ސްވައިން ފްލޫ ނުވަތަ އެޗް1އެން1 ގެ އަލާމަތްތައް ފެންނަ ،ހާލުބޮޑު ތުއްތު ކުއްޖަކަށް އޭޑީކޭ ހޮސްޕިޓަލްގައި ފަރުވާދެމުން އަންނަ ކަމަށް އެ ހޮސްޕިޓަލުން ހާމަކޮށްފި އެވެ.
ރާއްޖޭގައި ހުމާއި ރޯގާ ފެތުރެމުންދާތީ އެކަމުގެ މައުލޫމާތު ހާމަކުރުމަށް މިއަދު ހެލްތް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އޭޑީކޭގެ ޑރ. އަބްދުﷲ ނިޔާފް ވިދާޅުވީ، އޭޑީކޭގެ އައިސީޔޫގައި ސިވިއަ ރެސްޕިރޭޓަރީ އިންފެކްޝަނަކަށް ފަރުވާދެމުންދާ ކުއްޖެއް އެބަ އޮތް ކަމަށެވެ.
"އަޅުގަނޑުމެން އެ ކުއްޖާގެ އިންފްލެންޒާ ޓެސްޓްތަކެއް ވެސް ހަދަމުން މިދަނީ، އަދި ފްލޫގެ އަލާމަތްތައް ފެންނާތީ އެއަށް ވެސް ފަރުވާ ދެމުން މިދަނީ، އަޅުގަނޑު ނުދަންނަވާނަން ފުރާނައަށް ނުރައްކާތެރިވާ ހާލަތެއްގައޭ އޮތީ، އެކަމަކު އައިސީޔޫގައި ފަރުވާދޭ ހާލަތުގައި އޮތީ،" ނިޔާފް ވިދާޅުވި އެވެ.
ރާއްޖެއިން މި އަހަރު ތެރޭގައި 27 ފަރާތެއް އެޗް1އެން1 އަށް ޕޮޒިޓިވްވެފައިވާއިރު، އޭގެ ތެރެއިން ގިނަ މީހުން ވަނީ ރަނގަޅުވެފަ އެވެ. މި ވަގުތު އައިޖީއެމްއެޗްގެ އައިސީޔޫގައި އެ އަލާމަތްތައް ފެންނަ އެއްވެސް ފަރާތަކަށް ފަރުވާދެމުންނުދާ ކަމަށް އެ ހޮސްޕިޓަލުން މިއަދު ހާމަކުރި އެވެ.
ޑރ. ނިޔާފް ވިދާޅުވީ، އެޗް1އެން1 އަށް ވަކި ހާއްސަ ފަރުވާއެއް ދޭން ނުޖެހޭ ކަމަށެވެ. އެޑްމިޓްކޮށްގެން ފަރުވާ ދެނީ ވެސް ސީރިއަސް އަލާމާތްތަކެއް ފެންނަ ފަރާތަކަށް ކަމަށެވެ.
"މިހާރު ފަރުވާ ކުރެވެމުންދާ ބައެއް ބަލި މީހުން އެބަ ތިބި ފުލޫ އާއި އިންފްލުއެންޒާ އެކި އަލާމަތްތަކާއެކު ދެއްކިފަ، އެމީހުންނަށް ފަރުވާ މި ދެވެނީ ހަމަ ގޭގައި ވެސް އިންފްލުއެންޒާއަށް ދެވޭ ފަރުވާ ކުރާ ގޮތަށް ހުމަށް ދެވޭ ބޭހަކުން ހުން މަޑުކޮށް، މަދު ފަހަރަކު ރޮގާ ބޭހެއް ދެވި، ގިނައިން ދިޔާ ތަކެތި ދީގެން، ބޭރު ތެރެއަށް ނިކުމެ އުޅުން ތަންކޮޅެއް މަދުކޮށް، އެގޮތަށް ފަރުވާކޮށްގެން މި ރަނގަޅު ވަނީ،" ނިޔާފް ވިދާޅުވި އެވެ.
އެޗްޕީއޭއިން ވަނީ ހުން އައުމާއި ކަރާއި ބޮލުގައި ރިއްސުމުގެ އިތުރުން ގައިގައި ރިއްސުމާއި ހީކަރުވާފައި ވަރު ދެރަވުން އަދި ބޭރަށް ހިންގާ ހޮޑުލެވުން ފަދަ އަލާމަތްތައް ފެންނަނަމަ ލަސްނުކޮށް ޑޮކްޓަރަށް ދެއްކުމަށް އިލްތިމާސްކޮށްފަ އެވެ. މާލޭގައި ޑޮކްޓަރަށް ދެއްކުން ފަސޭހަ ކުރުމުގެ ގޮތުން އައިޖީއެމްއެޗްގައި ފްލޫ ކްލިނިކެއް ވަނީ ގާއިމުކޮށްފަ އެވެ.
ހުން އަދި އަރިދަފުސް ރޯގާ ޖެހިއްޖެ ނަމަ ގޭގައި ދެވޭނެ ފަރުވާ:
- ގިނަގިނައިން ދިޔާ އެއްޗެހި ބޭނުން ކުރުން
- އަރާމުކުރުން
- ކަޅުސައި، ލުނބޯ އިނގުރު އަދި މާމުއި އަޅައިގެން ބުއިންތައް ބޭނުން ކުރުން
- ހުން ގަދަ ނަމަ ފެން ހޭކުން
ސަމާލުކަން ދޭން ޖެހޭ ކަންކަން:
- އަރިދަފުސްރޯގާ ޖެހިއްޖެ ނަމަ ކެއްސާ، ކިނބިހި އަޅާއިރު އަނގަމަތީގަ އާއި ނޭފަތުގައި ކުޑަ ރުމާލެއް ނުވަތަ ޓިޝޫއެއް ފަދަ އެއްޗެއް އެޅުން.
- ސައިބޯނިލައިގެން އަތްދޮވުން ފަދަ ކަންކަމަށް ސަމާލުކަން ދިނުން.
- ރޯގާޖެހި ކެއްސާނަމަ މީހުން އެއްވެ އުޅޭ ތަންތަނަށް ނުދިއުން، ހާއްސަކޮށް މިފަދަ ތަންތަނަށް ކުޑަކުދިން ނުގެންދިއުން،
- ރޯގާޖެހިފައިވާ ނަމަ ކުޑަކުދިން ކައިރިއަށް ނުދިއުމާއި އެ ކުދިން އުރައި ނުހެދުން.
- ދުންފަތުގެ ދުމުން ކުޑަކުދިން ރައްކާތެރިކުރުމަށް ގޭތެރޭގައި ދުންފަތުގެ އިސްތިއުމާލްނުކުރުން.