ދިވެހި ފުޓްބޯޅަ އަށް ޗައިނާގެ އެހީ ހޯދަން އެފްއޭއެމްގެ ރައީސް ބައްސާމް އަދީލް ޖަލީލް ޗައިނާ އަށް ވަޑައިގެންފި އެވެ.
ބައްސާމް ޗައިނާ އަށް ވަޑައިގެން ފައި ވަނީ، ރޭގެ ވަގުތެއް ގަ އެވެ. ޗައިނާގެ ދަތުރު މައިގަނޑު އަމާޒު ވެފައި ވަނީ، ފުޓްބޯޅައިގެ އިންފްރާސްޓްރަކްޗާ ތަރައްގީ ކުރުމަށެވެ.
އަތޮޅު ތެރޭގެ ފުޓްބޯޅައިގެ އިންފްރާސްޓަރަކްޗާ ތަރައްގީ ކުރުމަށް، އަހަރަކު 15 މިލިއަން ރުފިޔާ ހޭދަ ކުރުމަކީ ބައްސާމްގެ މުހިންމު ވައުދެ ކެވެ.
"ޗައިނާގެ މަޝްވަރާތަކުގައި އެންމެ ބޮޑަށް ހިމެނޭނީ، އަތޮޅުތެރޭގެ ފުޓްބޯޅައިގެ އިންފްރާ ސްޓަރަކްޗާ ގާއިމު ކުރުމަށް އެހީތެރިކަން ހޯދުން، އެގޮތުން ދަނޑުތަކަށް ބޭނުންވާ ލައިޓިން ސިސްޓާމާއި ޓާފް ވިނަ ހޯދުމުގެ ކަންކަމުގައި މަޝްވަރަތައް ކުރިއަށް ގެންދާނަން،" ޗައިނާ އަށް ފުރުމުގެ ކުރިން "އަވަސް" އާ ވާހަކަ ދައްކަވަމުން ބައްސާމް ވިދާޅުވި އެވެ.
ދަތުރުގައި ފުޓްބޯޅައިގެ ޓެކްނިކަލް ސައިޑުން އެހީތެރިކަން ހޯދުމަށް ހަމަޖެހިފައިވޭތޯ ސުވާލު ކުރުމުން، ބައްސާމް ވިދާޅުވީ މުޅި ދަތުރުގެ ރަސްމީ އެޖެންޑާ ހާއްސަ ވެފައިވަނީ، ފުޓްބޯޅައިގެ އުމްރާނީ ތަރައްގީ އަށް ކަމަށެވެ. ނަމަވެސް ބައްދަލުވުންތަކުގެ ހަވާސާއިން ޓެކްނިކަލް އެހީތެރިކަން ހޯދުމަށް ދޮރުތައް ހުޅުވަން މަސައްކަތް ކުރައްވާނެ ކަމަށް ވިދާޅުވި އެވެ.