އެޗް1އެން1 ނުވަތަ ސްވައިން ފްލޫ ފެތުރެމުންދާތީ، ސަރުކާރުން ގެންދަނީ ހާލަތު މޮނީޓާކޮށް އަޅަންޖެހޭ ފިޔަވަޅުތައް އަޅަމުން ކަމަށް ހެލްތް މިނިސްޓަރު އަބްދުﷲ ނާޒިމް މިއަދު ވިދާޅުވެއްޖެ އެވެ.
އައިޖީއެމްއެޗްގައި ހުޅުވި ފްލޫ ކްލިނިކަށް ބާރުބޮޑުވުމާ ގުޅިގެން ތަނަވަސް ތަނެއްގައި އެ ހިދުމަތް ދިނުމަށް މިއަދު ތާޖުއްދީން ސްކޫލްގައި ހުޅުވި ފްލޫ ކްލިނިކަށް ޒިޔާރަތްކުރެއްވުމަށްފަހު ނޫސްވެރިންނަށް މައުލޫމާތު ދެއްވަމުން މިނިސްޓަރު ނާޒިމް ވިދާޅުވީ، ރާއްޖޭގައި ހުމާއި ރޯގާ ފެތުރެމުންދާތީ، ޓެކްނިކަލް ބޭފުޅުން ދެއްވާ ލަފަޔާ އިރުޝާދާ އެއްގޮތަށް ސަރުކާރުން ފިޔަވަޅުތައް އަޅަމުންދާ ކަމަށެވެ. ސިއްހަތު ޖަމިއްޔާ، ޑަބްލިއުއެޗްއޯއާ ވެސް މަޝްވަރާކުރަމުންދާ ކަމަށް ވިދާޅުވި އެވެ.
"ރައްޔިތުންނަށް އަޅުގަނޑު ދަންނަވާލަން ބޭނުން ވަނީ ސަރުކާރުން މިދަނީ މިކަން ވަރަށް ގާތުން ބަލާ މޮނީޓާކުރަމުންނޭ، އަދި މިކަމުގަ ކަމާބެހޭ ފަރާތްތަކުން ޓެކްނިކަލް ބޭފުޅުން ދެއްވާ އިރުޝާދުގެ ދަށުން އަޅަން ޖެހޭ ހުރިހާ ފިޔަވަޅެއް އަޅަމުންނޭ މިދަނީ، އަދި ޑަބްލިއުއެޗްއޯއާ ވެސް ކުރަން ޖެހޭ މަޝްވަރާތައް ކުރަމުންނޭ މިދަނީ، މިކަމަށް ބޭނުންވާ ބޭހާއި އެހެނިހެން ތަކެތި ވެސް އިރާދަކުރެއްވިއްޔާ މި ވަގުތަށް އެބަހުރި، އަދި އިތުރަށް ބޭނުންވާ ނަމަ އެ ހޯދުމުގެ އިންތިޒާމް ކުރެވި އެ މަސައްކަތް ކުރަމުން ދަނީ،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، މި ވަގުތު އެންމެ މުހިންމު ކަމަކީ ސަރުކާރުންނާއި މެޑިކަލް ބޭފުޅުން ދެއްވާ ލަފަޔާއި އިރުޝާދާ އެއްގޮތަށް އަމަލުކުރުން ކަމަށެވެ.
"މިކަމުގައި ސަރުކާރުން އަންގަވާ ގޮތަށް ހާއްސަކޮށް މެޑިކަލް ބޭފުޅުން ދެއްވާ ލަފަޔާއި އިރުޝާދާ އެއްގޮތަށް މީހުން އެއްވެ އުޅޭ ތަންތަނަށް ކުޑަ ކުދިން ނުގެން ދިޔުމާއި ކެއްސާ މިފަދަ ކަމެއް ދިމާވެއްޖެނަމަ އަނގަ ނިވާކޮށްގެން ކެއްސުންފަދަ ފިޔަވަޅުތައް އެޅުމަށް އެދެން،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، މިކަމަށް އެޓެންޑްވުމަށްޓަކައި ހެލްތް މިނިސްޓްރީ އާއި އައިޖީއެމްއެޗާއި އަދިވެސް ރާއްޖޭގައި ސިއްހީ ހިދުމަތް ފޯރުކޮށްދޭ އެހެނިހެން ތަންތައް ގުޅިގެން މަސައްކަތް ކުރަމުން ދަނީ ވަރަށް ގާތުން ކަމަށެވެ. ތާޖުއްދީން ސްކޫލްގައި ހުޅުވި ފްލޫ ކްލިނިކްގައި ވެސް ގިނަ ޑޮކްޓަރުންތަކެއް ހަރަކާތްތެރިވާނެ ކަމަށް މިނިސްޓަރު ވިދާޅުވި އެވެ.
"މި ބައްޔަކީ ވަރަށް އަވަހަށް ގައިން ގަޔަށް އަރާ ފެތުރޭ ބައްޔަކަށް ވާތީވެ އެޑްމިޓް ކުރަން ޖެހިއްޖެނަމަ ވަކިން އެޑްމިޓް ކުރެވޭނެ ގޮތް މިހާރު އައިޖީއެމްއެޗްގައި ގާއިމުކުރެވިފައިވަނީ،" މިނިސްޓަރު ވިދާޅުވި އެވެ.
ތާޖުއްދީން ސްކޫލްގެ އިތުރުން އޭޑީކޭ ހޮސްޕިޓަލާއި ހުޅުމާލެ ހޮސްޕިޓަލްގައި ވެސް ވަނީ ފްލޫ ކްލިނިކެއް ހުޅުވާފަ އެވެ. ފްލޫ ކްލިނިކަށް ދާ މީހުންގެ އަދަދު ގިނަވަމުން އަންނަކަން ފާހަގަކޮށްލެވެ އެވެ.
މި އަހަރުގެ މިހާތަނަށް އެޗް1އެން1ގެ އަލާމަތްތައް ފެނިގެން 251 މީހަކު ޓެސްޓް ކޮށްފައިވާއިރު އެ ވައިރަހަށް ޕޮޒިޓިވްވެފައިވަނީ 51 މީހެކެވެ. ވައިރަހަށް ޕޮޒިޓިވްވި އެކަކު މަރުވެފައިވާއިރު، ހާލު ދެރަވެގެން މާބަނޑު އަންހެނަކަށް އައިޖީއެމްއެޗްގައި ގެންދަނީ ފަރުވާދެމުންނެވެ.