މެޗުގެ 88 މިނިޓު ހިނގިއިރު، ސްވަންސީ އޮތީ 1-0 އިން ޓޮޓެންހަމް ހޮޓްސްޕާގެ މައްޗަށް ކުރި ހޯދައިފަ އެވެ. އެކަމަކު މެޗު ފުރިހަމަ ވަގުތު ހަމަވިއިރު، މެޗުގެ ނަތީޖާ 3-1 އިން ބުރަވެފައި އޮތީ ޓޮޓެންހަމްގެ ކޮޅަށެވެ. އިނގިރޭސި ޕްރިމިއާ ލީގުގައި ރޭ ސްވަންސީ އަތުން ފަހު ވަގުތު ހޯދި މުހިންމު މޮޅާއެކު، ޓޮޓެންހަމް އިން ވަނީ ލީގު ޗެމްޕިއަންކަން ހޯދުމުގެ އުންމީދު ދަމަހައްޓައިފަ އެވެ.
ސްވަންސީގެ ދަނޑުގައި ކުޅުނު މެޗުގެ 11 ވަނަ މިނިޓުގައި ސްވަންސީ އަށް ލީޑު ހޯދައިދިނީ ވޭން ރައުޓްލެޖެވެ. މެޗު ކޮންޓުރޯލްކޮށްގެން ޓޮޓެންހަމް އިން ގިނައިރު ކުޅުނު ނަމަވެސް، މެޗުގެ ފަހު 10 މިނިޓަށް ދިޔައިރު ވެސް ޓޮޓެންހަމް އަށް ސްވަންސީގެ ޑިފެންސް ފޫއަޅުވާ ނުލެވުނެވެ.
ޓޮޓެންހަމް އަށް މެޗުގެ 88 ވަނަ މިނިޓުގައި ނަތީޖާ އެއްވަރުކޮށްދިނީ ޑެލޭ އަލީ އެވެ. މެޗުގެ ބާކީ އޮތް ވަގުތުގައި ކޮޅުގައި ދެން ފެނިގެންދިޔައީ ޕްރިމިއާ ލީގުގެ ތާރީހުން ޖާގަ ލިބޭނެ މަންޒަރުތަކެކެވެ.
މެޗުގެ އިތުރު ވަގުތުގެ ތެރޭގައި ޓޮޓެންހަމް އަށް ލީޑު ހޯދައިދިނީ ދެކުނު ކޮރެއާގެ ފޯވަޑް ސޮން ހެއުންގް މިން އެވެ. އަދި އިތުރު ވަގުތުގައި ޓޮޓެންހަމްގެ ކްރިސްޓިއަން އެރިކްސަން ވަނީ އިތުރު ލަނޑެއް ޖަހައި، ޓޮޓެންހަމަށް ތިން ޕޮއިންޓް ކަށަވަރުކޮށްދީފަ އެވެ.
މި މެޗުން މޮޅުވި ނަމަވެސް، ޓޮޓެންހަމްގެ މައްޗަށް ތާވަލްގެ އެއްވަނައިގައި އޮތް ޗެލްސީން ނަގާފައިވާ ހަތް ޕޮއިންޓްގެ ލީޑު ވަނީ ހިފަހައްޓައިފަ އެވެ. ޗެލްސީ ވަނީ ރޭ އަމިއްލަ ދަނޑުގައި ސިޓީ އަތުން 2-1 އިން މޮޅުވެފަ އެވެ.