ޗައިނާގެ ދެކުނުގައި އޮންނަ ޗޮންގްކިންގެ "ނާ ހުއޯ" ރެސްޓޯރަންޓުން ކަސްޓަމަރުންގެ ސައިޒަށް ބަލައިގެން ޑިސްކައުންޓް ދޭ ޕްރޮމޯޝަނެއް ފަށައިފި އެވެ.
މި ޕްރޮމޯޝަންގައި، ފަލަ ފިރިހެނުންނަށް ލިބޭ ޑިސްކައުންޓަށް ވުރެ ހިކި އަންހެނުންނަށް ލިބޭ ޑިސްކައުންޓް ބޮޑުވާނެ ކަމަށް ބެލެވެ އެވެ. އެގޮތުން ފިރިހެނުންގެ ބަރުމިން މަތިވި ވަރަކަށް ޑިސްކައުންޓް ލިބެމުން ގޮސް 140 ކިލޯ އަށް ވުރެ ބަރު ފިރިހެނުންނަށް ހިލޭ ކާން ލިބެ އެވެ. އަންހެނެއްގެ ބިލް ހިލޭ ކޮށްދެނީ 34.5 ކިލޯ އަށް ވުރެ ލުއިވާ ނަމަ އެވެ.
މި ރެސްޓޯރަންޓުން ސޯޝަލް މީޑިއާގައި އާންމުކޮށްފައިވާ ޕްރޮމޯޝަނަލް ފޮޓޯތަކުން ފެންނަ ގޮތުގައި އެ ތަނުގެ މުވައްޒަފުން ކޮންމެ ކަސްޓަމަރެެއްގެ ބަރުދަން ބަލަ އެވެ. އެ ރެސްޓޯރަންޓުން ބުނަމުން ދަނީ އެ މީހުންނަކީ ކަސްޓަމަރުންނަށް އަޅާލައި ތަނެއް ކަމަށާއި މި ޕްރޮމޯޝަނަކީ ސީދާ ކަސްޓަމަރުންނަށް ހެޔޮކޮށް ހިތުމުގެ ހަރަކާތެެއް ކަމަށެވެ.
"ފަލަ އަދި ހިކި އެކުވެރިންނާ އެކު މިތަނަށް އައިސް ހިލޭ ކާންވީ" ކަމަށް ވެސް ރެސްޓޯރަންޓުން ބުނެފައިވެ އެވެ.
މީގެ ޕްރޮމޯޝަނެއް އެމެރިކާގެ ލަސް ވެގަސްގެ ރެސްޓޯރަންޓަކުން 2010 ވަނަ އަހަރު ކުރިއަށް ގެންދިޔަ އެވެ. އެގޮތުން ފަލަ މީހުންނަށް ބޮޑު ބާގާއެއް ހިލޭ ދީފައިވެ އެވެ. އެކަމަކު އެ ރެސްޓޯރަންޓުގެ ވެރިމީހާ ފަހުން ވަނީ، މިފަދަ ކާނާއާ ދުރުވެ ސިއްހަތަށް ފައިދާ ހުރި ތަކެތި ކެއުމަށް ގޮވާލައިފަ އެވެ. --ބީބީސީ