އިސް ނެގުމުގެ ފުރުސަތަކާއި ބާރުވެރިކަން އަންހެނުންނަށް ލިބެން ޖެހޭ ކަމަށާއި އެ ފުރުސަތުތައް ނުލިބޭހާ ނަމަ ފުރިހަމަ ގޮތަކަށް މުޖުތަމައު ބައްޓަންކޮށް ތަރައްގީ ހޯދަން ދަތިވާނެ ކަމަށް ޖެންޑާ މިނިސްޓަރު ޒެނީޝާ ޝަހީދު ޒަކީ ވިދާޅުވެއްޖެ އެވެ. އެ ކަމަނާ މިހެން ވިދާޅުވީ އެމެރިކާގެ ނިއުޔޯކުގައި ކުރިއަށްދާ ކޮމިޝަން އޮން ދަ ސްޓޭޓަސް އޮފް ވިމެންގެ ބައްދަލުވުމުގައި ވާހަކަފުޅު ދައްކަވަމުންނެވެ.
އަންހެނުންނާއި އަންހެން ކުދިންނަށް ހުރި ގޮންޖެހުންތައް ބަލައި މަޝްވަރާ ކުރާ އެ ކޮމިޝަންގެ 61 ވަނަ ބައްދަލު ވުމުގައި ކުރު ކުރުކޮށް މިނިސްޓަރު ދެއްވި ސްޕީޗުގައި އެކަމަނާ ވިދާޅުވީ މުޖުތަމައެއް ދުޅަހެޔޮކޮށް ބައްޓަންކޮށް ކުރިއަރުވައި ތަރައްގީއަށް ވާސިލުވެވެނީ އެ މުޖުތަމައެއްގެ އަންހެނުންނަށް ހަމަހަމަ ފުރުސަތުތައް ހޯދައިދީގެން ކަމަށެވެ. އަދި ވިދާޅުވީ އަންހެނުންނަށް ލިބިދޭންޖެހޭ އެފަދަ ފުރުސަތުތަކާއި ހައްގުތައް ހޯދައި ދޭން ބާރު އަޅަން ޖެހޭ ކަމަށެވެ.
މި މަހުގެ 24 އާ ހަމައަށް ކުރިޔަށްދާ ބައްދަލުވުމުގައި މިނިސްޓަރު ވިދާޅުވީ ޒުންމާދާރުކަމާއެކު މަސްއޫލިއްޔަތު އަދާކުރުމުގެ ފުރުސަތުތަކާއި، ބާރުވެރިކަން އަންހެނުންނަށް ނުލިބޭހާހިނދަކު މުޖުތަމައެއް ބަދަލުކޮށް ތަރައްގީ ހާސިލު ކުރުމުގައި ދަތިވާނެ ކަމަށާއި މިހާރު ދިވެހި ރާއްޖޭގައި އަންހެނުން އެކި ދާއިރާތަކުގައި އަދާކުރަމުންދާ ރޯލު ބައިނަލްއަގުވާމީ ފެންވަރުގައި ފާހަގަކުރުން ވެސް މުހިންމު ކަމަށެވެ.
ޒެނީޝާ ތަަގުރީރު ކުރެއްވި ބައްދަލުވުމުގެ ޝިއާރަކީ، "ބަދަލުވަމުން އަންނަ މަސައްކަތުގެ މާހައުލުގައި އަންހެނުންގެ އިގުތިސޯދީ ފުދުންތެރިކަން އިތުރުކުރުން" އެވެ. ޖިންސުގެ ހަމަހަމަކަމާއި އަންހެނުން ބާރުވެރިކުރުމުގެ އިތުރުން، އަންހެނަކަށްވީތީ މުޖުތަމައުގައި ގެންގުޅޭ ތަފާތުކުރުންތައް ނައްތާލުމަށް އެކި ގައުމުތަކުން ކުރާ މަސައްކަތްތައް ޙިއްސާކުރުމަށް، ޔޫއެއްންގައި ކޮންމެ އަހަރަކުވެސް މި ބައްދަލުވުން ބާއްވަ އެވެ.