ފްރާންސްގައި އިއްޔެ ބޭއްވި ރިޔާސީ އިންތިހާބުގެ ދެވަނަ ބުރު ޔޫރަޕާ ރަޙުމަތްތެރި ކެންޑިޑޭޓް އިމެނުއަލް މެކްރޯން ކާމިޔާބުކުރައްވައިފިއެވެ.
ކަނާތު ފިޔައިގެ ހަށުކަށި މަރީން ލެޕެން ބަލިކުރައްވައި ފްރާންސްގެ ރައީސް ކަމަށް މެކްރޯން ވަޑައިގެންނެވުމަކީ ފްރާންސް ރައްޔިތުންގެ އިތުރުން ޔޫރަޕަށް ވެސް ލިބުނު ބޮޑު ހިތްހަމަޖެހުމެކެވެ. އެއީ ލެޕެން އަށް ރައީސްކަން ލިބިވަޑައިގަތް ނަމަ ޔޫރަަޕިއަން ޔޫނިއަން އިން ފްރާންސް ވަކިވާނެ ކަމުގެ ބިރު އޭނާ ދައްކަވާފައި ވާތީއެވެ.
ފްރާންސްމީހުން އިއްޔެ ލީ ހުރިހާ ވޯޓެއް ހެން ގުނައި ނިމުނު އިރު ވަގުތީ ނަތީޖާ ދައްކާ ގޮތުން މެކްރޯންއަށް ވަނީ ވޯޓްގެ 66 ޕަސެންޓް ލިބިފައެވެ. ލެޕެންއަށް 34 ޕަސެންޓް ލިބުނު އިރު އެނަތީޖާ އަކީ ވޯޓްގެ ކުރިން ކުރި ހިޔާލުހޯދުމުގެ ސާވޭތަކުން ދެއްކި ވަރަށް ވުރެ ގާތްގަނޑަކަށް 20 ޕަސެންޓް އިތުރު ފަރަގެކެވެ.
އުމުރުފުޅުން 39 އަހަރުގެ މެކްރޯންއަކީ ފްރާންސްގެ ރައީސްކަމަށް މިހައިތަނަށް ވަޑައިގެންނެވި އެންމެ ޒުވާން ބޭފުޅާއެވެ. އޭނާއަށް ފްރާންސްގެ އިންތިހާބުގެ ދެވަނަ ބުރަށް ވަޑައިގެންނެވި ދުވަހު އޭނާ އުޅުއްވި ގޮތަށް ގިނަ ބަައެއްގެ ފާޑުކިއުންތައް އަމާޒުވިއެވެ. އޭނާ އެދުވަހު އުޅުއްވީ ރައީސްކަން ލިބިވަޑައިގަންނަވައިގެން އުޅުއްވާ ގޮތަށް ކަމަށް ބައެއް ފަރާތްތަކުން ސިފަކުރެއެވެ. ނަމަވެސް އިއްޔެ ކާމިޔާބީ އާ ގުޅިގެން އޭނާ ވަނީ ވަރަށް ބޮޑަށް މަޑުމައިތިކަން އިސްކުރައްވާފައެވެ. ރިޔާސީ އިންތިހާބާ ގުޅިގެން ފްރާންސްގެ ރައްޔިތުންގެ މެދުގައި އުފެދިފައިވާ ބައިބައިވުން ކުޑަކުރައްވަން މަސައްކަތް ކުރައްވާނެ ކަަމަށް އޭނާ ވިދާޅުވިއެވެ.
" އަހަރެމެންގެ ގައުމުގައި އޮތް ބައިބައިވުން އަހަރެންނަށް އިނގޭ. އެކަމުގެ ސަބަބުން ބައެއް މީހުން ހައްދުފަހަނައެޅުމަށް ވޯޓްދިން. އަހަރެން އެމީހުންނަށް އިހުތިރާމްކުރަން،" ޕެރިހުގައިވާ ކެމްޕޭން ހެޑްކުއާޓަރުގައި ވާހަކަފުޅުދައްކަވަމުން މެކްރޯން ވިދާޅުވިއެވެ.
ފްރާންސްގެ ރައީސްކަމަށް ވަޑައިގެންނެވުމާއި އެކު މެކްރޯންއަށް ކުރިމަތިވާނެ އެންމެ ފުރަތަަމަ ގޮންޖެހުމަކީ އެގައުމުގައި އަންނަ މަހު ބާއްވާ ޕާލަމެންޓް އިންތިހާބު ކާމިޔާބު ކުރެެއްވުމެވެ. އޭނާގެ ސިޔާސަތުތައް ތަންފީޒު ކުރުަމަށް ޓަކައި އެއީ މުހިއްމު ކަމަކަށް ވެފައި ވާއިރު އޭނާގެ ޕާޓީ ލަ ރިޕަބްލިކް އަން މާޝް އަކީ އަދި އެއް އަހަރެއްހާ ދުވަސް ނުވާ ޕާޓީއަކަށް ވާތީ ޕާލަމެންޓް އިންތިހާބު ކާމިޔާބު ކުރުމަކީ ވަރަށް އުނދަގޫ ކަމަކަށް ވާނެއެވެ.
މެކްރޯން ސިޔާސީ ދާއިރާ އަށް ނެރެދެއްވީ ފްރާންސްގައި މިހާރު ހުންނެވި ރައީސް ފްރަންސްވާ އޮލޯން އެވެ. މެކްރޯން އަކީ އޮލޯންގެ ސަރުކާރުގައި މެކްރޯން ވަނީ އިކޮނޮމީ މިނިސްޓަރުކަން ކުރައްވާފައެވެ.