އޭއެފްސީ ކަޕުގެ ޕްލޭއޮފް މެޗުގައި، ރާއްޖޭގެ ވެލެންސިއާ އާއި މޯހަންބަގާން، ނިކުންނަ މެޗަކީ ތާރީހީ ގޮތުން ވަރަށް ގިނަ އިއްތިފާގުތަކެއް ގުޅިގެންދާ މެޗެކެވެ. އެ އިއްތިފާގު ގުޅެނީ ވެލެންސިއާގެ އިސްމާއިލް އާސިފް (ކުޑަ ހީނާ) އާއި މުހައްމަދު އިގްބާލް (އައިކިޔު) އާ އެވެ.
ކުޑަ ހީނާ އަކީ ރާއްޖޭގެ ކުރީގެ އެއް މޮޅު އެއް ކުޅުންތެރިޔާ އެވެ. އަލީ އަޝްފާގް (ދަގަނޑޭ) ތަރިއަކަށް ވުމުގެ ކުރިން، ރާއްޖޭގެ އުފެދުނު އެންމެ މޮޅު ކުޅުންތެރިޔާ އަކީ ކާކުތޯ ބަލަން، ގިނަ ފޯމިއުލާ ތަކެއް ނެރެއެ އެވެ. ގިނަ ބަހުސްތަކެއް ކުރެވެ އެވެ. އެ ބަހުސް ފެށިގެން އަންނަނީ އޭރުގެ އެންމެ މޮޅު އެއް ކުޅުންތެރިޔާ ކުޑަ ހީނާއާ ހިސާބުން ނެވެ. ބައެއް މީހުން މިހާރުވެސް ބުނާ ވާހަކަ އެއް އެބައޮތެވެ. ކުޑަހީނާއާ އެއްވަރަށް ވިސްނުން ތޫނު، ހަލުވި އެހެން ކުޅުންތެރިޔެއް، ދިވެހި ފުޓްބޯޅަ އަދިވެސް ނުއުފެދެ އެވެ.
މިއަދު މޯހަންބަގާން އާ ދެކޮޅަށް ވެލެންސިއާ ނިކުންނައިރު، ވެލެންސިއާ ގައި ކުޑަ ހީނާ އާއި އިގްބާލްގެ ވާހަކަ ދައްކަން ޖެހޭ ސަބަބުތައް އެބައްޓެވެ. އެއީ 1995 ވަނަ އަހަރު، އޭޝިއަން ކުލަބު ޗެމްޕިއަންޝިޕްގައި، ވެލެންސިއާ ދެކޮޅަށް މޯހަންބަގާން، ކުޅުނު އިރު، ވެލެންސިއާގެ ޓީމުގެ އެންމެ މުހިންމު ދެ ކުޅުންތެރިންނަށް ވުމެވެ.
ނުވަދިހަ ފަސް ވަނަ އަހަރު، މޯހަންބަގާން އާ ވެލެންސިއާގެ ފުރަތަމަ ލެގް މެޗު އޮތީ އިންޑިއާގަ އެވެ. އެ މެޗުގައި ތަރި އަކަށްވީ ހީނާ އެވެ. އޭނާ އެދުވަހު ކުޅުނީ ޑިފެންސިވް މިޑްފީލްޑަރަކަށެވެ. ނަމަވެސް އޭނާގެ ހަލުވި ސްޕީޑް ބޭނުން ކޮށްގެން މުޅި ދަނޑުގައި އޭނާ ކުޅުނެވެ. 2-1 މޯހަންބަގާން މޮޅުވި ނަމަވެސް، މެޗުގެ ތަރީ އަކަށްވީ އޭނާ އެވެ. މޭން އޮފް ދަ މެޗަކީ އެއީ އެވެ.
އެ އަހަރަކީ، ކުޑަ ހީނާއާ ގުޅިގެން ޓާރްނސްފާ ވަރުގަދަ ވާހަކަ ތަކެއް ހިލުނު އަހަރެކެވެ. މޯހަންބަގާންއާ ދެކޮޅަށް، ކުޑަ ހީނާ ދެއްކި މޮޅު ކުޅުމުން، އޭނާ ގެންދަން މޯހަންބަގާން އިން ވެސް ހިފާލި އެވެ. ކުޑަ ހީނާގެ އިންޓަނޭޝަނަލް ޓްރާންސްފާގެ ވާހަކަތައް މީޑިއާގައި ގަދަވި އެވެ. ނަމަވެސް އެ އަހަރު ކަޕްވިނާސް ކަޕާއި އޭޝިއަން ކުލަބު ޗެމްޕިއަންޝިޕް ވެލެންސިއާ އަށް ކުޅުމަށްފަހު، އެއަހަރުގެ ބާކީ ބައި އޭނާ ކުޅުނީ އޯކިޑަށެވެ.
