ފަހު ވަގުތު ގެރީ ކޭހިލް ކާމިޔާބު ކޮށްދިން ލަނޑާއެކު އިނގިރޭސި ޕްރިމިއާ ލީގުގައި ރޭ ސްޓޯކް ސިޓީ އަތުން 2-1 އިން މޮޅުވެ، ޗެލްސީ ލީގު ޗެމްޕިއަންކަމާ ދިމާލަށް އިތުރު ފިޔަވަޅެއް އަޅައިފި އެވެ. ސްޓޯކްގެ ދަނޑުގައި ކުޅުނު މެޗުގެ 13 ވަނަ މިނިޓުގައި ޗެލްސީގެ ވިލިއަން އެ ޓީމަށް ލީޑު ހޯދައިދީފައިވަނިކޮށް، ސްޓޯކަށް ލިބުނު ޕެނަލްޓީއަކުން ނަތީޖާ އެއްވަރުކޮށްދިނީ ޖޯން ވޯލްޓާސް އެވެ.
އެކަމަކު މެޗުގެ ފުރަތަމަ ވަގުތު ހަމަވާން ތިން މިނިޓަށްވެފައި ވަނިކޮށް، ކޭހިލް ވަނީ ލަނޑެއް ޖަހައި ޗެލްސީ އަށް މުހިންމު ތިން ޕޮއިންޓް ހޯދައިދީފަ އެވެ. މި މޮޅާއެކު ތާވަލްގެ އެއްވަނައިގައި އޮތް ޗެލްސީން ވަނީ 13 ޕޮއިންޓްގެ ލީޑެއް ހޯދައިފަ އެވެ.
"އަހަރަމެންނަށް އެނގޭ މި މެޗު އުނދަގޫވާނެކަން،" މެޗަށް ފަހު ޗެލްސީގެ ކޯޗު އެންޓޯނިއޯ ކޮންޓޭ ބުންޏެވެ. "މިއީ ވަރަށް މުހިންމު މޮޅެއް. މިއަދު އަހަރެމެން މި މޮޅުވީ ވަރަށް ވަރުގަދަ ޓީމެއްގެ އަތުން."
އިނގިރޭސި ލީގުގައި އިއްޔެ ކުޅުނު އެހެން މެޗުތަކަށް ބަލާލާއިރު، އާސެނަލް ވަނީ ރަށުން ބޭރުގައި ވެސްޓް ބްރޮމް އަތުން 3-1 އިން ބަލިވެފަ އެވެ. ވޮޓްފޯޑް އަތުން 1-0 އިން ކްރިސްޓަލް ޕެލެސް މޮޅުވިއިރު، ހަލް ސިޓީ އަތުން އެވަޓަން މޮޅުވީ 4-0 އިިންނެވެ. ވެސްޓް ހޭމް އަތުން ލެސްޓާ ސިޓީ 3-2 އިން މޮޅުވިއިރު، ސްވަންސީ އަތުން ބޯންމަތު މޮޅުވީ 2-0 އިންނެވެ. ސަންޑަލޭންޑާއި ބާންލީ ބައްދަލުކުރި މެޗު ނިމުނީ ލަނޑެއް ނުޖެހި އެއްވަރުވެގެނެވެ.
