ދުނިޔޭގެ ޓެނިސް ރޭންކުގެ ދެ ވަނައިގައި މިހާރު ހުރި، ކުޅުންތެރިޔާ އެމެރިކާގެ ސެރީނާ ވިލިއަމްސް ބަނޑުބޮޑު ކަމަށާއި މިއަހަރު އިތުރު މުބާރާތެއްގައި ދެން ނުކޫޅޭނެ ކަމަށް، އޭނާ ބުނެފި އެވެ.
ލޯގަނޑެއް ކުރިމަތީ ފޯން ހިފަހައްޓައިގެން ހުރެ، ސްނެޕް ކުރަމުން އޭނާ ލިޔެފައި ވަނީ '20 ހަފުތާ' މިހެން ނެވެ.
މިއަހަރު ޖަނަވަރީ މަހު، ބޭއްވި އޮސްޓްރޭލިއަން އޯޕަން ކާމިޔާބު ކޮށް، ސެރީނާ ވަނީ ގްރޭންޑް ސްލޭމްގެ 23 މުބާރާތް ކާމިޔާބު ކޯށް ރެކޯޑް ހަދާފަ އެވެ. އޭނާ އެ މުބާރާތް ކާމިޔާބު ކުރީ ފައިނަލަުގައި ދައްތަ ވީނަސް ވިލިއަމްސް ބަލި ކުރުމަށްފަހު އެވެ. އޭނާ ކާމިޔާބު ކުރި ގްރޭންޑް ސްލޭމް މުބާރާތްކުގެ ތެރޭގައި، ދުނިޔޭގެ އެންމެ ބޮޑު ގްރޭންޑް ސްލޭމްގެ ތިން މުބާރަތް ކަމަށްވާ ފްރެންޗް އޯޕަން އާއި ޔޫއެސް އޯޕަންގެ އިތުރުން ވިމްބޮލްޑަން މުބާރާތްވެސް ހިމެނެ އެވެ.
އަންނަ ހަފުތާގައި ދުނިޔޭގެ ރޭންކިންގެ އެއްވަނަ އަށް އެރެން އޮތް ފުރުސަތު، ސެރީނާއަށް ބަންދެއް ނުވެ އެވެ. އޭނާ އެނބުރި ވިހައިގެން އައި ނަމަވެސް، އޭނާ އަށް އެފުރުސަތު އޮންނާނެ އެވެ. އަންހެންނުންގެ ޓެނިސް އެސޯސިއޭޝަންގެ ހާއްސަ ރޭންކިންގެ އުސޫލުގެ ދަށުން، ވިހައިގެން 12 މަސް ކޮށްފައި އައިނަމަވެސް، އޭނާ އަށް އެފުރުސަތު ދޭނެ އެވެ.
އަންހެންނުންގެ ޓެނިސް އެސޯސިއޭޝަޝަންގެ ރޭންކިންގެ ހާއްސަ އުސޫލުގައި ބުނެފައިވަނީ ވިހައިގެން ނުވަތަ، ދިގު މުއްދަތެއް ހޭދަ ކުރަންޖެހޭ އަނިޔާއެއް ކުރިމަތި ވެއްޖެނަމަ، އެކުޅުންތެރިޔެއްގެ ރޭންކިންގް މަގާމު ނުގެއްލޭނެ ކަމަށެވެ. އަދި އެ ކުޅުންތެރިޔަކު ބޭނުން ނަމަ، ރޭންކުގެ ކުރިއަށް އެރުމަށް މުބާރާތުގައި ވާދަ ކުރުމުގެ ފުރުސަތު ދޭނެ އެވެ.
ސެރީނާ ބަނޑުބޮޑު ކަން އިއުލާން ކުރުމުން ވީނަސް ބުނެފައިވަނީ ސެރީނާ އަށް މިހާރު ވަނީ އާ ފަހްރެއް ލިބިފައި ކަމަށާއި ދަރިއަކު ލިބެން އުޅޭތީ މަރުހަބާ ކިޔާ ކަމަށެވެ.
ސެރީނާ ފާހަގަ ކުރެވިފައި ވަނީ، ދުނިޔޭގެ އުފެދުނު އެންމެ މޮޅު އަންހެން ޓެނިސް ކުޅުންތެރިޔާގެ ގޮތުގަ އެވެ.