ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދާ ދެކޮޅަށް ވޯޓު ދެއްވުމަށް ޕީޕީއެމް ޕީޖީ ގްރޫޕްގެ މެންބަރަކު މަސައްކަތް ކުރައްވާނަމަ އެއީ އަމިއްލައަށް ހޫނު ފެނުގައި އަތްލުން ކަމަށް ދަގެނތީ ދާއިރާގެ މެމްބަރު އިލްހާމް އަހުމަދު ވިދާޅުވެއްޖެ އެވެ.
"މަވެސް ޕީޕީއެމް" ގެ ނަމުގައި މިއަދު ދަރުބާރުގޭގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ޕީޕީއެމްގެ ޕީޖީ ގްރޫޕްގެ ޑެޕިއުޓީ ލީޑަރު އިލްހާމް ވިދާޅުވީ، ޕީޕީއެމްގެ އެމްޕީން މަސީހާ ދެކޮޅަށް ވޯޓު ދެއްވަން ވިސްނަވާނަމަ އެއީ ގޯހެއް ކަމަށެވެ. އަދި އެއީ ހޫނު ފެނުގައި އަތްލުން ފަދަ ކަމެއް ކަމަށެވެ.
"ހޫނު ފެނަށް އަތްލާން ބޭނުން ނޫނިއްޔާ ވޯޓު ނުދެއްވާ، އަޅުގަނޑުމެންގެ ތެރެއިން ވެސް ވޯޓު ދެއްވާނީ ހޫނު ފެނަށް އަތްލާން ބޭނުން ވަންޏާ، ހޫނު ފެން އެޅޭނެ، އަޅުގަނޑުމެންގެ ތެރެއިން އެކަން ކުރާ މީހުންގެ އަތް މައްޗަށް ވެސް ހޫނު ފެން އެޅޭނެ،" އިލްހާމް ވިދާޅުވި އެވެ. "ހޫނު ފެން އެޅުނީމަ މެސެޖް ކޮށްލާނެ، އެކަމަކު އެ ގަޑީގައި ނޯ ނޯ،"
އިލްހާމް ވިދާޅުވީ، މަސީހާ ދެކޮޅަށް ވޯޓު ނެގުމަށް ބަޔަކު މަސައްކަތް ކުރަމުންދާއިރު އެކަން ކުރަން ބޭނުންވެގެން އުޅޭ ފަރާތްތަކުން ހިސާބު ޖަހަނީ ގޯސްކޮށް ކަމަށެވެ. އަދި ވިދާޅުވީ މަސީހުގެ އިތުބާރު ނެތް ކަމުގެ ވޯޓު ކާމިޔާބު ކުރުމަކީ ވާނެ ކަމެއް ނޫން ކަމަށާއި މަސީހާ ދެކޮޅަށް ޕީޕީއެމްގެ އެއްވެސް އެމްޕީއަކު ވޯޓް ނުދެއްވާނެ ކަމަށެވެ.
"މަސީހުގެ އިތުބާރު ނެތް ކަމަކަށް ފާހެއް ނުވާނެ، އެކަމެއް ނުވާނެ، އަޅުގަނޑުމެން ނުދޭނަން އެ ޖާގައެއް، އެމަނިކުފާނާ ދެކޮޅަށް ޕީޕީއެމްގެ އެއްވެސް މެންބަރަކު ވޯޓެއް ނުދެއްވާނެ،" އިލްހާމް ވިދާޅުވި އެވެ.
އިލްހާމް ވިދާޅުވީ، އޯޑިތަކެއް ލީކްކޮށް މީހުންގެ އަގު ވައްޓާލުމަށް މަސައްކަތް ކުރަމުންދާ ކަމަށާއި އެކަމަކު ވެސް ހާސިލުކުރަން ވިސްނާފައިވާ އެއްވެސް ކަމެއް ހާސިލު ނުވާނެ ކަމަށެވެ.
"އެ އޯޑިއޯތަކަކުން ނުފެދޭ، މޭޒުމަތީގަ ދައްކާނެ ވަރަށް ގިނަ ވާހަކަތައް. މޭޒުމަތީ ދައްކާ ވާހަކައާ އަމަލުކުރާ ގޮތާ ވަރަށް ތަފާތުވާނެ، އަޅުގަނޑުމެން މިތިބީ ރައީސް ޔާމީންގެ ފަހަތްޕުޅުގައި އެމަނިކުފާނަށް ދެރަވާ އެއްވެސް ކަމެއް މި ޕީޖީ ގުރޫޕްގެ އެއްވެސް މެންބަރަކު ނުކުރާނެ،" އިލްހާމް ވިދާޅުވި އެވެ.
އިލްހާމް ވިދާޅުވީ، ވޯޓު ގެއްލޭނީ ވެސް އިދިކޮޅު ފަރާތްތަކުގެ މެންބަރުންނަށް ކަމަށާއި އެ މަންޒަރު ވެސް ދައްކާނެ ކަމަށެވެ.
މަސީހުގެ މައްޗަށް ނަގާ ވޯޓް އެޖެންޑާ ކޮށްފައި ވަނީ މި މަހުގެ 27 އަށެވެ. އެ ވޯޓް ނެގުމަށް މަޖިލީހަށް މައްސަލަ ވައްދައި އެކަމުގައި އިސްކޮށް އުޅުއްވަނީ ދިއްގަރު ދާއިރާގެ މެންބަރު ފާރިސް މައުމޫނެވެ.