މެޗުގެ އިތުރު ވަގުތުގައި މެންޗެސްޓާ ޔުނައިޓެޑްގެ ފޯވަޑް ޒްލަޓާން އިބްރަހިމޮވިޗް ޖެހި ލަނޑާއެކު އިނގިރޭސި ޕްރިމިއާ ލީގުގައި ރޭ އެވަޓަން އާއި ޔުނައިޓެޑް ބައްދަލުކުރި މެޗު 1-1 އިން އެއްވަރުވެއްޖެ އެވެ.
ޔުނައިޓެޑްގެ ދަނޑުގައި ކުޅުނު މެޗުގައި އެވަޓަންގެ ފިލް ޖަގިއެލްކާ އެ ޓީމަށް ލީޑު ހޯދައިދީފައި ވަނިކޮށް، އިބްރަހިމޮޗިވް ނަތީޖާ އެއްވަރުކުރީ އިތުރު ވަގުތުގައި ލިބުނު ޕެނަލްޓީއަކުންނެވެ. މިއީ ތިން މެޗުގެ ސަސްޕެންޝަނަށް ފަހު ލީގުގައި ޔުނައިޓެޑަށް އިބްރަހިމޮވިޗް ކުޅުނު ފުރަތަމަ މެޗެވެ. ޔުނައިޓެޑަށް ޕެނަލްޓީއެއް ލިބުނީ ލޫކް ޝޯ ގޯލާ ދިމާލަށް ފޮނުވާލި ޝޮޓެއް އެވަޓަންގެ ޑިފެންޑަރުން އޭޝްލީ ވިލިއަމްސް އަތުން ހުއްޓުުވުމުންނެވެ. ވިލިއަމްސް އަށް ވަނީ ރަތްކާޑު ދައްކައިފަ އެވެ.
މި މެޗުގެ ނަތީޖާއާއެކު ޔުނައިޓެޑް ވަނީ ބަލިނުވެ 20 މެޗު ހަމަކޮށްފަ އެވެ. އެކަމަކު ލީގުގައި ކުޅުނު 12 މެޗު ވަނީ އެއްވަރުވެފަ އެވެ. އޭގެ ތެރޭގައި އަމިއްލަ ދަނޑުގައި ކުޅުނު 9 މެޗު ހިމެނެ އެވެ.
މެޗަށް ފަހު ޔުނައިޓެޑްގެ ކޯޗު ޖޯސޭ މޮރީނިއޯ ބުނީ މެޗުގައި ކުޅުންތެރިން ކުރި މަސައްކަތާމެދު ހިތްހަމަޖެހޭ ކަމަށެވެ.
"ކުޅުން އެހާ ރަނގަޅު ކަމަށް ގަބޫލެއް ނުކުރެވޭ އެކަމަކު ކުޅުންތެރިން ކުރި މަސައްކަތް ވަރަށް ރަނގަޅު،" މޮރީނިއޯ ބުންޏެވެ.
