ހަތް ނަމްބަރު ޖޯޒީ ބޭނުން ކުރަން ފެށީ މެންޗެސްޓާ ޔުނައިޓެޑްގެ ކުރީގެ ކޯޗު އެލެކްސް ފާގަސަން ބުނެގެން ކަމަށް ކްރިސްޓިއާނޯ ރޮނާލްޑޯ ބުނެފި އެވެ.
ސްޕޯޓިން ލިސްބަނަށް ރޮނާލްޑޯ ކުޅެނިކޮށް، ޔުނައިޓެޑަށް އޭނާ ގެނައީ ފާގަސަން އެވެ. ޔުނައިޓެޑް ރޮނާލްޑޯ ކުރިއަރައިގެން ގޮސް، އޭނާ ވެގެން ދިޔައީ ދުނިޔޭގެ އެންމެ މޮޅު އެއް ކުޅުންތެރިޔާއަށެވެ.
ރޮނާލްޑޯ އަށް ޔުނައިޓެޑުން އެންމެ ފުރަތަމަ ވެސް ދިނީ ޑޭވިޑް ބެކަމް އެ ޓީމުގައި ބޭނުންކުރި ހަތް ނަމްބަރު ޖޯޒީ އެވެ. މީގެން ވެސް ފާގަސަން ރޮނާލްޑޯއާމެދު ކުރާ އުންމީދު ސާބިތު ވެގެންދިޔަ އެވެ. ރޮނާލްޑޯ ބުނީ އޭނާ ނިންމީ އެހެން ޖޯޒީ ނަމްބަރެއް ނަގަން ކަމަށެވެ. އެކަމަކު ފާގަސަންގެ އެދުމުގެ މަތިން ހަތް ނަމްބަރު ޖޯޒީން ޔުނައިޓެޑްގައި ފެށީ ކަމަށެވެ.
"އަހަރެން އުޅުނީ 28 ނަމްބަރު ޖޯޒީ ނަގަން. އެކަމަކު ފާގަަސަން ބުނީ ހަތް ނަމްބަރު ޖޯޒީ ބޭނުންކުރާނެ. އަހަރެން ވަރަށް ހައިރާންވި. އަހަންނަށް އެނގޭ އެ ޖޯޒީ ނަމްބަރު ބޭނުންކޮށްފައި ތިބި މޮޅެތި ކުޅުންތެރިން،" ރޮނާލްޑޯ ބުންޏެވެ.
ހަތް ނަމްބަރަކީ މިހާރު ރޮނާލްޑޯގެ ބްރޭންޑްގެ ބައެކެވެ.
ރޮނާލްޑޯ ވަނީ ޔުނައިޓެޑާއެކު ތިން ފަހަރު ޕްރިމިއާ ލީގު، އަދި އެއް ފަހަރު ޗެމްޕިއަންސް ލީގު ހޯދައިފަ އެވެ. އަދި ރޮނާލްޑޯ އަށް 2009 ވަނަ އަހަރު ދުނިޔޭގެ މޮޅު ކުޅުންތެރިޔާގެ މަގާމު ވެސް ލިބުނީ ޔުނައިޓެޑަށް ކުޅެނިކޮށެވެ.
