އައްޑޫ ސިޓީގައި އުފެދޭ ކުނި މެނޭޖްކުރުމުގެ މަސައްކަތް ވެމްކޯ އާއި ހަވާލުކޮށް އެއްބަސް ވުމުގައި މިއަދު ސޮއި ކޮށްފި އެވެ.
އެންވަޔަރަންމަންޓް މިނިސްޓްރީގައި މިއަދު ބޭއްވި ރަސްމިއްޔާތުގައި މިނިސްޓްރީގެ ފަރާތުން މި އެއްބަސްވުމުގައި ސޮއި ކުރެއްވީ މިނިސްޓާ ތޯރިގް އިބްރާހީމެވެ. ވެމްކޯގެ ފަރާތުން ސޮއި ކުރެއްވީ މެނޭޖިން ޑިރެކްޓަރު އިބްރާހިމް ފުއާދެވެ.
މި އެއްބަސްވުމަކީ އެ ސިޓީގައި އުފެދޭ ކުނި، ރައްކާތެރި ގޮތެއްގައި ނައްތާލާ، ދެމެހެއްޓެނިވި ގޮތުގައި ކުނި މެނޭޖްކުރުމުގެ ނިޒާމެއް ގާއިމް ކުރުމުގެ އެއްބަސްވުމެކެވެ.
މިނިސްޓާ ތޯރިގް ވިދާޅުވީ އެބަސްވުމާއެކު ކުނި މެނޭޖްކުރުމުގެ ގައުމީ ސިޔާސަތުގެ ދަށުން އައްޑޫގައި ކުނި މެނޭޖް ކުރުމާއި، އެ ސިޓީގެ ގޭގެ އާއި ވިޔަފާރި ކުރާ ތަންތަނުގައި އުފެދޭ ކުނި ނަގައި ހިތަދޫ ގައި ގާއިމްކޮށްފައިވާ ވޭސްޓް މެނޭޖްމެންޓް ސައިޓުގައި ނައްތާލާނެ ކަމަށެވެ. އަދި އެ ސިޓީގައި ތަރައްގީ ކުރަމުން އަންނަ ރިސޯޓުތަކުގެ ކުނި އެ ރިސޯޓެއްގެ ހަރަދުގައި ހިތަދޫ ސައިޓަށް ބޭލޭނެ އިންތިޒާމް ވެސް ހަމަޖައްސައިދީ ކުނި ނައްތާލާނެ ކަމަށެވެ.
އައްޑޫ ސިޓީގައި ރީޖަނަލް ވޭސްޓް މެނޭޖްމަންޓް ފެސިލިޓީ އާއި ވޭސްޓް މެނޭޖްމަންޓް ސިސްޓަމެއް ގާއިމް ކުރަމުން އަންނަ ކަމަށްވެސް މިނިސްޓާ މިއަދު ވިދާޅުވި އެވެ. އަދި ވިދާޅުވީ، ސިސްޓަމް ގާއިމްކޮށް ނިމުމުން އާ އެއްބަސްވުމެއްގެ ދަށުން އެ މަސައްކަތް ބެލެހެއްޓުންވެސް ވެމްކޯއާ ހަވާލު ކުރާނެ ކަމަށެވެ.