އިންގްލެންޑްގެ ގައުމީ ފުޓްބޯޅަ ޓީމު ކުރިން ކުޅުނީ "ރަގްބީ ޓީމެއްހެން" ކަމަށާއި އިންގްލެންޑްގެ ގައުމީ ޓީމާމެދު މިހާރު ފޮނި އުންމީދުތަކެއް ކުރެވެނީ އެ ޓީމުގެ ކުޅުން ބަދަލުވުމުން ކަމަށް ޖަރުމަންގެ ފޯވަޑް ލޫކަސް ޕޮޑޮލްސްކީ ބުނެފި އެވެ.
ޕޮޑޮލްސްކީ ޖަރުމަންގެ ގައުމީ ޓީމަށް ކުޅުން ހުއްޓާލީ ބުދު ދުވަހުގެ ރޭ އިންގްލެންޑާއި ޖަރުމަން ބައްދަލުކުރި އެކުވެރިކަމުގެ މެޗުގަ އެވެ. އެ މެޗުގެ ހަމައެކަނި ލަނޑު ޖެހީ ކުރިން އާސެނަލް އަށް ކުޅުނު ފޯވަޑް ޕޮޑޮލްސްކީ އެވެ.
ޕޮޑޮލްސްކީ ބުނީ އިންގްލެންޑްގައި މިހާރު ރަނގަޅު ކޯޗަކާއި ރަނގަޅު ކުޅުންތެރިން އެބަތިބި ކަމަށާއި ކުރިއަށް އޮތް ތަނުގައި އިންގްލެންޑްގެ ޓީމު ރަނގަޅުވާނެ ކަމަށެވެ.
"ކުރިން އިންގްލެންޑް ކުޅޭނީ ރަގްބީ ޓީމެއްހެން. އެކަމަކު މިހާރު އިންގްލެންޑްގައި ރަނގަޅު ޓީމެއް އެބައޮތް. ރަނގަޅު ކޯޗަކާއި ރަނގަޅު ކުޅުންތެރިން އެބަތިބި،" ޕޮޑޮލްސްކީ ބުންޏެވެ. "ކުރިން މުބާރާތެއްގައި ވާދަކުރާއިރު، އިންގްލެންޑްގެ ކުޅުންތެރިން ތިބޭނީ ފިނިވެފައި. އަންނަ އަަހަރުގެ ވޯލްޑަ ކަޕްގައި އިންގްލެންޑްގެ ކުޅުން ބަލާލާ ހިތްވޭ."
ޖަރުމަނާ ދެކޮޅަށް ކުޅުނު މެޗުގައި އިންގްލެންޑްގެ ކޯޗު ގެރެތު ސައުތުގޭޓް ބޭނުންކުރި ފޯމޭޝަންގައި ތިބީ ތިން ޑިފެންޑަރުންނެވެ. މިއީ އިންގްލެންޑްގެ ގައުމީ ޓީމުން 2006 ވަނަ އަހަރުގެ ފަހުން ތިން ޑިފެންޑަރުން ލައިގެން ކުޅޭ ފޯމޭޝަނެއްގައި ކުޅުނު ފުރަތަމަ ފަހަރެވެ.
ޕޮޑޮލްސްކީގެ ވަދާއި މެޗުގައި އޭނާ އަށް ހާއްސަކޮށްގެން ވަރަށް ގިނަ ކަންތައްތައް ކުރި އެވެ. ސަޕޯޓަރުންނާ މުހާތަބުކޮށް، ވާހަކަދެއްކުމުގެ ފުރުސަތު ވެސް ޕޮޑޮލްސްކީ އަށްދިނެވެ.
ޕޮޑޮލްސްކީ ބުނީ އޭނާ އަށް ދިން ކަހަލަ ވަދާއީ މެޗެއް، އިންގްލެންޑްގެ ގައުމީ ޓީމުގެ ކެޕްޓަން ވޭން ރޫނީ އަށް ވެސް ލިބެންޖެހޭނެ ކަމަށް ގަބޫލްކުރެވޭ ކަމަށެވެ.
އިންގްލެންޑް ކޮޅަށް ލަނޑު ޖެހުމަށް ފަހު ޕޮޑޮލްސްކީ އުފާފާޅުކުރަނީ. -- ފޮޓޯ / ބީބީސީ