އެޗް1އެންޑް1 ނޫނީ ސްވައިން ފްލޫއަށް މި އަހަރު ތެރޭގައި ރާއްޖެއިން ޕޮޒިޓިވްވީ 27 މީހެއް ކަމަށާއި އޭގެ ތެރެއިން ގިނަ މީހުން ރަނގަޅުވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން މިއަދު ބުނެފި އެވެ.

މިހާރު ފެތުރެމުންދާ ހުމާއި ރޯގާއާ ގުޅޭ ގޮތުން މައުލޫމާތު ދިނުމަށް ހެލްތް މިނިސްޓްރީގައި މިއަދު އޮތް ނޫސްވެރިންގެ ބައްދަލުވުމުގައި އެޗްޕީއޭގެ ޑިރެކްޓާ ޖެނަރަލް މުއިމިނާ އަބޫބަކުރު ވިދާޅުވީ، އެޗްޕީއޭގެ ތަފާސް ހިސާބުތައް ދައްކާ ގޮތުގައި 2015 ވަނަ އަހަރާއި 2016 ވަނަ އަހަރު އެޗް1އެން1 އަށް ޓެސްޓްކުރި 475 ފަރާތުގެ ތެރެއިން ޕޮޒިޓިވްވެފައިވަނީ 16 ފަރާތެއް ކަމަށެވެ. މި އަހަރުގެ މިހާތަނަށް 208 މީހަކު އެޗް1އެން1އަށް ޓެސްޓްކޮށްފައިވާއިރު ޕޮޒިޓިވްވެފައިވަނީ 27 ފަރާތެއް ކަމަށެވެ.

އައިޖީއެމްއެޗްގެ ޑރ. މޫސާ ހުސެއިން ވިދާޅުވީ، ޕޮޒިޓިވް ގިނަ މީހުން މިހާރު ރަނގަޅުވެފައިވާ ކަމަށެވެ. އައިޖީއެމްއެޗްގެ އެޗް1އެން1އަށް ޕޮޒިޓިވްވެފައިވާ ހާލު ބޮޑު އެއްވެސް މީހަކަށް ފަރުވާދެމުން ނުދާ ކަމަށެވެ. ނަމަވެސް އޭޑީކޭ އައިސީޔޫގައި ތުއްތު ކުއްޖަކަށް ދަނީ ފަރުވާދެމުންނެވެ.

ޑރ. މޫސާ ވިދާޅުވީ، ފަރުވާ ދެނީ ރިޕޯޓަށް ނޫން ކަމަށާއި ބަލީގެ އަލާމަތްތަކަށް ކަމަށެވެ. އެހެންކަމުން ރިޕޯޓް ލިބޭއިރު ގިނަ ފަހަރަށް އެމީހާ ހުންނަނީ ބަލިން ރަނގަޅުވެފައި ކަމަށެވެ.

"އެއްވެސް ބަޔެއް، އިންފްލޭޒާ އެކަންޏެއް ނޫން، ޓްރީޓްކުރަނީ ރިޕޯޓަކަށް ނޫން، އެ ބަލި މީހާއަށް ކުރަނީ، ހުންނަ އަލާމަތްތަކަށް ބަލާފައި ޓްރީޓްކުރަނީ،" އައިޖީއެމްއެޗްގެ ޑރ. ނިޔާޝާ އިބްރާހިމް ވިދާޅުވި އެވެ.

އޭޑީކޭގެ ޑރ. އަބްދުﷲ ނިޔާފް ވިދާޅުވީ، އެޗް1އެން1 އަކީ މިހާރު ނުރައްކާތެރި ވިރަހެއް ނޫން ކަމަށެވެ. ކުރިން އެ ވައިރަސް ނުރައްކާތެރި ވައިރަކަށްވީ އަލަށް ފެތުރުނު ވައިރަހަކަށްވެފައި އެ ވައިރަހާ ދިފާއީވުމުގެ ނިޒާމު މީހާގެ ހަށިގަނޑުގައި ނުހުންނާތީ ކަމަށެވެ. ނަމަވެސް އެ ވައިރަހާ ދެކޮޅަށް މިހާރު އިންސާނުންގެ ހަށިގަނޑުގައި އެންޓިބޮޑީޒް ހުންނާނެ ކަމަށް ބެލެވޭ ކަމަށެވެ.

"އެޗް1އެން1 އައިޑެންޓިފައި ކުރެވޭ ބަލި މީހުން ވެސް ރަނގަޅު ކުރެވޭ، އަޅުގަނޑުމެންނަށް ސާންޕަލް ނަގާ ޓެސްޓްކުރަން މި ނަގާ މުއްދަތާ ހަމައަށް ދާން ވާއިރަށް ވެސް ބައެއް މީހުން ރަނގަޅުވޭ އެބަ،" ޑރ. ނިޔާފް ވިދާޅުވި އެވެ.

ޑރ. ނިޔާފް ވިދާޅުވީ، އެޗް1އެން1 އަށް ބަކި ހާއްސަ ފަރުވާއެއް ދޭން ނުޖެހޭ ކަމަށެވެ. އެޑްމިޓްކޮށްގެން ފަރުވާ ދެނީ ވެސް ސީރިއަސް އަލާމާތްތަކެއް ފެންނަ ފަރާތަކަށް ކަމަށެވެ.

"މިހާރު ފަރުވާ ކުރެވެމުންދާ ބައެއް ބަލި މީހުން އެބަ ތިބި ފުލޫ އާއި އިންފްލުއެންޒާ އެކި އަލާމަތްތަކާއެކު ދެއްކިފަ، އެމީހުންނަށް ފަރުވާ މި ދެވެނީ ހަމަ ގޭގައި ވެސް އިންފްލުއެންޒާއަށް ދެވޭ ފަރުވާ ކުރާ ގޮތަށް ހުމަށް ދެވޭ ބޭހަކުން ހުން މަޑުކޮށް، މަދު ފަހަރަކު ރޮގާ ބޭހެއް ދެވި، ގިނައިން ދިޔާ ތަކެތި ދީގެން، ބޭރު ތެރެއަށް ނިކުމެ އުޅުން ތަންކޮޅެއް މަދުކޮށް، އެގޮތަށް ފަރުވާކޮށްގެން މި ރަނގަޅު ވަނީ،" ނިޔާފް ވިދާޅުވި އެވެ.

ނިޔާފް ވިދާޅުވީ، ރާއްޖެއިން މި ފެންނަނީ މުޅިން އާ ބާވަތެއްގެ ބައްޔެއް ނޫން ކަމަށާއި ރާއްޖެއިން މި ފެންނަނީ ފެތުރެމުންދާ ބައްޔެއް ނަމަވެސް ފެތުރެމުންދާ ދިޔުމުގައި ނުރައްކާތެރި ހާލަތުގައި ތިބި މީހުން ނެތް ކަމަށެވެ. އަދި އާދައިގެ ފަރުވާތަކަކުން ވެސް މި ބައްޔަށް ޓްރީޓްކުރެވޭ ކަމަށެވެ. އޭގެއިތުރުން ނިޔާފް ވިދާޅުވީ، ހާލަތު ސީރިއަސްވާ ފަރާތަކަށް ވެސް ފަރުވާ ދޭނެ ގާބިލްކަން ރާއްޖޭގައި އެބަހުރި ކަމަށާއި އަތޮޅުތަކުގައި ތިއްބެވި ޑޮކްޓަރުންނަށް ވެސް ބައްޔާ ގުޅޭ މައުލޫމާތު ދެމުން އަންނަ ކަމަށެވެ.