ބިރުގަންނާނެ ކަމެއް ނެތް، ރޯގާގެ ކަންތައް ނުރައްކާތެރި ހާލަތަކަށް ނުދޭ

ރާއްޖޭގައި މިހާރު ފެތުރެމުން އަންނަ ވައިރަލް ހުމުގެ ތެރޭގައި އެޗް1އެންޑް1 ނޫނީ ސްވައިން ފްލޫ ފެނުނު ނަމަވެސް އެއީ ކަންބޮޑުވާން ޖެހޭ ކަމެއް ނޫން ކަމަށާއި ރައްޔިތުން ބިރުގަނެ ކަންބޮޑުވާން ޖެހޭ ދަރަޖައަށް މިހާރު ފެތުރިގެން އުޅޭ ވައިރަލް ހުމުގެ ހާލަތު ރާއްޖޭގައި ގޮސްފައި ނުވާ ކަމަށް، ހެލްތް މިނިސްޓްރީ އިން މިއަދު ބުނެފި އެވެ.

މިހާރު ފެތުރެމުން އަންނަ ވައިރަލް ހުމާ ގުޅޭ ގޮތުން ހެލްތް މިނިސްޓްރީ އިން އެކުލަވާލާފައިވާ ކަމާ ގުޅޭ ކޮމިޓީއަކުން މިއަދު ނޫސްވެރިންނަށް މައުލޫމާތު ދެއްވަމުން އެކޮމިޓީގައި ހިމެނިވަޑައިގަންނަވާ، އޭޑީކޭގެ ޗީފް މެޑިކަލް އޮފިސާ ޑރ. އަބްދުﷲ ނިޔާފް ވިދާޅުވީ އެޗް1އެންޑް1 ގެ ކޭސްއެއް އަދި ފެންނައިރަށް އެކަމެއް ސީރިއަސްއެއް ނުވާ ކަމަށެވެ. ފެތުރޭ ރޯގާއެއްގެ ސީރިއަސްކަން ބަލަނީ، އެޗްޕީއޭ އަށް އެ ކޭސްތައް ރިޕޯޓްކުރާ މިންވަރަކަށް ބަލައިގެންކަން ފާހަގަ ކުރަމުން ނިޔާފް ވިދާޅުވީ މިހާރު ފެތުރިގެން އުޅޭ ރޯގާގައި ސީރިއަސް ހާލަތަކަށް ދިޔަ މީހުން މަދު ކަމަަށެވެ.

އަދި ވިދާޅުވީ، ރާއްޖޭގައި ސްވައިން ފްލޫއަށް ޓެސްޓް ކުރަން ފެށީ، 2015 ވަނަ އަހަރު ކަމަށާއި އެ ވައިރަސް ފެތުރޭތާ ޒަމާންތަކެއް ވެފައި ވާތީ މިހާރު އެޗް1އެންޑް1 އަކީ އާންމު ހާލަތެއްގައި ހުންނަ މީހެއްގެ ފުރާނައަށް ނުރައްކާތެރިވާނެ ރޯގާއެއް ނޫން ކަމަށެވެ.

"އިންފްލުއެންޒާގެ ހާލަތު ރާއްޖޭގައި އޮތީ ކަންބޮޑުވާ ހިސާބެއްގައެއް ނޫން. އަޅުގަނޑު އާންމުންނަށް ދަންނަވާލަން ބޭނުންވަނީ އެލާމިން ކަމަށް ބުނެ މައުލުމާތު ނުފަތުރާށޭ،" ޑރ. ނިޔާފު ވިދާޅުވި އެވެ. "ރައްޔިތުން ބިރުގަންނަވީއެއް ނޫން. ރައްޔިތުން ސަމާލްވާންވީ. އަދި ރައްޔިތުން ބިރުގަންނުވައިގެން ކާމިޔާބެއް ވެސް ނުވާނެ."

އެހެން ނަމަވެސް، އިންފްލްއެންޒާގެ އަލާމާތްތައް ފެންނާތީ އޭޑީކޭ އައިސީޔޫގައި ތުއްތު ކުއްޖަކަށް ފަރުވާދޭކަން ނިޔާފު ފާހަގަ ކުރެއްވި އެވެ. މިއަހަރު އިންފްލުއެންޒާއަށް ޓެސްޓް ކޮށްފައިވާ 208 މީހުންގެ ތެރެއިން، އެ ބައްޔަށް މިހާތަނަށް ޕޮޒިޓިވްވީ، 27 މީހުން ކަމަށް ވެސް ޕްރެސްކޮންފަރެންސްގައި ހާމަކުރި އެވެ.

