މެންޗެސްޓާ ޔުނައިޓެޑްގެ ޖަރުމަން މިޑްފީލްޑަރު ބަސްޓިއަން ޝްވައިންސްޓައިގާ އެމެރިކާ ލީގުގެ ޝިކާގޯ ފަޔާ އަށް ދޫކޮށްލަން ޔުނައިޓެޑުން އެއްބަސްވެއްޖެ އެވެ.
އެމެރިކާގެ މީޑިއާ ރިޕޯޓްތަކުން ބުނާގޮތުގައި ޝްވައިންސްޓައިގާގެ ޓްރާންސްފާ އަށް ދެ ކްލަބުން އިއްޔެ އެއްބަސްވުމުން، ޝްވައިންސްޓައިގާ ވަނީ ޝިކާގޯ ފަޔާއާއެކު އެއް އަހަރު ދުވަހުގެ އެއްބަސްވުމެއް ހަދައިފަ އެވެ.
ޖަރުމަންގެ ގައުމީ ޓީމުގެ ކުރީގެ ކެޕްޓަން ޝްވައިންސްޓައިގާ ،32، ބުނީ ޔުނައިޓެޑް ދޫކޮށްލަންޖެހޭތީ ހިތާމަކުރާ ކަމަށެވެ. އަދި ޝިކާގޯ ފަޔާ އަށް ބަދަލުވުމުގެ މަގު ފަހިކޮށްދިނީތީ ޔުނައިޓެޑަށް ޝުކުރު އަދާކުރާ ކަމަށެވެ.
ޖަރުމަނާއެކު 2014 ވަނަ އަހަރު ވޯލްޑް ކަޕް ކާމިޔާބުކުރި ޝްވައިންސްޓައިގާ ޔުނައިޓެޑަށް ބަދަލުވީ 2015 ވަނަ އަހަރެވެ. ލުއީ ވެން ހާލްގެ ކޯޗުކަމުގެ ދަށުގައި ޔުނައިޓެޑަށް ބަދަލުވި ޝްވައިންޓައިގާ އަކީ ކުރިން ދުނިޔޭގެ އެންމެ މޮޅު އެއް މިޑްފީލްޑަރުންގެ ތެރޭގައި ހިމެނޭ ކުޅުންތެރިޔެކެވެ. އެކަމަކު ޔުނައިޓެޑްގެ ޝްވައިންސްޓައިގާ އަށް ތަފާތު ދެއްކޭ ގޮތެއްނުވި އެވެ.
މި ސީޒަންގައި ޖޯސޭ މޮރީނިއޯ ޔުނައިޓެޑްގެ ކޯޗުކަމާ ހަވާލުވުމުން، ޝްވައިންސްޓައިގާ އަށް ޓީމުން ޖާގަ ހޯދަން އުނދަގޫވި އެވެ. އެންމެ ފަހުން ޝްވައިންސްޓައިގާ ޔުނައިޓެޑަށް ކުޅުނު މެޗަކީ މިދިޔަ މަހުގެ 22 ވަނަ ދުވަހު ޔޫރޮޕާ ލީގުގައި ސެން އެޓިއެންއާ ދެކޮޅަށް ޔުނައިޓެޑް ކުޅުނު މެޗެވެ. އެ މެޗުގައި ވެސް އޭނާ އެރީ ބަދަލު ކުޅުންތެރިޔެއްގެ ގޮތުގަ އެވެ.
ސްވާސްޓައިގާ