ހުޅުމާލޭގައި ދެ ޝޮޕިން ކޮމްޕްލެކްސްއެޅުމަށް ރާއްޖޭގެ މަޝްހޫރު ދެ ކުންފުންޏަކާ އެކު ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) އިން ސޮއިކޮށްފި އެވެ.
މިދިޔަ ބުރާސްފަތި ދުވަހު އެޗްޑީސީގެ ހުޅުމާލެ އޮފީހުގައި ބޭއްވި ރަސްމިއްޔާތެއްގައި ޝޮޕިން ކޮމްޕްލެކްސް އެޅުމަށް އެޗްޑީސީ އިން އެއްބަސްވުމެއްގައި ސޮއިކޮށްފައި ވަނީ ހާޑްވެއާ ވިޔަފާރީގައި މަޝްހޫރު ސޮނީ ގްރޫޕާއި މަޝްހޫރު ޗަމްޕާ އާއިލާއިން އޮޕަރޭޓް ކުރަމުން އަންނަ ހުރުވަޅި ބީޗް ރިސޯޓް އިންވެސްޓްމަންޓްސް އާ އެކު އެވެ. އެޗްޑީސީގެ ފަރާތުން ކުންފުނީގެ މެނޭޖިން ޑިރެކްޓަރު މުހައްމަދު ސައިމަން ސޮއި ކުރެއްވި އިރު، ސޮނީ ކުންފުނީގެ ފަރާތުން ސޮއި ކުރެއްވީ ކުންފުނީގެ މެނޭޖިން ޑިރެކްޓަރު މޫސާ ކަލީމް އެވެ. އަދި ހުރުވަޅި ރިސޯޓް އިންވެސްޓްމަންޓްސްގެ ފަރާތުން ސޮއި ކުރެއްވީ ކުންފުނީގެ މެނޭޖިން ޑައިރެކްޓަރު އާމިރު މަންސޫރެވެ.
އެއްބަސްވުމުގެ ދަށުން ސޮނީ އިން ހުޅުމާލޭގައި ހަދާ ޝޮޕިން ކޮމްޕްލެކްސް ހަދަނީ ހުޅުމާލޭ ރެހެންދި ސްކޫލް ހުންނަ ސަރަހައްދުގަ އެވެ. އާންމު ހާޑްވެއާގެ ބާވަތްތަކަށް ހާއްސަކޮށް ހަ ފްލޯއަށް ހަދާ އެ ޝޮޕިން ކޮމްޕްލެކްސް ނިމޭނީ އަންނަ އަހަރުގެ މެދުތެރޭގަ އެވެ. ހުރުވަޅި ރިސޯޓް އިންވެސްޓްމަންޓްސް އާ އެކު އެއްބަސްވީ ހުޅުމާލޭގެ ފެރީ ޓާމިނަލް ކައިރީގައި ބީޗް ޕްރޮންޓަށް ވާ ގޮތަށް ޝޮޕިން ކޮމްޕްލެކްސްއެއް ހެދުމަށެވެ. ދެ ފްލޯއަށް ހަދައި މި ޝޮޕިން ކޮމްޕްލެކްސްފައި ފިހާރަތަކުގެ އިތުރަށް ފާހާނާ އާއި ނަމާދު ކުރާ ކޮޓަރި އާއި އޭޓީއެމްތައް އަދި ހިލޭ ވައިފައި ލިބޭނެ އިންތިޒާމް ގާއިމް ކުރާނެ އެވެ.