ނިޔާފް ވިދާޅުވީ، އެޗް1އެން1 އަކީ މިހާރު ނުރައްކާތެރި ވައިރަހެއް ނޫން ކަމަށެވެ. ކުރިން އެ ވައިރަސް ނުރައްކާތެރި ވައިރަކަށްވީ އަލަށް ފެތުރުނު ވައިރަހަކަށްވެފައި އެ ވައިރަހާ ދިފާއީވުމުގެ ނިޒާމު މީހާގެ ހަށިގަނޑުގައި ނުހުންނާތީ ކަމަށެވެ. ނަމަވެސް އެ ވައިރަހާ ދެކޮޅަށް މިހާރު އިންސާނުންގެ ހަށިގަނޑުގައި އެންޓިބޮޑީޒް ހުންނާނެ ކަމަށް ބެލެވޭ ކަމަށެވެ.

"އެޗް1އެން1 އައިޑެންޓިފައި ކުރެވޭ ބަލި މީހުން ވެސް ރަނގަޅު ކުރެވޭ، އަޅުގަނޑުމެންނަށް ސާންޕަލް ނަގާ ޓެސްޓްކުރަން މި ނަގާ މުއްދަތާ ހަމައަށް ދާން ވާއިރަށް ވެސް ބައެއް މީހުން ރަނގަޅުވޭ އެބަ،" ޑރ. ނިޔާފް ވިދާޅުވި އެވެ.

ޑރ. ނިޔާފް ވިދާޅުވީ، އެޗް1އެން1 އަށް ބަކި ހާއްސަ ފަރުވާއެއް ދޭން ނުޖެހޭ ކަމަށެވެ. އެޑްމިޓްކޮށްގެން ފަރުވާ ދެނީ ވެސް ސީރިއަސް އަލާމާތްތަކެއް ފެންނަ ފަރާތަކަށް ކަމަށެވެ.

"މިހާރު ފަރުވާ ކުރެވެމުންދާ ބައެއް ބަލި މީހުން އެބަ ތިބި ފުލޫ އާއި އިންފްލުއެންޒާ އެކި އަލާމަތްތަކާއެކު ދެއްކިފަ، އެމީހުންނަށް ފަރުވާ މި ދެވެނީ ހަމަ ގޭގައި ވެސް އިންފްލުއެންޒާއަށް ދެވޭ ފަރުވާ ކުރާ ގޮތަށް ހުމަށް ދެވޭ ބޭހަކުން ހުން މަޑުކޮށް، މަދު ފަހަރަކު ރޮގާ ބޭހެއް ދެވި، ގިނައިން ދިޔާ ތަކެތި ދީގެން، ބޭރު ތެރެއަށް ނިކުމެ އުޅުން ތަންކޮޅެއް މަދުކޮށް، އެގޮތަށް ފަރުވާކޮށްގެން މި ރަނގަޅު ވަނީ،" ނިޔާފް ވިދާޅުވި އެވެ.

ނިޔާފް ވިދާޅުވީ، ރާއްޖެއިން މި ފެންނަނީ މުޅިން އާ ބާވަތެއްގެ ބައްޔެއް ނޫން ކަމަށާއި ރާއްޖެއިން މި ފެންނަނީ ފެތުރެމުންދާ ބައްޔެއް ނަމަވެސް ފެތުރެމުންދާ ދިޔުމުގައި ނުރައްކާތެރި ހާލަތުގައި ތިބި މީހުން ނެތް ކަމަށެވެ. އަދި އާދައިގެ ފަރުވާތަކަކުން ވެސް މި ބައްޔަށް ޓްރީޓްކުރެވޭ ކަމަށެވެ. އޭގެއިތުރުން ނިޔާފް ވިދާޅުވީ، ހާލަތު ސީރިއަސްވާ ފަރާތަކަށް ވެސް ފަރުވާ ދޭނެ ގާބިލްކަން ރާއްޖޭގައި އެބަހުރި ކަމަށާއި އަތޮޅުތަކުގައި ތިއްބެވި ޑޮކްޓަރުންނަށް ވެސް ބައްޔާ ގުޅޭ މައުލޫމާތު ދެމުން އަންނަ ކަމަށެވެ.

