އަންނަ އަހަރު ރަޝިޔާގައި ބޭއްވުމަށް، ހަމަޖެހިފައިވާ ވޯލްޑްކަޕަށް ކޮލިފައި ވުމުގެ ބިރު ކުރިމަތިވެފައިވާ، ހޮލެންޑްގެ ކޯޗް ކަމުން ޑެނީ ބްލިންޑް ވަކި ކޮށްފި އެވެ.
ބްލިންޑް ކޯޗް ކަމުން ވަކިކޮށްފައި މިވަނީ، ކޮލިފައިންގައި، ބަލްގޭރިއާ އަތުން 2-0 ގެ ނަތީޖާއަކުން ބަލިވިތާ، 24 ގަޑިއިރު ވެސް ނުވަނީހެވެ. އެ މެޗުން ބަލިވުމުން، ހޮލެންޑް ވަނީ ގުރޫޕްގެ ހަތަރު ވަނަ މަގާމަށް ސޮއްސާލާފަ އެވެ. އެޓީމު އޮތީ އެއް ވަނައިގަައި އޮތް ފްރާންސަށް ވުރެ ހަ ޕޮއިންޓް ފަހަތުގަ އެވެ.
ބަލްގޭރިއާގެ މެޗަށް ފަހު، ބްލިންޑް ވަނީ، އޭނާގެ ކުރިމަގު އޮތްގޮތާމެދު، ސުވާލު އުފެދޭ ގޮތަށް ވާހަކަ ދައްކާފަ އެވެ.
ބްރެޒިލްގައި 2014 ވަނަ އަހަރު ބޭއްވި ވޯލްޑްކަޕްގައި ތިން ވަނަ ހޯދި ހޮލެންޑަށް އޭގެ ފަހުން ވަނީ މައްސަލަ ކުރިމަތިވެފަ އެވެ. މިދިޔަ އަހަރު ބޭއްވި ޔޫރޯ ފުޓްބޯޅަ މުބާރާތަށްވެސް އެޓީމު ކޮލިފައި ވެފައެއް ނުވެއެވެ. ބްލިންޑަކީ، ވޭތުވެދިޔަ ދެ އަހަރު ތެރޭ، ހޮލެންޑްގެ ގައުމީ ޓީމު ދޫކޮށްލާ ދެ ވަނަ ކޯޗެވެ.
ޔޫރޯ ކޮލިފައިންގައި ނަތީޖާ ހޯދައި ނުދެވުމުން، ކުރީގެ ކޯޗް ގުސް ހިޑިންކް ވަނީ އަމިއްލައަށް މަގާމުން އިސްތިއުފާ ދީފަ އެވެ. ހޮލެންޑްގެ ޓީމުގެ ކުރީގެ ޑިފެންޑަރު ބްލިންޑަކީ، ހިޑިންކްގެ އެސިސްޓެންޓް ކޯޗެވެ.
އޭނާއަށް ވެސް ނަތީޖާ ނު ނެރެވުމުން، އޭނާ ވަކި ކުރުމަށްފަހު، ހޮލެންޑްގެ އެފްއޭގެ ޑައިރެކްޓާ ޖީން ޕައުލް ޑިކޯސޫ ވިދާޅުވީ، ބްލިންޑްގެ ދައުރުގައި އޭޏާ ކޮށްދިން ހިދުމަށް ޝުކުރު އަދާ ކުރާ ކަމަށާއި ނަމަވެސް، ރަޝީޔާގެ ވޯލްޑްކަޕަށް ކޮލިފައި ނުވެދާނެ ކަމުގެ ބިރު އޮތުމުން، އެނާ ވަކި ކުރާ ހާލަތަށް ދިޔައީ ކަމަށެވެ.
މާދަމާ އިޓަލީއާ ދެކޮޅަށް ކުޅެން ހަމަޖެހިފައިވާ މެޗުގައި، ވަގުތީ ކޯޗެއްގެ ހައިސިއްޔަތުން، ޓީމަށް އިރުޝާދު ދެނީ ފްރިޑް ގްރިމް އެވެ.