މެންޗެސްޓާ ސިޓީ އާއި އާސެނަލް ބައްދްލު ކުރި މެޗު 2-2 ގެ ނަތީޖާ އަކުން އެއްވަރުވެ، ޕޮއިންޓަކުން ފުއްދާލަން ޖެހުމުން ދެޓީމަށް ވެސް ޕޮއިންޓް ތާވަލުގެ ކުރި އަށް ދިއުމަށް ހުރަހެއް ކުރި މަތިވެއްޖެ އެވެ.
މެޗުން މޮޅުވެގެން، ސިޓީއަށް ތާވަލުގެ ތިން ވަނައަށް ޖެހި ލެވެން އޮތް ނަމަވެސް، އެ ފުރުސަތު ގެއްލުނީ އެވެ. އާސެނަލް ވެސް މޮޅުވިނަމަ، ތާވަލުގެ ފަސް ވަނަ އަށް ޖެހި ލެވުނީ ހެވެ.
އާސެނަލްގެ އެމިރޭޓްސް ސްޓޭޑިއަމްގައި ކުޅުނު މެޗުގެ ފުރަތަމަ ލީޑް ނެގީ މެން ސިޓީ އިން ނެވެ. މެޗުގެ ފަސް ވަނަ މިނެޓްގައި އެޓީމަށް ލީޑް ނަގައިދިނީ، ލިއޮރީ ސޭން އެވެ. ނަމަވެސް މެޗުގެ، 40 ވަނަ މިނެޓްގައި ތިއޯ ވޮލްކޮޓް ވަނީ އާސެނަލް އަށް ނަތީޖާ ހަމަހަމަ ކޮށްދީފަ އެވެ. އޭގެ ދެ މިނެޓް ފަހުން، ސާޖިއޯ އަގުއޭރޯ ވަނީ ސިޓީ އަށް އަލުން ލީޑް ނަގައިދީފަ އެވެ.
ދެ ވަނަ ހާފުގެ އަށް ވަނަ މިނެޓްގައި، ޝްކޮޑްރާން މުސްތަފީ ވަނީ އާސެނަލް އަށް ނަތީޖާ ހަމަހަމަ ކޮށްދީފަ އެވެ.
ރެލިގޭޝަން ޒޯން ގައިވާ މިޑްލްސްބަރާ އާއި ރެލިގޭޝަން ޒޯނާ ގާތުގައިވާ ސްވަންސީ ސިޓީ، ބައްދަލު ކުރި މެޗު ނިމުނީ ލަނޑެއް ނުޖެހި އެއްވަރު ވެގެންނެވެ.