އެޗް1އެން1 ނުވަތަ ސްވައިން ފްލޫ އިންތިހާއަށް ފެތުރެމުންދާތީ ކޮންމެހެން ކުރަންޖެހޭ ދަތުރެއް ނޫނީ ނުކުރުމަށް ހެލްތް މިނިސްޓްރީން އިލްތިމާސްކޮށްފި އެވެ. މިގޮތަށް އިލްތިމާސްކޮށްފައިވަނީ ރޭ ބޭއްވި ނޫސްވެރިންގެ ބައްދަލުވުމުގަ އެވެ.
ރޭ ބޭއްވި ނޫސްވެރިންގެ ބައްދަލުވުމަކީ ހުން އިންތިހާއަށް ފެތުރެމުންދާތީ ރާއްޖޭގެ ހުރިހާ ސްކޫލެއް ބަންދުކުރުމަށް ނިންމައި އެކަން އިއުލާން ކުރުމަށް ބޭއްވި ބައްދަލުވުމެކެވެ. ސްކޫލްތައް ބަންދުކޮށްފައިވަނީ ބަލި އިތުރަށް ފެތުރުމުގެ މަގު ހަނިކުރުމަށެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން އޭޑީކޭގެ ޑރ. އަބްދުﷲ ނިޔާފް ވިދާޅުވީ، ސްކޫލްތައް ބަންދުކުރުމުން ވެސް އެ ހަނިކުރެވުނީ ބަލި ފެތުރުން ކުޑަކުރުމަށް މަގެއް ކަމަށާއި މީހުން އެއްވެ އުޅޭ ތަންތަނަށް ނުދިޔުމަކީ ވެސް އެޅިދާނެ ފިޔަވަޅެއް ކަމަށެވެ. އަދި ކޮންމެހެން ކުރަން ޖެހޭ ދަތުރުތައް ނޫން އެހެން ދަތުރުތައް މި ސްކޫލް ބަންދުގައި ނުކުރުމަށް ވެސް އެދޭ ކަމަށެވެ.
"ބަލި ފެތުރުމަށް މެދުވެރިވެދާނެ ހާލަތްތަކެއް ސްކޫލް ބަންދުގައި އައުން އެކަށީގެންވޭ އޭގެ ތެރޭގައި ރަށްރަށުން މާލެއަށް ދަތުރުކުރާ މީހުން އިތުރުވުމާއި ޗުއްޓީއަށް ރަށްރަށަށް ދަތުރުކުރާ މީހުން އިތުރުވުމާއި އެކި ސްކޫލް ނޫނީ އެކި ހަރަކާތްތަކުގައި ބައިވެރިވާ މީހުން އިތުރުވުމާއި އިމަޖެންސީ ނޫން ނަމަވެސް އެކި ކަހަލަ ފަރުވާ ހޯދުމަށް ބަންދުގައި މާލޭ ހޮސްޕިޓަލްތަކަށް އަންނަ މީހުން އިތުރުވާނެ ކަމަށް ބެލެވޭ ދުވަސްވަރެއް، އަޅުގަނޑުމެން މި ވަގުތު މަޝްވަރާ ނެރެން ކޮންމެހެން ކުރަން ޖެހޭ ދަތުރެއް ނޫނީ މަޑު ޖައްސާލަން، އެއީ މާލެއިން ރަށްރަށަށް ބަލި ފޯރުން މަދުކުރުން،" ޑރ. ނިޔާފް ވިދާޅުވި އެވެ.
ޑރ. ނިޔާފް ވިދާޅުވީ، އަތޮޅުތަކުން ވެސް ބައެއް ކޭސްތައް ރިޕޯޓް ކޮށްފައިވާ ކަމަށެވެ. އެގޮތުން ބ. އަތޮޅާއި ހދ. ކުޅުދުއްފުށި އަދި ރ. އަލިފުށިން ބައެއް ކޭސްތައް ރިޕޯޓްކޮށްފައިވާ ކަމަށެވެ. މިހާތަނަށް އަތޮޅުތަކުން އެއްވެސް މީހެއް ހާލު ބޮޑުވެގެން މާލެ ގެންނަން ޖެހިފައިނުވީ ނަމަވެސް ކުރިއަށް އޮތްތާ ބަލިމީހުން މާލެ ގެންނަން ޖެހޭ ފަދަ ހާލަތަކަށް ގޮސްދާނެ ކަމަށް ވިދާޅުވި އެވެ.
ޑރ. ނިޔާފް ވިދާޅުވީ އެޗް1އެން1 ގެ ކޭސްތައް ވަރަށް ބޮޑަށް އިތުރުވަމުން އަންނަ ކަމަށާއި އިތުރަށް ވެސް ކޭސްތައް ފެނުން ވަރަށް އެކަށީގެންވާ ކަމަށެވެ. އެޗް1އެން1ގެ ހާލަތު މިހާރު ހުރި ގޮތުން ހާލަތު މި އޮތީ ލެވަލް ތިނެއްގައި ކަމަށާއި ލެވަލް ތިނަކީ ކޭސްތައް އެކި ސަރަހައްދުތަކުގައި ގިނަވުމުން ނެރޭ ހާލަތެއް ކަމަށެވެ. އިތުރު ކޭސްތައް ފެންނާނެ ކަމަށް ބެލެވޭއިރު މިކަން ހައްލުވާނެ ދުވަހެއް އަދި ދަތި ކަމަށް ޑރ. ނިޔާފް ވިދާޅުވި އެވެ.
މާލެ ފިޔަވައި ދެން އެންމެ ގިނައިން އެޗް1އެން1ގެ ކޭސްތައް ފެނިފައިވަނީ ހދ. ކުޅުދުއްފުއްޓާއި ރ. އަލިފުށިންނެވެ. ކޭސްތައް އިތުރުވަމުންދާތީ، ރާއްޖޭގެ ހުރިހާ ސްކޫލެއް ވަނީ ބަންދުކޮށްފަ އެވެ.