ހުމުގެ ހާލަތު އިތުރަށް ގޯސްވަނީ، ސްކޫލްތައް ވެސް ބަންދުކޮށްފި

އެޗް1އެން1 ނުވަތަ ސްވައިން ފްލޫގެ ކޭސްތައް އިންތިހާއަށް އިތުރުވަމުންދާތީ، ރާއްޖޭގެ ހުރިހާ ސްކޫލެއް ބަންދުކުރުމަށް އެޑިއުކޭޝަން މިނިސްޓްރީން ނިންމައިފި އެވެ. އެޑިއުކޭޝަން މިނިސްޓްރީން މިގޮތަށް ނިންމާފައިވަނީ ހެލްތް ޕްރިޓެކްޝަން އެޖެންސީ (އެޗްޕީއޭ)އިން އެގޮތަށް ލަފާ ދިނުމުންނެވެ.

އެޑިއުކޭޝަން މިނިސްޓްރީން ބުނި ގޮތުގައި، މާދަމާއިން ފެށިގެން ރާއްޖޭގެ ހުރިހާ ސްކޫލްތަކެއް ބަންދުވާނެ އެވެ. މި ހަފުތާއަށްފަހު ދެން އޮތީ މިޓްޓާމް ބަންދު ކަމަށްވެފައި، މިޓްޓާމަށްފަހު ސްކޫލް ހުޅުވުމާމެދު ގޮތެއް ނިންމާނީ އޭރުގެ ހާލަތަށް ބަލާފައި ކަމަށް މިނިސްޓްރީ އިން މިރޭ ބުންޏެވެ. ސަރުކާރުގެ ހުރިހާ ސްކޫލްތަކެއް ބަންދުކޮށްފައިވާއިރު އަމިއްލަ ސްކޫލްތަކާއި ކޮލެޖްތައް ބަންދުކުރުމަށް އެ ފަރާތްތަކަށް ވެސް އެޗްޕީއޭއިން ވަނީ ލަފާދީފަ އެވެ.

ވައިރަލް ހުމާ ގުޅިގެން އުފައްދާފައިވާ ޓާސްކް ފޯހުން މިރޭ ބޭއްވި ޕްރެސްބްރީފިންގައި އޭޑީކޭގެ ޑޮކްޓަރު، ޑރ. އަބްދުﷲ ނިޔާފް ވިދާޅުވީ، ސްކޫލްތައް ބަންދުކުރަން ލަފާދީ ހުމުގެ ހާލަތު ލެވަލް ތިނަކަށް މަތިކުރަން ޖެހުނީ، މިއަދު ހެނދުނުގެ ފަހުން އިތުރު އާ ކޭސްތަކެއްއް ރިޕޯޓް ކުރެވި އޭގެ ތެރެއިން ސާމްޕަލްތަކެއް ސްވައިން ފްލޫއަށް ޕޮޒިޓިވްވެފައިވާތީ އެވެ. އަދި ކޭސްތަކުގެ އިތުރުވަމުން އަންނާތީ މިކަން ކޮންޓްރޯލް ކުރަން އިތުރު ފިޔަވަޅުތައް އަޅަން ޖެހޭ ކަމަށް ކޮމިޓީއަށް ފެނުނު ކަމަށް ވެސް ނިޔާފު ވިދާޅުވި އެވެ.

މިއަދުގެ ހެނދުނާ ހަމައަށް ޓެސްޓް ކުރި 200 މީހުންގެ ތެރެއިން 27 މީހެއްގެ ގައިން މި ވައިރަސް ފެނިފައިވާއިރު މިރެއާ ހަމަޔަށް، 51 މީހެއްގެ ގައިން ވަނީ އެޗް1އެން1 ފެނިފަ އެވެ. އޭގެ ތެރެއިން އެކަކު ހާލު ސީރިއަސްވެ މިހާރު ދަނީ އައިޖީއެމްއެޗްގެ އައިސީޔޫގައި ފަރުވާ ދެމުންނެވެ. އެމީހާއަކީ މާބަނޑު އަންހެނެކެވެ. މީގެ ގަޑިއިރެއްހާއިރު ކުރިން އޭނާ އެޗް1އެން1 އަށް ޕްޒިޓިވްވެފައިވާކަމުގެ ރިޕޯޓް ލިބިފައިވާއިރު އޭނާއަށް ފަރުވާ ދެމުން ދަނީ ވެންޓިލޭޓަރުގެ އެހީގަ އެވެ.

މީގެއިތުރުން މި މަހުގެ ހަތަރުވަނަ ދުވަހު މަރުވި 26 އަހަރުގެ ޒުވާނެއްގެ ހަށިގަނޑުން ނަގާފައިވާ ސާންޕަލްތަކުން ވެސް އެޗް1އެން1 ވައިރަސް ވަނީ ފެނިފަ އެވެ.

ހާލު ބޮޑުވެގެން ހދ. ކުޅުދުއްފުށިން އައިޖީއެމްއެޗްއަށް ގެނައި މާބަނޑު އަންހެނެއްގެ ގައިން ވެސް އެޗް1އެން1ގެ އަލާމަތްތައް ފެންނާތީ އޭނާ ޓެސްޓްކުރުމުގެ މަސައްކަތްތައް ދަނީ ކުރަމުންނެވެ. އޭނާގެ ހާލު ވެސް ސީރިއަސް އެވެ.

