ރާއްޖޭގައި ހުމާއި ރޮގާ އިންތިހާއަށް ފެތުރެމުންދާތީ، އައިޖީއެމްއެޗްގައި ހުޅުވި ފްލޫ ކްލިނިކަށްދާ މީހުން ގިނަވެ، އެތަނުގައި ބާރުބޮޑުވުމުގެ ސަބަބުން އައިޖީއެމްއެޗް ކައިރީ ހުންނަ ތާޖުއްދީން ސްކޫލްގައި ފްލޫ ކްލިނެކެއް ހުޅުވަން ނިންމައިފި އެވެ.
އައިޖީއެމްއެޗްއިން ބުނީ، ތާޖުއްދީން ސްކޫލްގައި ފްލޫ ކްލިނިކް ހުޅުވާނީ މިއަދު އިރުއޮއްސި ހައެއް ޖަހާއިރު ކަމަށެވެ. ތާޖުއްދީން ސްކޫލްގައި ހުޅުވާ ފްލޫ ކްލިނިކްގައި ޑޮކްޓަރަށް ދެއްކުމާއި ޓެސްޓްތައް ހެދުމުގެ ހިދުމަތް ދޭނެ އެވެ. ނަމަވެސް އެޑްމިޓްކޮށް ފަރުވާއެއް ނުދޭނެ އެވެ.
އައިޖީއެމްއެޗްއިން ބުނީ އެޑްމިޓްކޮށް ފަރުވާ ދޭން ޖެހޭ ބަލިމީހުން ގެންދާނީ އައިޖީއެމްއެޗްގައި ހުޅުވާފައިވާ ފްލޫ ކްލިނިކަަށް ކަމަށެވެ. އެ ނޫން ފަރާތްތަކަށް މިއަދުގެ ހައެއްގެ ފަހުން ހިދުމަތް ދޭނީ ތާޖުއްދީންގެ ފްލޫ ކްލިނިކުންނެވެ.
ފްލޫ ކްލިނިކް ހުޅުވުމަށް ވާން ޖެހޭ ތައްޔާރީތައް މިހާރު ދަނީ ވަމުންނެވެ. އެތަން 24 ގަޑިއިރަށް ހުޅުވާފައި ހުންނާނެ އެވެ.
އައިޖީއެމްއެޗްގައި ފްލޫ ކްލިނިކެއް މިދިޔަ ހޮނިހިރު ދުވަހު ހުޅުވިއިރު، ރާއްޖެއިން ސްވެއިން ފްލޫ ފެނުމާ ގުޅިގެން އެ ކްލިނިކަށް ދާ މީހުންގެ ނިސްބަތް ވަނީ ވަރަށް ބޮޑަށް އިތުރުވެފަ އެވެ.
ހުޅުމާލޭ ހޮސްޕިޓަލްގައި ވެސް ފްލޫ ކްލިނިކެއް ހުޅުވާފައިވާއިރު، އޭޑީކޭގައި ވެސް ހުޅުވުމަށް ދަނީ ތައްޔާރުވަމުންނެވެ.
މި އަހަރުގެ މިހާތަނަށް ޓެސްޓްކުރި 251 މީހެއްގެ ތެރެއިން 51 މީހެއްގެ ގައިން ވަނީ އެޗް1އެން1 ނުވަތަ ސްވައިން ފްލޫ ފެނިފަ އެވެ. އަދި އެ ބަލީގައި މާބަނޑު އަންހެނަކަށް އައިސީޔޫގައި ދަނީ ފަރުވާދެމުންނެވެ.