އިޓަލީ އާއި ރާއްޖެއާ ދެމެދު ސީދާ ދަތުުރުތައް ފަށަނީ

އިޓަލީވިލާތުގެ ރޯމާއި ރާއްޖެއާ ދެމެދު އެލިތާލިޔާ އެއާލައިނުން ސީދާ ދަތުރުތައް ފަށަން ތައްޔާރު ވެއްޖެ އެވެ.

ވައިގެ ދަތުރުފަތުރުގެ ހަބަރުތައް ގެނެސްދޭ، ބައެއް ވެބްސައިޓްތަކުގައިވާ ގޮތުން އިޓަލީގެ އެލިތާލިޔާ އެއާލައިނުން ރާއްޖެ އަށް ޝެޑިއުލް ދަތުރުތައް އޮކްޓޫބަރު މަހު ފަށާއިރު، ހަފުތާއަކު ތިން ފްލައިޓް ރާއްޖެއަށް ބާއްވާނެ އެވެ.

އެލިތާލިޔާ އެއާލައިންގެ ޗީފް އެގްޒެކެޓިވް އޮފިސަރު ކްރާމާ ބޯލް ވިދާޅުވީ ފިނި މޫސުމާ ދިމާކޮށް ރާއްޖެއަށް ފްލައިޓްތައް ފަށަނީ ރާއްޖެއަކީ ވަރުގަދަ ޓޫރިސްޓު މަންޒިލަކަށްވާތީ ކަމަށެވެ.

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުގައި މިދިޔަ އަހަރު އިޓަލީވިލާތުން ރާއްޖެއަށް 71،200 ޓޫރިސްޓުން ޒިޔާރަތް ކޮށްފައިވެ އެވެ. އަދި މި އަހަރުގެ ވޭތުވެދިޔަ ދެ މަސް ދުވަހުގެ ވެސް އެ ގައުމުން ޒިޔާރަތް ކުރި ޓޫރިސްޓުންގެ އަދަދު ވަނީ 8.5 ޕަސެންޓް އިތުރުވެފަ އެވެ.

އެލިތާލިޔާ އެއާލައިނުން ރާއްޖެއަށް އުދުހޭނީ އަންގާރަ ދުވަހާއި ހުކުރު ދުވަސް އަދި ހޮނިހިރު ދުވަހު އެވެ. އަދި މި ދަތުރުތަކުގައި ބޭނުންކުރާނީ އެއާބަސް 330 ގެ ފްލައިޓެކެވެ. މިއީ 250 މީހުންގެ ކެޕޭސިޓީގެ ބޯޓެކެވެ.

އިތުރު އެއާލައިނެއްގެ ދަތުރުތައް ރާއްޖެއަށް ފަށަން ތައްޔާރުވާއިރު، ގަން އިންޓަނޭޝަނަލް އެއާޕޯޓާއި ޔޫރަޕާ ދެމެދު މެދުއިރުމަތީގެ އެއާލައިނަކުން ދަތުރުތައް ފެށުމަށްވެސް ދަނީ ތައްޔާރު ވަމުންނެވެ.