ބައިނަލްއަގުވާމީ މާކެޓަށް ހާއްސަކޮށްގެން ގެސްޓް ހައުސްތަކަށް ހާއްސަ މަޖައްލާއެއް ނެރެން ފަށައިފި އެވެ.
"ގެސްޓް ހައުސް އޮފް މޯލްޑިވްސް" ގެ ނަމުގައި މި މަޖައްލާ ނެރެމުންދާ މޯލްޑިވްސް ގެޓްއަވޭސް ޕްރައިވެޓް ލިމިޓެޑުގެ މެނެޖިންގ ޑިރެކްޓަރ އަޙްމީމް ޢަބްދުއްރައްޒާގު ވިދާޅުވީ ބައިނަލްއަޤްވާމީ ޓްރެވަލް އެޖެންޓުންނަށާއި ޓޫރިސްޓުންނަށް ހާއްސަކޮށްގެން، ބައިނަލްއަޤްވާމީ ބޮޑެތި ޓްރެވަލް ފެއާތަކުގައި ހިލޭ ބަހާނެ ކަމަށެވެ. އަދި މި މަޖައްލާގެ ސަބަބުން ގެސްޓްހައުސް މާކެޓް ވަރަށް ބޮޑަށް އިސްތިހާރު ވެގެންދާނެ ކަމަށް އޭނާ ވިދާޅުވި އެވެ.
"މެގަޒިން ފުރަތަމަ އަހަރު ކަމަށްވުމުން އަޅުގަނޑުމެންވަނީ އިތުރު ރިވައިޒް އެޑިޝަން އެއް މެއި މަހު ނެރުމަށް ނިންމާފަ. ކުރިން ބައިވެރިނުވެވުނު ފަރާތްތަކުގެ އެދުމުގެ މަތިން ހުޅުވާލެވޭ ފުރުސަތެއް މިއީ، މެގަޒިން ވަރަށް ގިނަ ތަންތަނުން ލިބެން ހުންނާނެ، އަދި މޭޖާ ޓްރެވަލް ފެއަރ ތަކުގައި ވެސް ހިލޭ ބެހޭނެ، އަޅުގަނޑުމެން ގެ ބިޒްނަސް ޕާޓްނަރުން މެދުވެރިކޮށްވެސް މި މެގަޒިން ލިބޭނެ،" ރައްޒާގު ވިދާޅުވި އެވެ.
ގެސްޓް ހައުސް އޮފް މޯލްޑިވްސް ނެރެނީ އަހަރަކު 5000 ކޮޕީ އެވެ. އަދި މި މެގަޒިންގެ މައުލޫމާތު ގެސްޓް ހައުސް އޮންލައިނުންވެސް ލިބެން ހުރެ އެވެ. މި އޮންލައިނުން ރާއްޖޭގެ މީހުން ދިރިއުޅޭ 60 އަށްވުރެ ގިނަ ރަށުގައި ހުރި 240 އަށްވުރެ ގިނަ ގެސްޓްހައުސްގެ މައުލޫމާތު ލިބެ އެވެ.