އިޓާލިއަން ލީގުގައި ރޭ ކިއޭވޯ އަތުން 2-0 އިން މޮޅުވެ، ޔުވެންޓަސް ލީގު ޗެމްޕިއަންކަމާ ގާތަށް އިތުރު ފިޔަވަޅެއް އަޅައިފި އެވެ.
ޔުވެންޓަސްގެ ދަނޑުގައި ރޭ ކުޅުނު މެޗުގައި ޔުވެންޓަސްގެ ދެ ލަނޑު ވެސް ޖެހީ އާޖެންޓީނާގެ ފޯވަޑް ގޮންޒާލޯ ހިގުއައިން އެވެ. މި ސީޒަންގައި ހިގުއައިން ވަނީ މިހާރު 27 ލަނޑު ހަމަކޮށްފަ އެވެ.
މިއީ އިޓާލިއަން ލީގުގައި އަމިއްލަ ދަނޑުގައި ޔުވެންޓަސް ޖެހިޖެހިގެން މޮޅުވި 32 ވަނަ މެޗެވެ. ޔުވެންޓަސް އިން އިޓާލިއަން ލީގުގައި އަމިއްލަ ދަނޑުގައި ކުޅުނު މެޗުތަކުން ޖެހިޖެހިގެން 32 މޮޅު ހަމަކުރީ 2015 ވަނަ އަހަރުގެ ސެޕްޓެމްބަރުން ފެށިގެނެވެ.
ޔުވެންޓަސް ތާވަލްގެ އެއްވަނައިގައި އޮތީ 77 ޕޮއިންޓާއެކު އެވެ. ދެވަނައިގައި ރޯމާ އޮތީ 68 ޕޮއިންޓާއެކު އެވެ.
ލީގުގައި މިއަދު ރޯމާ ނުކުންނާނީ ބޮލޮންޔާއާ ދެކޮޅަށެވެ.
ހިގުއައިން އާއި ޑިބާލާ ލަނޑު ޖެހުމަށް ފަހު އުފާފާޅުކުރަނީ. -- ފޮޓޯ: ބީބީސީ