބާ ހުރި ކޯޗެއް، އޭނާ އާއެކު، މީގެ ކުރިން މަސައްކަތް ކޮށްފައި ވުމުން އަޅުގަނޑަށް އެނގޭ އޭނާގެ ކޯޗިންގެ ސްޓައިލް އޭނާއާ އެކު މަސައްކަތް ކުރަން ފަސޭހަ ކޯޗެއް،" ހީނާ ބުންޏެވެ.
ގައުމީ ކެޕްޓަން އަލީ އަޝްފާގް (ދަގަނޑޭ) ގެ އުމުރުން 16 އަހަރުގައި، 2001 ވަނަ އަހަރު ފުރަތަމަ ޑިވިޝަން ފުޓްބޯޅައިން ޖާގަ ދިނީ، ވެލެންސިއާގައި ފެސްކޯގެ ކޯޗް ކަމުގެ ދަށުން ނެވެ.
ވެލެންސިއާ އެނބުރި އައުމަށްފަހު، ފެސްކޯ ބުނީ، 13 އަހަރު ފަހުން އޭނާގެ ގެއަށް އާދެވުމަކީ، ލިބުނު އުފަލެއް ކަމަށެވެ.