ރައިސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ރާއްޖެއަށް ތަރައްގީ ގެންނަވަނީ ވަރަށް ބާރު ސްޕީޑެއްގައި ކަމަށާއި އެހެންކަމުން 2018 ގައި ހުންނަވާނީ ރައީސް ޔާމީނާއެކު އެމަނިކުފާނަށް ތާއީދު ކުރައްވައިގެން ކަމަށް ރައްޔިތުން މަޖިލީހުގެ ނައިބު ރައީސް އަދި ހުޅުހެންވޭރު ދާއިރާގެ މެންބަރު ރީކޯ މޫސާ މަނިކު ވިދާޅުވެއްޖެ އެވެ.
"ޕީޕީއެމްގެ ހޮވަމާ" ގެ ނަމުގައި މިރޭ ސިނާއީ އަވަށުގައި ބޭއްވި ޖަލްސާގައި ވާހަކަފުޅު ދައްކަވަމުން މޫސަ ވިދާޅުވީ ރައްޔިތުންގެ މަޖިލީހުގައި އޭނާއަކީ ކުރިން ހިޔާލު ތަފާތުވި ބޭފުޅެއް ނަމަވެސް ފެށުނީއްސުރެއް މަޖިލީހުގެ ތެރޭގައި ހުޅުހެންވޭރު ދާއިރާއަށް ރައީސް ޔާމީން ގެންނަވާ ތަަރައްގީއަށްޓަކައި ބަޖެޓަށް ދުވަހަކުވެސް ދެކޮޅު ހައްދަވާފައި ނުވާ ކަމަށެވެ. އަދި ސިޔާސީ ހިޔާލު ތަފާތުތަކެއް ހުއްޓަސް ރައްޔިތުންގެ މަންފާއަށާއި ތަރައްގީއަށް މަސައްކަތް ކުރަން އަބަދުވެސް ޖެހޭ ކަމަށާއި ރައީސް ޔާމީން ކުރައްވަނީ އެ މަސައްކަތް ކަމަށެވެ.
އަދި ވިދާޅުވީ ރައީސް ޔާމީންގެ ރާއްޖެއަށް ގެންނަވާ ތަރައްގީއާ މެދު ދެބަސްވާ އެއްވެސް ދިވެހި ރައްޔިތެއް ނުހުންނާނެ ކަމަށާއި އެމަނިކްފާނު ބާރު މިނެއްގައި ތަރައްގީ ގެންނަވާތީ ޝުކުރު އަދާ ކުރަން ޖެހޭ ކަމަށެވެ.
"އަޅުގަނޑު ވަރަށް އުފާވޭ ހުރިހާ ރައްޔިތުންނަށް ކަންކަން ކޮށްދެވޭނެ ތަނެއްގެ ގޮތުގައި ހުޅުމާލެ އޮތީމަ. އަޅުގަނޑު އުފަންވީ ރަށަކުން ބްރިޖުގެ ބުޑުގަނޑު އެ ފަށަނީ. މަސައްކަތް ގޮސް އެ ނިމެނީ އަޅުގަނޑު އެ ދާއިރާއެއް ތަމްސީލު ކުރާ ތަނަށް. އެހެންވީމަ އަޅުގަނޑަކަށް ނެތް މިކަމުގައި ދެކޮޅު ހެދޭކަށް،" މޫސަ ވިދާޅުވި އެވެ. "އަޅުގަނޑުމެނަށް އެބަ އިވޭ ރައީސް ޔާމީން އަރިހުގައި ސިޔާސީ މީހުންނެއް ނެތޭ ބުނާ ވާހަކަ. އަޅުގަނޑަކަށް ހިޔެއް ނުވޭ އަޅުގަނޑު ވެސް ވަކިން ސިޔާސީ މީހަކަށް ނުވާނެ ގޮތެއް އޮންނާނެހެން. އަޅުގަނޑުމެން އެބަ ތިބިން. ރާއްޖޭގައި ސިޔާސީ ގޮތުން މޮޅު ބަޔަކީ ވަކިބައެއް ނޫން. ރާއްޖޭގެ ތަރައްގީއާ ކުރިއެރުމަށް ރައީސް ވަޑައިގަންނަވާ ކަމަށް ވަނީނަމަ 2018 ގައި ވެސް ރައީސް ޔާމީންއާ އެކީ ހުންނާނަން. މި ދަންނަވަނީ ވަރަށް ޔަގީން ކަމާއެކު،"
މޫސަ ވިދާޅުވީ ކައުންސިލަރުން އިންތިހާބު ކުރަނީ ރައްޔިތުންގެ ބޭނުންތައް އެއްފަރާތްކޮށް ސިޔާސީ މަސައްކަތްތައް ކުރާކަށް ނޫން ކަމަށާއި ކިތަންމެ ހިޔާލު ތަފާތުވިޔަސް ތިބެން ޖެހޭނީ ސަރުކާރާ ގުޅިގެން ތަރައްގީގެ މަސައްކަތްކޮށް ހަލުވި ދުވެލީގައި މަސައްކަތް ކުރަން ކަމަށެވެ. އޭގެ ބަދަލުގައި މިހާތަނަށް ވެސް ކަން ހިނގާފައި އޮތީ ރައްޔިތުންތަކުގެ ބޭނުންތަކަށް ވުރެ ކައުންސިލަރުންގެ އަމިއްލަ ބޭނުން އިސްކޮށްގެން މަސައްކަތް ކުރި މަންޒަރުތަށް ކަމަށާއި ނަމަވެސް އެއީ ވެރިކަމަށް ދަހިވެފައި ތިބި ފަރާތްތަކުން ކުރި މަސައްކަތް ކަމަށެވެ.
ރައީސް ޔާމީންއާއެކު 2018 ގައި ހުންނަވާނެ ކަމަށް މޫސަ ވިދާޅުވި އިރު މީގެ ކުރިން މޫސަ ވަނީ 2018 ގައި އެމްޑީޕީ ކެނޑިޑޭޓެއްގެ ގޮތުގައި ވާދަ ކުރައްވާނެ ކަން އިއުލާނު ކުރައްވާފަ އެވެ. ނަމަވެސް އޭގެ ފަހުން އެމްޑީޕީން ވަނީ މޫސަ އެ ޕާޓީން ވަކިކޮށްފަ އެވެ.