"ވަރަށް ބޮޑު އެލާމިން ދަނޑިވަޅަކަށް ދިޔައީ ކަމަށް ބެލުން ރައްކާތެރިއެއް ނޫން އެއީ، އެގޮތަށް ދެކި އާންމުން ވަރަށް ބޮޑަށް ހިތް ނުތަނަވަސްވެ ބިރުގަނެ ކުދިކުދި ކަންތައްތަކާ ވެސް ވަރަށް ބޮޑަށް ހޮސްޕިޓަލް ފުލްކޮށްލެވޭ ގޮތަށް ހޮސްޕިޓަލަށްދާނަމަ އަޅުގަނޑުމެންގެ ގާބިލްކަން ހުރި މިންވަރަށްވުރެ ކޭސް ލޯޑް ބޮޑުވެ އަސްލުގަ ރަނގަޅަށް ބަލައި އިސްކަންދޭން ޖެހޭ މީހުންނަށް އެ ޓައިމް ދިނުމުގެ ފުރުސަތު ހަނިވެގެން ދާނީ،" ޑރ. ނިޔާފް ވިދާޅުވި އެވެ.

އެ ޕްރެސްކޮންފަރެންސްގައި، އައިޖީއެމްއެޗްގެ ޑރ. ނިޔާޝާ އިބްރާހިމް ވިދާޅުވީ، ސްކޫލުތައް ބަންދުކުރާ ހާލަތަކަށް ރޯގާގެ ހާލަތު ނުދާ ކަމަށެވެ. ޑރ. ނިޔާފް ވެސް ވިދާޅުވީ ސްކޫލްތައް ބަންދު ކުރުމަކީ ހައްލެއް ނޫން ކަމަށެވެ. މީގައި މުހިންމީ އާންމު ރައްޔިތުން ހޭލުންތެރިވެ ރައްކާތެރިވުމުގެ ގޮތުން ފިޔަވަޅުތައް އެޅުން ކަމަށް ވެސް ވިދާޅުވި އެވެ.

ޑރ. ނިޔާޝާ ވިދާޅުވީ، އެލާޓް ލެވެލްތަކެއް ހުންނަ ކަމަށާއި މިހާރު ފްލޫ ކްލިނިކެއް ހުޅުވައި، އެކަމަށް ސަމާލުވުމަށް އަންގާފައިވަނީ ވެސް ކޮންމެވެސް ލެވެލަކަށް އައުމުން ކަމަށެވެ. މި ލެވަލަށްވުރެ މައްޗަށް ގޮސްފިނަމަ އިތުރު ފިޔަވަޅުތައް އަޅާނެ ކަމަށެވެ.

"މިސާލަކަށް ސްކޫލްތައް ބަންދުކުރުމާއި ޓްރެވެލް އެލާޓް ނެރުން، ލެވްލްތައް މި އޮންނަނީ ބަހާފައި، އެހެންވީމަ ސީރިއަސްއެއް ނޫނޭ ވެސް ވިދާޅެއް ނުވެވޭނެ، ސީރިއަސް އަޅުގަނޑުމެން، އެހެންވީމަ ކްލިނިކް ވެސް ހުޅުވާފަ އެހުރީ، އެކަމަކު އެހާ ލެވެލަކަށް ނުދޭ ސްކޫލްތައް ބަންދުކޮށް ޓްރެވެލް އެލާޓް ނެރޭހާ، އެހާ ސީރިއަސްއެއް ނޫން،" ނިޔާޝާ ވިދާޅުވި އެވެ.

ސޯޝަލް މީޑިއާގައި އެޗް1އެން1އަކީ ދޫނި ރޯގާ ކަމަށް ބުނެ އަޑުތައް ފެތުރެމުންދާތީ އެކަން ވެސް ނިޔާޝާ ވަނީ ދޮގުކުރައްވާފަ އެވެ. ނިޔާޝާ ވިދާޅުވީ، އެޗް1އެން1 އަކީ ބާޑް ފްލޫ ނޫން ކަމަށާއި ބާޑް ފްލޫއަކީ އެޗް5އެން1 ކަމަށެވެ.