ބާލިންގެ ޓްރެފިކް މައިތިރި ކުރަނީ ބައިސްކަލް!

(ޖަރުމަންގެ، ބާލިން އިން: މުހައްމަދު އަފްރާހު) -- ގިނަ ގައުމުތަކުގެ ވެރިރަށަކީ އެންމެ މީހުން ގިނަ ބައިބޯ ސަހަރަށްވެ އެވެ. އެހެންވެ ގައުމުގެ "ކެޕިޓަލް" ވަނީ އެންމެ ތޮއްޖެހުން ބޮޑު އެއް ތަނަށެވެ. ހާއްސަކޮށް މަގު ތަކުން ފެންނާނީ ހަމަބޮލި ކަމެވެ. ނަމަވެސް ޖަރުމަނުގެ ވެރި މިރަށް، ބާލިންގެ މަގުތަކުން މި ފެންނަނީ މުޅިން ތަފާތު ކަމެކެވެ. ސަބަބަކީ ކޮބައި ހެއްޔެވެ؟ މީހުން މަދީ ހެއްޔެވެ؟ ނޫނީ ޓްރެފިކް ބަލަހައްޓާ އުސޫލުތައް ރަނގަޅީ ބާއެވެ؟ އެނގޭ ކަމަކީ ބާލިންގެ މަގުތަކުން މިހިރަ ފެންނަ މަންޒަރު ވަރަށް ތަފާތު ކަމެވެ.

ފާހަގަވި އެއް ކަމަކީ މިއީ އެވެ. ވެރިރަށް ބާލިންގެ އާބާދީގައި 3.5 މިލިއަން މީހުން އުޅުނު ނަމަވެސް އެތަނުގެ މުނިސިޕަލް ހިދުމަތްތައް ބަލަހައްޓާލެއް ފުރިހަމަ ކަމެވެ. ހާއްސަކޮށް ޓްރެފިކް ބެލެހެއްޓުމުގެ ނިޒާމު ވަރަށް ހަރުދަނާ ކަމެވެ. މީގެ އިތުރުން ހާއްސަ އަނެއް ކަމަކީ އެއްގަމު އުޅަނދުތައް ފެންނަލެއް މަދުވުމެވެ. ކޮންމެ މީހަކުގެ އަތުގައި ކާރެއް ނެތް ނަމަވެސް، ގިނަ މީހުންގެ އަތުގައި ބައިސްކަލް ހުރެ އެވެ. އެހެންވެ ސްކޫލް ކުދިންނާއި މެދު އުމުރުގެ މީހުން އުޅޭތަން މިފެންނަނީ ބައިސްކަލްގަ އެވެ. ސްކޫލުން ނިންމާލައި ބައެއް ކުދިން އެކަނިމާއެކަނި މަގުތަކުގައި ރޯލާ ސްކޭޓާގައި ގެއަށްދާ މަންޒަރު ހިތް ގައިމެވެ.

ދުނިޔޭގައި އޮތް އެންމެ ތާރީހީ އެއް ސަހަރު ކަމަށްވާ، ބާލިންގެ ޓްރެފިކް ބަލަހައްޓަން ފުލުހުންނެއް ނުތިބެ އެވެ. އެކަމަކު ޖަރުމަނުގެ ވަކި ފަރުދުންގެ ޓްރެފިކް ސައިންތަކަށް ވަރަށް ބޮޑަށް ސަމާލުކަމެއް ދޭނެ އެވެ. ހާއްސަކޮށް މަގު ހުރަސް ކުރުމުގެ ކަންތައްތަކުގަ އެވެ. ޓްރެފިކް ލައިޓް ދިއްލުމުން ނޫނީ ހުރަސް ކުރުމާއި އުޅަނދު ފަހަރު ދުއްވާލުން މިއީ އެ މީހުން ނުކުރާނެ ކަމެވެ. އެ މަންޒަރު އެއްގޮތަކަށް ވެސް ނުފެނެ އެވެ. އެމީހުން އެކަން ދެކެނީ ވަކިވަކި ފަރުދުންގެ ޒިންމާއެއްގެ ގޮތުގަ އެވެ.