ޑރ. ނިޔާފް ވިދާޅުވީ، އަތޮޅުތަކުން ވެސް ބައެއް ކޭސްތައް ރިޕޯޓް ކޮށްފައިވާ ކަމަށެވެ. އެގޮތުން ބ. އަތޮޅާއި ހދ. ކުޅުދުއްފުށި އަދި ރ. އަލިފުށިން ބައެއް ކޭސްތައް ރިޕޯޓްކޮށްފައިވާ ކަމަށެވެ. މިހާތަނަށް އަތޮޅުތަކުން އެއްވެސް މީހެއް ހާލު ބޮޑުވެގެން މާލެ ގެންނަން ޖެހިފައިނުވީ ނަމަވެސް ކުރިއަށް އޮތްތާ ބަލިމީހުން މާލެ ގެންނަން ޖެހޭ ފަދަ ހާލަތަކަށް ގޮސްދާނެ ކަމަށް ވިދާޅުވި އެވެ.

ޑރ. ނިޔާފް ވިދާޅުވީ، އެޗް1އެން1 އަށް ފަރުވާ ދެވެނީ ހަމައެކަނި ވެކްސިނަކުން ނޫން ކަމަށާއި ނަމަވެސް އެޗް1އެން1 ނޫނީ ސްވައިން ފްލޫއަށް ޖަހާ އިންފްލްއެންޒާ ވެކްސިން ހައިރިސްކް މީހުންނަށް ޖެހުމަށް ނިންމާފައިވާ ކަމަށެވެ. މިހާރު ހުރީ އެ ވެކްސިނުގެ ވަރަށް ލިމިޓެޑް ސްޓޮކެއް ކަމަށާއި އިތުރަށް ރާއްޖެ ގެނައުމަށް ނިންމާފައިވާ ކަމަށް ވިދާޅުވި އެވެ. އެޗްޕީއޭ އިން ބުނި ގޮތުގައި އިންފްލްއެންޒާ ވެކްސިންގެ އުމުރު ކުރުވުމުގެ ސަބަބުން، އެއީ އެއްވެސް ގައުމެއްގައި އެހާ ގިނައަދަދަކަށް ރައްކާ ކޮށްފައި ހުންނަ އެއްޗެއް ނޫނެވެ. އެގޮތުން ރާއްޖެއަށް ވެސް ގެންނަނީ ކޮންމެ ހަމަހަކުން އެއް ފަހަރު ވެކްސިންގެ ވަރަށް ލިމިޓެޑް ސްޓޮކެއް ކަމަށް ނިޔާފު ވިދާޅުވި އެވެ.

"ވެކްސިން ދިނުމުގައި އެންމެ ފުރަތަމަ އިސްކަންދެނީ އަލާމާތްތައް ފެންނަ މީހުންގެ ތެރެއިން ހައިރިސްކް މީހުންނަށް. އޭގެ ތެރޭގައި އުމުރުން ދުވަސްވީ މީހުން ފަސް އަހަރު ނުވާ ކުޑަކުދިން އަދި މާބަނޑުމީހުން ހިމެނޭ،" ޑރ. ނިޔާފް ވިދާޅުވި އެވެ. "އިންފްލްއެންޒާއަށް ޖަހާ ވެކްސިންއަކީ އެހާ ސްޓޮކް ގިނައިން ލިބޭ އެއްޗެއް ނޫން. އެހެން ނަމަވެސް ރާއްޖެއަށް އިތުރު ވެކްސިން ލިބޭނެތޯ މި އަންނަނީ މަސައްކަތް ކުރަމުން. އެކުވެރި ދައުލަތްތަކުން ވެކްސިން ހޯދަން މީގެ ކުރިން ވެސް އެހީވި،"

ޑރ. ނިޔާފް ވިދާޅުވީ އެޗް1އެން1 ގެ ކޭސްތައް ވަރަށް ބޮޑަށް އިތުރުވަމުން އަންނަ ކަމަށާއި އިތުރަށް ވެސް ކޭސްތައް ފެނުން ވަރަށް އެކަށީގެންވާ ކަމަށެވެ. އެޗް1އެން1ގެ ހާލަތު މިހާރު ހުރި ގޮތުން ހާލަތު މި އޮތީ ލެވަލް ތިނެއްގައި ކަމަށާއި ލެވަލް ތިނަކީ ކޭސްތައް އެކި ސަރަހައްދުތަކުގައި ގިނަވުމުން ނެރޭ ހާލަތެއް ކަމަށެވެ. އިތުރު ކޭސްތައް ފެންނާނެ ކަމަށް ބެލެވޭއިރު މިކަން ހައްލުވާނެ ދުވަހެއް އަދި ދަތި ކަމަށް ޑރ. ނިޔާފް ވިދާޅުވި އެވެ.

މާލެ ފިޔަވައި ދެން އެންމެ ގިނައިން އެޗް1އެން1ގެ ކޭސްތައް ފެނިފައިވަނީ ހދ. ކުޅުދުއްފުއްޓާއި ރ. އަލިފުށިންނެވެ. ކޭސްތައް އިތުރުވަމުންދާތީ، ރާއްޖޭގެ ހުރިހާ ސްކޫލެއް ވަނީ ބަންދުކޮށްފަ އެވެ.