ދިވެހި ޕީއާރު ކުންފުންޏެއް ކަމަށްވާ "މޯލްޑިވްސް ގެޓައަވޭސް" އިން ބާއްވާ ޓްރެވަލް ޓްރޭޑް މޯލްޑިވްސް (ޓީޓީއެމް) ފެއާ ކާމިޔާބު ކުރުމަށް ޕެސިފިކް އޭޝިޔާ ޓްރެވަލް އެސޯސިއޭޝަން (ޕާޓާ) ގުޅިއްޖެ އެވެ.
ޖަރުމަނުގައި މިހާރު ކުރިއަށްދާ އައިޓީބީ ފެއާގެ ހަވާސާގައި ޓީބީއެމް ފެއާއާ ދިމާކޮށް ޓޫރިޒަމް ދާއިރާގެ އިންސާނީ ވަސީލަތް އިތުރު ކުރުން ފަދަ ކަންކަމުގައި ގުޅުން ބަދަހި ކުރުމަށް އިއްޔެ ވަނީ ސޮއިކޮށްފަ އެވެ. މި އެއްބަސްވުމުގައި ޓީޓީއެމް ބާއްވާ މޯލްޑިވްސް ގެޓަވޭސްގެ ފަރާތުން ސޮއިކުރެއްވީ އެ ކުންފުނީގެ ސީއޯއޯ ޑރ. ހުސެއިން ސަނީ އެވެ. އަދި ޕާޓާގެ ފަރާތުން ސޮއިކުރެއްވީ ޕާޓާގެ ސީއޯއޯ ހާރިއޯ ހާޑީ އެވެ.
ޓީޓީއެމާ ދިމާކޮށް، ރާއްޖޭގައި ޕާޓާ އެކަޑަމީއެއް ހިންގުމަށް ވެސް ދާދިފަހުން ސޮއިކޮށްފައިވެ އެވެ. މި އެއްބަސްވުމުގައި ސޮއިކުރެއްވީ މިފެއާގެ އެއް އެސޯސިއޭޓް ޕާޓްނަރު ކަމަށްވާ ރާއްޖޭގެ ޓްރެވަލް އެޖެންޓުންގެ ޖަމިއްޔާއިންނެވެ.
ކުރިއަށް އޮތް ހަތަރު ވަރަށް އަހަރުގެ ތެރޭގައި ދެ މިލިއަން ޓޫރިސްޓުން ގެނެސް، ޓޫރިޒަމުން ލިބޭ އާމްދަނީ 3.5 ބިލިއަން ޑޮލަރަށް ގެންދިއުމުގެ އަމާޒަކާއެކު، ބާއްވާ މި ފެއާގައި ރާއްޖެ އާއި ރާއްޖޭން ބޭރުގެ 150 ޓްރެވަލް އެޖެންޓުންނާއި 100 ރިސޯޓު/ ޓޫރިސްޓު ހޮޓާތަކުގެ އިންވެރިން އަދި 50 ނޫސްވެރިންނާއި ޕީއާރު ފާމްތަކުން މި ފެއާގައި ބައިވެރިވާނެ އެވެ.
ދިވެހި ޕީއާރު ކުންފުންޏެއް ކަމަށްވާ މޯލްޑިވްސް ގެޓަވޭސްއިން ބާއްވާ މި ޓޫރިޒަމް ފެއާ އޮތީ މި އަހަރުގެ ޖުލައި މަހުގެ 12-13 އަށް ދަރުބާރުގޭގަ އެވެ. މި ފެއާގެ މީޑިޔާ ޕާޓްނަރަކީ "އަވަސް" އޮންލައިންއެވެ.