މޯހަންބަގާންއާ ދެކޮޅަށް ލިބުނު ފުރުސަތުތައް ބޭނުން ނުކުރެވި، 1-1 ގެ ނަތީޖާ އަކުން އެއްވަރުވެ އޭއެފްސީ ކަޕް ޕްލޭއޮފްގެ ފުރަތަމަ ލެގް ގައި، ކުލަބު ވެލެންސިއާ އިން ޕޮއިންޓަކުން ފުއްދާލައިފި އެވެ.
މެޗުގެ ދެ ވަނަ ހާފުގައި، ވެލެންސިއާ އިން ވަނީ ރަނގަޅު ފުރުސަތު ތަކެއް ތަނަވަސް ކޮށްފަ އެވެ. މުޅި މެޗުގައިވެސް، އެންމެ ރަނގަޅު ފުރުސަތެއް ލިބުނީ ވެލެންސިއާގެ ހުސައިން ނިހާން (ނިހާޓް) އަށެވެ.
މެޗުގެ 75 ވަނަ މިނެޓްގައި ވެލެންސިއާގެ ޕެނަލްޓީ އޭރިއާ ތެރެއިން ވަރަށް މަސައްކަތުން ވެސްޓް ހޯދި ބޯޅަ، އޭނާ ދިނީ ގޯލް ކުރިމަތީގައި ހުރި ނިހާޓް އަށެވެ. ނަމަވެސް ނިހާޓް ފޮނުވާލި ބޯޅައިގައި ބާރެއް ނެތުމުން، އެބޯޅަ އަށް ހުރަސް އެޅީ މޯހަންބާގަންގެ ޑިފެންޑަރު އެޑްވާޑޯ ސޯރޭސް ފިރޭރިއޯ އެވެ. އޭނާގެ ގައިގައި ޖެހިފައި ރީބައުންސަށް ނިކުތް ބޯޅަ ވެސް ލިބުނީ ވެލެންސިއާގެ ކުޅުންތެރިޔަކަށެވެ. ނަމަވެސް ދެން ފޮނުވާލި ބޯޅަ ދިޔައީ ގޯލް ދަނޑި މަތިން ބޭރަށެވެ.
މެޗު ފަށައިގެން ފުރަތަމަ މިނެޓް ތެރޭގައިވެސް، ވެލެންސިއާގެ އޮމަޑް ގޮޑްފުރޭ ވެސްޓް ވަނީ، މޯހަންބަގާންގެ ގޯލަށް އަމާޒު ކޮށް ހަމަލާ އެއް ފޮނުވާލާފަ އެވެ. ނަމަވެސް އޭނާ ފޮނުވާލި ބޯޅައިގައި ބާރެއް ނެތުމުން، އެ ބޯޅަ ދިޔައީ ބޭރަށެވެ.
"މިއީ މޮޅުވުން ހައްގު މެޗެއް، ނަމަވެސް އަޅުގަނޑުމެންގެ ކުޅުންތެރިންނަށް ހެދުނު ބައެއް މިސްޓޭކް ތަކުން ތިން ޕޮއިންޓް ގެއްލުނީ، ޕްރެކްޓިސް މަދުވެ ލާން ޖެހޭ އެފަޓް ނުލެވުނީމަ އަދި (ބޯޅަ) އަށް ދޭން ޖެހޭ ސްޕީޑް އަންނަންވާ ވަރަށް ނައިސް މިދަނީ ޕްރެކްޓިސް މަދުވީމަ،" މެޗަށް ފަހު ވާހަކަ ދައްކަމުން ވެލެންސިއާގެ ހެޑް ކޯޗުގެ މަސްއޫލިއްޔަތު އުފުލަމުންދާ، އަހްމަދު މުޖުތަބާ (ފެސްކޯ) ބުންޏެވެ.
މެޗުގެ ފުރަތަމަ ލަނޑު، މެޗު ފެށިގެން 4 ވަނަ މިނެޓް ތެރޭގައި، މޯހަންބަގާން އަށް ކާމިޔާބު ކުރެވުނީވެސް، ވެލެންސިއާގެ ޑިފެންޑަރުން ނަށް ހެދުނު މިސްޓޭކެއްގެ ސަބަބުން ނެވެ.
މޯހަން ބަގާންގެ ސްކޮޓްލޭންޑްގެ ފޯވަޑް ޑަރޭލް ޑަފީ އަށް، ގޯލް ތެރެއަށް ޖަހަން ލިބުނު ބޯޅަ އަކީ ވެސް ވެލެންސިއާގެ ޑިފެންޑަރުންނަށް ރަނގަޅަށް ސަމާލު ނުވެވުމުން، ތަނަވަސް ވި ފުރުސަތެކެވެ. ނަތީޖާ އަކަށް ވީ ބޯޅަ ހިފައިގެން ޕެނަލްޓީ އޭރިއާ ތެރެއަށް ވަންނަށް އޭނާ އަށް ހުސް ފުރުސަތެއް ލިބުނު ކަމެވެ. އަދި ގޯލައަށް ބޯޅަ ފޮނުވާލަން، އޭނާ ވަގުތު ލިބުނު އިރު، ބޯޅަ އަށް ހުރަސް އަޅަން ހުރީ ކީޕަރު މުހައްމަދު ފައިސަލް އެކަންޏެވެ.
މޯހަންބަގާން ލީޑް ނެގި ނަމަވެސް، ވެލެންސިއާއިން ވަނީ ހަމަލާ ތަކެއް އުފައްދަން މަސައްކަތް ކޮށްފަ އެވެ. ގިނަ ޕާސް ތަކެއް ޖަހައިގެން ހަމަލާ އުފައްދަން މަސައްކަތް ކުރި ނަމަވެސް، ވެލެންސިއާ އަށް ކުރިމަތިވި މައްސަލަ އަކީ ޕާސްތައް މިސް ކޮށްލެ ވުމެވެ.