މާލޭގައި މޯހަންބަގާންއާ ދެކޮޅަށް ކުޅުނު މެޗު ކާމިޔާބު ކުރީ، ވެލެންސިއާ އެވެ. އެދުވަހު ވެލެންސިއާ މޮޅު ކޮށްދިނުމުގައި އެންމެ މުހިންމު ދައުރެއް އަދާ ކުރީ، ގޯލްކީޕަރު މުހައްމަދު އިގްބާލް (އަިކިޔު) އެވެ. އެ މެޗުގެ މޮޅު ކުޅުންތެރިޔާގެ މަގަމު ލިބުނީ އައިކިޔު އަށެވެ. އެ މެޗުން މޮޅުވެ ވެލެންސިއާ ދެ ވަނަ ބުރުގެ ޖާގަ ޔަގީން ވި އެވެ.
މިއީ އޭގެ 21 އަހަރު ފަހެވެ. ކުޑަ ހީނާ އާއި އައިކިޔު ވެލެންސިއާގައި އެބަ ތިއްބެވެ. ދިވެހި ފުޓްބޯޅަ އަށް އަދި ވެލެންސިއާ އަށް ވެސް ބަދަލު އައިސްފި އެވެ. ނަމަވެސް އެ ދެ ކުޅުންތެރިން ވެސް ޕްރޮފެޝަނަލް ކެރިއާ ހުއްޓާލިތާ އަހަރު ތަކެއް ވެއްޖެ ކެވެ. މިއަދު އެ ދެ މީހުންވެސް ތިބީ ވެލެންސިއާގެ ކޯޗިން ސްޓާފުންގެ ގޮތުގަ އެވެ. ވެލެންސިއާ ކޯޗިން ޓީމުގެ އެންމެ އިސް ދެ ނަމަކީ އެއީ އެވެ. ޓީމު އެކުލަވާލުމާއި ޓްރެއިނިންތައް ކުރިއަށް ގެންދަނީ ޓެކްނިކަލް ޑައިރެކްޓަރު ކުޑަ ހީނާގެ ރޭވުންތެރި ކަމުގެ ދަށުން ނެވެ. އައިކިޔު އަކީ ގޯލްކީޕަރު ޓްރެއިނަރެވެ. ވެލެންސިއާގެ ކޯޗް ވެސް މެ އެވެ.
އޭރު މާލޭގައި، މޯހަންބަގާންއާ ދެކޮޅަށް ވެލެންސިއާ މޮޅުވުމުގައި ސަޕޯޓަރުންގެ ފަރާތުން ލިބުނު ހިތްވަރާއި ފޯރި ވެސް މުހިންމު ދައުރެއް އަދާ ކުރިކަން ކަން ކުޑާ ހީނާ ފާހަގަ ކުރެ އެވެ. ސަޕޯޓަރުންގެ ފޯރި އާއި ހަޅޭކު އަޑުން މުޅި ދަނޑު އޮންނަނަނީ ގުގުމާލާފަ އެވެ.
ނަމަވެސް، ދިވެހި ދަނޑު ސަޕޯޓަރުންގެ އަޑު އެކީއެކައްޗަށް ކެނޑިގެން ހިނގައްޖެ އެވެ. އިންޑިއާގެ ކުލަބުތައް ސިސްޓަމެޓިކު ކިޮށް ހިންގަން ފެށިއިރު، ދިވެހި ކުލަބުތަކަށް، ތިބެން ޖެހުނީ ތިބި ހިސާބު ގަ އެވެ. އިންޑިއާގެ ކުޅުންތެރިންގެ ފުރަތަމަ ވަޒީފާ އަކީ ފުޓްބޯޅަ އެވެ. ފުޓްބޯލަ ނޫން އެހެން ކަމަކަށް، އެ ކުޅުންތެރިން ފޯކަސް ކުރަން ނުޖެހެ އެވެ. ނަމަވެސް، ރާއްޖޭގައި ފުޓްބޯޅަ އަކީ ކުލުންތެރިންގެ ދެ ވަނަ ވަޒީފާ އެވެ. ކުލަބުތައް ސިސްޓަމެޓިކް ކޮށް ހިންގާ ވާހަކަ ދިވެހި ފުޓްބޯޅައިގައި ދައްކަން ފެށީ މިދާކަށް ދުވަހު އެވެ.