މި މަހުގެ ހަތަރު ވަނަ ދުވަހު މަރުވި ޒުވާނެއްގެ ގައިން ނެގި ސާންޕަލްއިން އެޗް1އެން1 ނުވަތަ ސްވައިން ފްލޫ ފެނިފައިވާ ކަމަށް ހެލްތް މިނިސްޓްރީން ހާމަކޮށްފި އެވެ. އޭގެ އިތުރުން އެޗް1އެން1 އަށް ޕްޒިޓިވްވެފައިވާ މާބަނޑު މީހެއް ވަނީ ސީރިއަސް ހާލަތަށް ގޮސްފައިވާތީ ފަރުވާ ދެމުންނެވެ.
މިރޭ ހެލްތް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އޭޑީކޭގެ، ޑރ. އަބްދުﷲ ނިޔާފް ވިދާޅުވީ، މިހާތަނަށް 251 މީހެއްގެ ސާންޕަލް ޓެސްޓްކުރެވިފައިވާއިރު 51 މީހެއްގެ ގައިން އެޗް1އެން1 ފެނިފައިވާ ކަމަށެވެ. އޭގެ ތެރޭގައި ހުޅުމާލެ ހޮސްޕިޓަލަށް ގެންގޮސް ފަހުން އައިޖީއެމްއެޗްގައި ފަރުވާ ދެމުން ދަނިކޮށް މި މަހުގެ ހަތަރުވަނަ ދުވަހު މަރުވި 26 އަހަރުގެ ޒުވާނާ ހިމެނޭ ކަމަށެވެ.
އޭގެ އިތުރުން މި މަހުގެ ފަސްވަނަ ދުވަހު ހޮސްޕިޓަލަށް ގެނައި މާބަނޑު އަންހެނެއްގެ ގައިން ވެސް އެޗް1އެން1 ފެނިފައިވާ ކަމަށާއި އެ ރިޕޯޓް ލިބިފައިވަނީ މީގެ ގަޑިއިރެއްހާއިރު ކުރިން ކަމަށް ޑރ. ނިޔާފް ވިދާޅުވި އެވެ. ޑރ. ނިޔާފް ވިދާޅުވީ، އައިޖީއެމްއެޗް އައިސީޔޫގައި އެމީހާއަށް ފަރުވާ ދެމުން އަންނައިރު އޭނާގެ ހާލު ސީރިއަސް ކަމަށެވެ. އޭނާ އޮތީ ވެންޓިލޭޓަރުގެ އެހީގަ އެވެ.
ޑރ. ނިޔާފް ވިދާޅުވީ، ހދ. ކުޅުދުއްފުށިން ގެނައި މާބަނޑު އަންހެނެއްގެ ފަރާތުން ވެސް އެޗް1އެން1 ގެ އަލާމަތްތައް ފެންނާތީ ޓެސްޓްތައް ހަދަމުންދާ ކަމަށެވެ. އެމީހާގެ ހާލު ވެސް ސީރިއަސް ކަމަށެވެ. އެ އަންހެން މީހާ ވެސް ވެންޓިލޭޓަރުގެ އެހީގައި ފަރުވާ ދޭން ޖެހިދާނެ ކަމަށް ވިދާޅުވި އެވެ. އޭގެ އިތުރުން ކުޑަ ކުއްޖެއްގެ ފަރާތުން ވެސް އަލާމަތްތައް ފެންނާތީ ޓެސްޓް ހެދުމުގެ މަސައްކަތް ކުރަމުންދާ ކަމަށް ޑރ. ވިދާޅުވި އެވެ.
މިއަދު ހެނދުނު ޑރ. ނިޔާފް ވަނީ އޭޑީކޭ ހޮސްޕިޓަލްގެ އައިސީޔޫގައި ވެސް ފްލޫގެ އަލާމަތްތައް ފެންނަ ހާލު ބޮޑުވެފައިވާ ކުޑަ ކުއްޖަކަށް ފަރުވާދެމުންދާ ކަމަށް ވިދާޅުވެފަ އެވެ. އެ ކުއްޖާ އޮތީ ސީރިއަސް ހާލެއްގައި ނަމަވެސް ފުރާނައަށް ނުރައްކާވާފަދަ ހާލަތެއްގައި ނޫން ކަމަށް ޑރ. ނިޔާފް އޭރު ވިދާޅުވެފައިވެ އެވެ.
ޑރ. ނިޔާފް ވިދާޅުވީ އެޗް1އެން1 ގެ ކޭސްތައް ވަރަށް ބޮޑަށް އިތުރުވަމުން އަންނަ ކަމަށާއި އިތުރަށް ވެސް ކޭސްތައް ފެނުން ވަރަށް އެކަށީގެންވާ ކަމަށެވެ. އެޗް1އެން1ގެ ހާލަތު މިހާރު ހުރި ގޮތުން ހާލަތު މި އޮތީ ލެވަލް ތިނެއްގައި ކަމަށާއި ލެވަލް ތިނަކީ ކޭސްތައް އެކި ސަރަހައްދުތަކުގައި ގިނަވުމުން ނެރޭ ހާލަތެއް ކަމަށް ވިދާޅުވި އެވެ. އިތުރު ކޭސްތައް ފެންނާނެ ކަމަށް ބެލެވޭއިރު މިކަން ހައްލުވާނެ ދުވަހެއް އަދި ބުނަން ދަތި ކަމަށް ޑރ. ވިދާޅުވި އެވެ.
މާލެ ފިޔަވައި ދެން އެންމެ ގިނައިން އެޗް1އެން1ގެ ކޭސްތައް ފެނިފައިވަނީ ހދ. ކުޅުދުއްފުއްޓާއި ރ. އަލިފުށިންނެވެ. ކޭސްތައް އިތުރުވަމުންދާތީ، ރާއްޖޭގެ ހުރިހާ ސްކޫލެއް ވަނީ މާދަމާއިން ފެށިގެން ކުރިއަށް މި އޮތް މިޑްޓާމް ނިމެންދެން ބަންދުކޮށްފަ އެވެ.