އެޗް1އެން1 ނުވަތަ ސްވައިން ފްލޫ ޖެހި، ސީރިއަސް ހާލަތަކަށްދާ މީހާއަށް ވެސް ފަރުވާ ދޭނެ ގާބިލުކަން ރާއްޖޭގެ ހޮސްޕިޓަލްތަކުގައި އެބަހުރި ކަމަށް ހެލްތް މިނިސްޓްރީން ބުނެފި އެވެ. ސްވައިން ފްލޭ ޖެހި، ސީރިއަސް ހާލަތެއްގައިވާ މާބަނޑު އަންހެނަކަށް މިހާރު އައިޖީއެމްއެޗްގެ އައިސީޔޫގައި ދަނީ ފަރުވާ ދެމުންނެވެ.
އެޗް1އެން1 އާ ގުޅޭ ގޮތުން މައުލޫމާތު ދިނުމަށް ރޭ ހެލްތް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި އޭޑީކޭގެ ޑރ. އަބްދުﷲ ނިޔާފް ވިދާޅުވީ، މީހާ ސީރިއަސްވާ ކަމަށް ބުނަނީ ފުއްޕާމޭގެ މަސައްކަތް ވަރަށް ބޮޑަށް ދަށްވެ، ބަލި މީހާއަށް އެކަށީގެންވާ މިންވަރަށް ނޭވާ ނުލެވި އާޓިފިޝަލް ގޮތަކަށް އޮކްސިޖަން ފޯރުކޮށްދޭން ޖެހޭ ހާލަތަށް ދިޔުމުން ކަމަށެވެ. އެއީ، އެޑަލްޓް ރެސްޕިރޭޓަރީ ޑިސްޓްރަސް ސިންޑްރޮމް އެވެ.
އެފަދަ ހާލަތަކަށް މީހާ ދިޔުމުން އޭނާއަށް ފަރުވާ ދޭން ޖެހެނީ ޑރ. ނިޔާފް ވިދާޅުވި ގޮތުގައި، ވެންޓިލޭޓަރުގަ އެވެ. ނުވަތަ އެންޓި ވައިރަލް މެޑިޓޭޝަން ތެމިފްލޫ ދީގެންނެވެ. ނޫނީ އިތުރު އިންފެކްޝަނެއްގެ ބިރު ބޮޑުވެއްޖެނަމަ އެންޓިބަޔޮޓިކެއް ދީގެންނެވެ. އެ ހުރިހާ ފަރުވާއެއް ވެސް ރާއްޖެއިން ދެވޭނެ ކަމަށް ޑރ. ނިޔާފް ވިދާޅުވި އެވެ.
"އެޑަލްޓް ރެސްޕިރޭޓަރީ ޑިސްޓްރަސް ސިންޑްރޮމްއަކީ އޭގެ ޒާތުގައި މަރުވުމުގެ މިންވަރު ވަރަށް މަތީ މަރުހަލާއެއްގެ ބައްޔެއް، އެންމެ އެކަށީގެންވާ ފަރުވާދެމުން ދަނިކޮށް ވެސް ބަލިން ރަނގަޅު ނުވުމަކީ ވަރަށް އެކަށީގެންވާ ކަމެއް،" ޑރ. ނިޔާފް ވިދާޅުވި އެވެ.
ޑރ. ނިޔާފް ވިދާޅުވީ، އެޗް1އެން1އަށް ދޭ އިންފްލެންޒާ ވެކްސިން ރާއްޖެ ހުރި ނަމަވެސް ހުރީ ލިމިޓެޑް ސްޓޮކެއް ކަމަށެވެ. އެންމެ މުހިންމު މީހުންނަށް ނޫނީ އެ ވެކްސިން ބޭނުން ނުކުރާނެ ކަމަށް ވެސް ވިދާޅުވި އެވެ. ބަލި ޖެހިފައިވާ މީހުންނަށް ވެކްސިން ކޮންމެހެން ދޭން ނުޖެހޭ ކަމަށާއި އޭގެ ބަދަލުގައި ދޭން ޖެހެނީ ތެމިފްލޫ ބޭސް ކަމަށެވެ. އެ ބޭސް ރާއްޖޭގައި އެބަ ހުއްޓެވެ.
"ވެކްސިން ދިނުމުގައި އެންމެ ފުރަތަމަ އިސްކަންދެނީ އަލާމާތްތައް ފެންނަ މީހުންގެ ތެރެއިން ހައިރިސްކް މީހުންނަށް. އޭގެ ތެރޭގައި އުމުރުން ދުވަސްވީ މީހުން ފަސް އަހަރު ނުވާ ކުޑަކުދިން އަދި މާބަނޑުމީހުން ހިމެނޭ،" ޑރ. ނިޔާފް ވިދާޅުވި އެވެ. "އިންފްލްއެންޒާއަށް ޖަހާ ވެކްސިންއަކީ އެހާ ސްޓޮކް ގިނައިން ލިބޭ އެއްޗެއް ނޫން. އެހެން ނަމަވެސް ރާއްޖެއަށް އިތުރު ވެކްސިން ލިބޭނެތޯ މި އަންނަނީ މަސައްކަތް ކުރަމުން. އެކުވެރި ދައުލަތްތަކުން ވެކްސިން ހޯދަން މީގެ ކުރިން ވެސް އެހީވި،"
އައިޖީއެމްއެޗްގެ ޑރ. ނިޔާޝާ އިބްރާހިމް ވިދާޅުވީ، އެޗް1އެން1 އަކީ ފެތުރޭ ވައިރަހެއް ކަމަށްވީ ނަމަވެސް އެ ވައިރަސް ޕޮޒިޓިވްވާ މީހުން އެކަހެރިކޮށްލަން ނުޖެހޭ ކަމަށެވެ. ރިސްކް ބޮޑު ކެޓަގަރީގެ މީހުން ނޫނީ އެޗް1އެން1 ވައިރަހަށް ޕޮޒިޓިވްވެފައިވާ މީހަކާ އުޅުމަކީ ނުރައްކަލެއް އޮތް ކަމެއް ނޫން ކަމަށެވެ. ނަމަވެސް އެއީ ތިމާގެ ދިފާއީ ނިޒާމް ވަރުގަދަވެގެންދާނެ ކަމެއް ކަމަށެވެ. ރިސްކް ބޮޑު ކެޓަގަރީގެ މީހުންނަކީ މާބަނޑު މީހުންނާއި ފަސް އަހަރުން ދަށު ކުޑަ ކުދިން އަދި ދުވަސްވީ މީހުންނެވެ. އެފަދަ މީހުން އެޗް1އެން1އަށް ޕޮޒިޓިވްވެފައިވާ މީހުންނާ ގާތް ނުވުމަށް ޑރ. އިލްތިމާސްކުރެއްވި އެވެ.