އެއްގަމު އިންޖީނުލީ އުޅަނދުތައް މަދުވުމުގެ ނަތީޖާއަކީ ބައިސްކަލްގައި އުޅޭ މީހުން ގިނަވުމެވެ. ބާލިންގެ މަގުތަކުގައި ބައިސްކަލް ދުއްވަން ހާއްސަ ލައިން ތަކެއް ހުރެ އެވެ. މިއީ މި ގައުމުގެ ހާއްސަކޮށް ބާލިންގެ އެންމެ ހާއްސަ އެއް ކަމެވެ. މަގުތަކުގައި މީހުން ހިނގާ ސަރަހައްދާ އިން ވެގެން މަގަށްވާ ގޮތަށް ހުންނަ ބައިސްކަލް ދުއްވުމަށް ހާއްސަ ސަރަހައްދަކީ މި ގައުމުގެ ދަތުރުފަތުރުގެ އެންމެ މުހިންމު އެއްބަ އެވެ.

ޖަރުމަނުގެ ނޭޝަނަލް ހައި ސްޕީޑް ނެޓްވޯކް ހައިވޭތަކާއެކުގައި މި ބައިސްކަލް ލޭންތަކުގެ ބޭނުން ކުރާ މީހުން ވެސް ވަރަށް ގިނަ އެވެ. މީގެ ފަސޭހަ ބާލިންގެ ރައްޔިތުންނަށް ލިބެ އެވެ. އެހެންވެ މި ސިޓީގެ ގިނަ ހޮޓާތަކުން ވެސް ބައިސްކަލް ކުއްޔަށް ދޫކުރެ އެވެ. ގަޑިއަކަށް 12 ޔޫރޯ އަށް ދޫކުރާ މި ބައިސްކަލްތައް ރަށުގެ ތެރޭގެ އެކި ހިސާބުތަކުގައި ބެހެއްޓުމަށް ހާއްސަ ބައިސްކަލް ސްޓޭންޑްތައް ހަދާފައިވެ އެވެ.

ބައިސްކަލް ލޭން ތަކުގެ ސަބަބުން މޮޓޯ ސައިކަލްގެ ބޭނުން ކެނޑެ އެވެ. މި ސިޓީގައި މިހެން މިކަން ވާން ދިމާވާ އަނެއް ސަބަބަކީ ސިޓީގެ ޕަބްލިކް ޓްރާންސްޕޯޓް ވިއުގައިގެ ވަރުގަދަ ކަމެވެ. ހައި ސްޕީޑް ރޭލްތަކާއި ބަހުގެ ފުރިހަމަ ހިދުމަތަކަށް އިތުރު ފުރިހަމަ ކަމެއް ގެނެސް ދެނީ ބަރާބަރު ގަޑިއަށް އަންނަ ޓެކްސީ ތަކެވެ. އެކަމަށް ހާއްސަ މޮބައިލް އެޕް ތަކުން ޓެކްސީ އަށް ގޮވާލާތާ ހަތަރު ފަސް މިނެޓުގެ ތެރޭގައި އޮންނަނީ ދޮރުމަތީގަ އެވެ.

އެތައް މިލިއަން މީހުނެއް ދިރިއުޅޭ ވެރިރަށް ބާލިންގެ މަގުތަކުން ފެނުނީ މަޑުމައިތިރި ކަމެވެ. ހާއްސަކޮށް ބައިސްކަލްގައި މިއެންމެން އުޅޭތަން ފެނުމުން މިކަން ރާއްޖޭގައި ހާއްސަކޮށް މާލޭގައި ވާނެނަމައޭ ހިތަށް އަރަ އެވެ. އެވަރަށް ބާލިންގެ ޓްރެފިކްގެ ބޮޑު ބައެއްގެ ހިސާ ބައިސްކަލްތައް ކުރެ އެވެ.