މެޗުގެ 24 ވަނަ މިނެޓްގައި ވެސް، އޮމަޑޫ ވަނީ ގޯލް ޖަހަން ފުރުސަތެއް ތަނަވަސް ކޮށްފަ އެވެ. ނަމަވެސް މިފަހަރުވެސް އޭނާ ފޮނުވަލި ބޯޅައިގައި ބަރެއް ނެތި، އެ ބޯޅަ ބޭނުން ކުރެވޭ ގޮތެއް ނުވި އެވެ.
އޭގެ ދެ މިނެޓް ފަހުން ވެސް އޮމަޑޫ އަށް ވަނީ ފުރުސަތެއް ލިބިގެން ގޮސްފަ އެވެ. އެ ބޯޅަ ދިޔައީ ގޯލް ދަނޑި މަތިން ބޭރަށެވެ.
މެޗުގެ 30 ވަނަ މިނެޓްގައި، ހިޝާމް ސަލީމު ވަނީ ރަނގަޅު ހުރަހެއް މޯހަންބަގާންގެ ޕެނަލްޓީ އޭރިއާ ތެރެއަށް ހުރަސް ކޮށްފަ އެވެ. އެ ބޯޅަ ނައިޖީރިއާގެ މިޑްފީލްޑާ ޗިނިއޯނޭ ޕްރިންސް ޗިންޑާ ފޮނުވާލި ބޯޅަ ދިޔައީ މާ މަތިން ނެވެ.
އެންމެ ފަހުން ތިމްޕޫއާ ދެކޮޅަށް ކުޅުނު މެޗުގައި ބަދަލު ކުޅުންތެރިޔެއްގެ ގޮތުގައި ނިކުމެ ވެލެންސިއާ ލީޑް ނަގައިދިން އިބްރާހިމް ހަމްދާން (ބީޖީމެސީ) އަށް ފުރަތަމަ ހާފަުގެ އެންމެ ފަހު މިނެޓް ގައި ވަނީ ފުރސަތެއް ލިބިގެން ގޮސްފަ އެވެ. ނަމަވެސް އެ ބޯޅަ ރަނގަޅަށް އޭނާ އަށް ފޮނުވާލެވޭ ގޮތެއް ނުވި އެވެ.
ދެ ވަނަ ހާފުގައި، މޯހަންބަގާން އިން އުފެއްދި ގިނަ ހަމަލާތަކުގެ ހުރަހަކަށްވީ، ވެލެންސިއާގެ ކީޕަރު ފައިސަލް އެވެ. މޯހަންބަގާންގެ ޝުބާޝިސް ބޯސް، ޕެނަލްޓީ އޭރިއާ ބޭރުން ފޮނުވާލި ދެ ބޯޅަ އާއި ޖަޕާނުގެ ކަޓްސްމީ ޔުޝާ އުފެއްދި ހަމަލާ ވެސް، ފައިސަލް ވަނީ ދިފާއު ކޮށްފަ އެވެ.
މޯހަންބަގާންގެ ހެޑްކޯޗް ސެން ޖޯއީ ސެން، ޓީމާ އެކު ނައިސް، ޓީމާ އެކު އައި، އެސިސްޓޭންޓް ކޯޗް ޝަންކަރުލާލް ޗަކްރަބޯޓީ ބުނީ ރަށުން ބޭރުގައި އެއް ޕޮއިންޓަކީވެސް ހިތް ހަމަޖެހޭ ނަތިޖާ އެއް ކަމަށެވެ.
އަދި މެޗުގައި، ގިނަ ހަމަލާ ތަކެއް މޯހަންބަގާން އަށް އުފެއްދުމަކީ ކުޅުމާ މެދު ހިތްހަމަޖެހެން އޮތް ސަބަބެއް ކަމަށް ޗަކްރަބޯޓީ ބުންޏެވެ.
މެޗުގެ 71 ވަނަ މިނެޓްގައި، ވެލެންސިއާ އަށް ނަތީޖާ ހަމަހަމަ ކޮށްދިން ލަނޑަކީ މޯހަންބަގާންގެ ޕެނަލްޓީ އޭރިއާ ތެރެއިން، އެ ޓީމުގެ ޑިފެންޑަރެއްގެ އަތުގައި ބޯޅަ ޖެހުމުން ލިބުނު ޕެނަލްޓީ އެއްގައި އޮމަޑޫ ކާމިޔަބު ކުރި ލަނޑެ ކެވެ.
ލަނޑަށް ފަހުވެސް ވެސްޓަށް ވަނީ ލަނޑު ޖަހަްނ ރަނގަޅު ފުރުސަތެއް ލިބިގެން ގޮސްފަ އެވެ. ޕެނަލްތީ އޭރިއާ ތެރެއަށް ވަދެ އޭނާ ފޮނުވާލަށް އުލޫނު ހަމަލާގެ ހުރހަކަށްވީ މޯހަންބަގާންގެ ކީޕަރު ޕައުލް ޝިލްޓޮން އެވެ.
މިދެ ޓީމު ކުޅޭ ދެ ވަނަ ލެގް މެޗު މި އަންނަ އަންގާރަ ދުވަހު އޮންނާނީ އިންޑިއާގަ އެވެ.
މޯހަންބަގާންގެ ޓީމާ އެކު ނުގެނައި، ކުޅުންތެރިން އެ މެޗުގައި ބޭޏުން ކުރާނެ ތޯ ސުވާލު ކުރުމުން ޗަކްރަބޯޓީ ބުނީ، އެ މެޗާ ބެހޭގޮތުން ވާހަކަ ދައްކަން އަވަސް ކަމަށެވެ.