ކްރިސްޓިއާނޯ ރޮނާލްޑޯގެ ހެޓްރިކާއެކު ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގުގައި ރޭ އެތުލެޓިކޯ މެޑްރިޑް އަތުން 3-0 އިން މޮޅުވެ، ރެއާލް މުބާރާތުގެ ފައިނަލާ ގާތަށް ޖެހިލައިފި އެވެ.
ރެއާލްއާ ވާދަވެރި އެތުލެޓިކޯއާ ދެކޮޅަށް އަމިއްލަ ދަނޑުގައި ރެއާލް ކުޅުނު މެޗުގައި އެތުލެޓިކޯ އަށްވުރެ ރަނގަޅު ކުޅުމެއް ދައްކައި، މެޗު ކޮންޓުރޯލްކުރީ ރެއާލް އިންނެވެ. ރޮނާލްޑޯ ރެއާލަށް ލީޑު ހޯދައިދިނީ މެޗުގެ 10 ވަނަ މިނިޓުގަ އެވެ. އަދި ދެވަނަ ހާފުގައި ރޮނާލްޑޯ ވަނީ އިތުރު ދެ ލަނޑު ޖަހައިފަ އެވެ.
މުޅި މެޗުގައި ވެސް އެތުލެޓިކޯ އަށް ރެއާލްގެ ގޯލަށް އަމާޒުކޮށްލެވުނީ އެންމެ ހަމަލާއެކެވެ. ފާއިތުވި ތިން ސީޒަންގައި ވެސް ޗެމްޕިއަންސް ލީގުގައި އެތުލެޓިކޯގެ އުންމީދުތައް ފެނަށް ދުއްވާލީ ރެއާލުންނެވެ. އަމިއްލަ ދަނޑުގައި ކުޅޭ ދެވަނަ ލެގުގައި އާދަޔާ ހިލާފު ނަތީޖާއެއް ނެރިގެން ނޫނީ އެތުލެޓިކޯ އަށް ފައިނަލްގެ ފުރުސަތެއް ނެތެވެ.
މެޗަށް ފަހު ރެއާލްގެ ކޯޗު ޒިނެދީން ޒިދާން ވަނީ ޗެމްޕިއަންސް ލީގުގެ ތާރީހުގައި މިހާތަނަށް އެންމެ ގިނަ ލަނޑު ޖަހާފައިވާ ކުޅުންތެރިޔާ، ރޮނާލްޑޯ އަށް ތައުރީފް ކޮށްފަ އެވެ.
ޗެމްޕިއަންސް ލީގުގެ އެންމެ ފަހުގެ ޗެމްޕިއަން ރެއާލަށް މި ސީޒަންގައި ދެ ތަށި އުފުލާލުމުގެ ފުރުސަތު އެބަ އޮތެވެ. ދެހާސް ބާރަ ވަނަ އަހަރުގެ ފަހުން ފުރަތަމަ ފަހަރަށް ލީގު ޗެމްޕިއަންކަން ހޯދުމުގެ ފުރުސަތު ރެއާލަށް އެބައޮތެވެ. ޗެމްޕިއަންސް ލީގުގެ ތަށި ރެއާލަށް ދިފާއުކުރެވިއްޖެ ނަމަ، އެ ޓީމު ވާނީ 1992 ވަނަ އަހަރު މުބާރާތް ރީބްރޭންޑްކުރި ފަހުން މުބާރާތުގެ ޗެމްޕިއަންކަން ހޯދި ފުރަތަމަ ޓީމަށެވެ.
އެތުލެޓިކޯގެ ކޯޗު ޑިއޭގޯ ސިމިއޯނީ ބުނީ މި ނަތީޖާ ހަނދާން ނައްތާލައި، ދެވަނަ ލެގަށް ވިސްނަންޖެހޭ ކަމަށެވެ. އަދި އެތުލެޓިކޯ އިން އުންމީދު ކަނޑާނުލާނެ ކަމަށެވެ.
ރެއާލްގެ ރޮނާލްދޯ (ކ) އާއި ރާމޮސް ލަނޑު ޖެހުމަށް ފަހު އުފާފާޅުކުރަނީ. -- ފޮޓޯ: ޑެއިލީ މެއިލް