"ލޯކަލް ކައުންސިލް އިންތިހާބުން ފުރިހަމަ ކާމިޔާބީއެއް ވަނީ ލިބިފަ،" އިންތިހާބުގެ ނަތީޖާތައް މީޑިއާއިން އާންމުކުރަން ފެށުމުން އެންމެ ބޮޑު ދެ ޕާޓީ އެމްޑީޕީ އަދި ޕީޕީއެމްއިން ވެސް ވަނީ މިހެން ބުނެފަ އެވެ. މޮޅުވީ ކޮން ބައެއް ކަމާމެދު މިހާރު މިއޮތީ ހަމަ ވަރަށް ބޮޑަށް ސުވާލު އުފެދިފަ އެވެ. ސިޔާސީ މީހުން އަބަދުވެސް މޮޅު ކުރާނީ އެ ބަޔަކަށް ފައިދާއެއް އޮންނަ ފަޅި އެވެ.
އެކަމަކު އިންތިހާބެއްގެ މައިގަނޑު މަގްސަދަކީ ވެސް ހިސާބު އަދަދުތަކުން ޖުމްލަ ނަތީޖާއެއް ނެރެ، އަސްލު މޮޅުވާ ބަޔަކު ބެލުމެވެ. އެކަމަށް އެންމެ ފުރަތަމަ އާންމު ރައްޔިތުން ބަރޯސާވަނީ މީޑިއާތަކަށެވެ. ހާއްސަކޮށް ލައިވް ކަވަރޭޖް ގެނެސްދޭ ޓީވީތަކަށެވެ. ހާއްސަކޮށް ގައުމީ ޓީވީ ޓީވީއެމްގެ ލައިވް ކަވަރޭޖަށް އިންތިހާބުތަކުގައި ރައްޔިތުން ބަރޯސާވެ އެވެ. މިފަހަރު ވެސް އޮތީ އެގޮތަށެވެ.
ގައުމީޓީވީގެ ހައިސިއްޔަތު ބޮޑުވުމާ އެކު ގިނަ ބަޔަކު ޕީއެސްއެމްގެ ނަތީޖާއާ އެހެން އަމިއްލަ ޓީވީތަކުގެ ނަތީޖާއާ މި ވަނީ އަޅާ ކިޔަން ފަށައިފަ އެވެ. ޕީއެސްއެމްގެ ނަތީޖާ ދައްކާ ގޮތުގައި އެންމެ ގިނަ ގޮނޑި ކާމިޔާބުކޮށްފައިވަނީ ސަރުކާރު ހިންގާ ޕީޕީއެމްއިންނެވެ. ނަމަވެސް، އިދިކޮޅު ފަރާތްތަކަށް ބުރަވާ، ރާއްޖެ ޓީވީގެ ނަތީޖާތަކުން އިދިކޮޅު، އެމްޑީޕީ އުޅެނީ ޕީޕީއެމްއަށްވުރެ ވަރަށް ބޮޑު ތަންވެސް ކުރީގަ އެވެ. ޕީޕީއެމްއަށް އެމްޑީޕީއާ އަރައި ހަމަ ނުކުރެވޭ ވަރުގެ ބޮޑު ފަރަގެއް ޖުމްލަ ނަތީޖާގައި އެބަ ހުއްޓެވެ. މިހާ ބޮޑު ފަރަގެއް ނަތީޖާގައި އުޅޭތީ ސައްހައީ ކޮންބައެއްގެ ނަތީޖާކަން ނޭނގޭ ވަރަށް މި އޮތީ މި މައްސަލަ ފެންމަތިވެފަ އެވެ. އެއް ޓީވީއާ އަނެއް ޓީވީގެ ވަގުތީ ނަތީޖާގައި ކުޑަ ފަރަގުތަކެއް ހުރުމަކީ ހަމަ ވެދާނެ ގޮތެކެވެ. އެކަހަލަ މައްސަލަ ހުންނާނެ އެވެ. އެކަމަކު މިފަހަރު އަރައިގެން މި އުޅެނީ އެކަހަލަ އޮޅުންތަކެކެވެ.
"އެކި ޓީވީތަކުން ނަތީޖާ ފެންނަނީ އެކި ގޮތަށް، އެ ޓީވީން ދައްކާ ގޮތުން އަޅުގަނޑު އުޅެނީ ކުރީގައި، އަނެއް ޓީވީއިން ދައްކާ ގޮތުގައި ނުހޮވޭ،" ކައުންސިލް އިންތިހާބުގައި ވާދަކުރި ކެނޑިޑޭޓަކު ޝަކުވާކުރި އެވެ.
އިލެކްޝަން ކޮމިޝަނުން ވަގުތީ ނަތީޖާ އިއުލާން ކުރުމުގެ ކުރިން އާންމުކޮށްފައިވާ ނަތީޖާތައް މި ވަނީ އޮޅުން ބޮޅުންވެފަ އެވެ. ގައުމީ ޓީވީ، ޕީއެސްއެމް އާއި އިދިކޮޅަށް ބުރަވާ، ރާއްޖެޓީވީ ނަތީޖާ ދެ ދިމާލަށްދާއިރު، އެތަނުން ރަނގަޅީ ކޮން ނަތީޖާއެއް ކަމެއް ގަބޫލުކުރަން ނޭނގޭ ވަރަށް މި ވަނީ ފަރަގު ބޮޑުވެފަ އެވެ. އެހެންކަމުން ސަރުކާރުންނާއި އިދިކޮޅު ފަރާތްތަކުން ވެސް އިންތިހާބު ކާމިޔާބުވިކަމަށް ބުނަނީ އެބަޔަކަށް ބުރަވާ ނަތީޖާއަށް ބިނާކޮށެވެ.
އިލެކްޝަން ކޮމިޝަންގެ މެންބަރު އަހުމަދު އަކްރަމް ވިދާޅުވީ، އެ ކޮމިޝަނުން ގަބޫލުކުރާ ގޮތުގައި މީޑިއާތަކުން ވެސް ނަތީޖާތައް ގެންނަމުން ދަނީ ވޯޓިން މަރުކަޒުތަކުގައި އިއުލާންކުރި ނަތީޖާ ޝީޓްތަކަށް ބަަލައިގެން ކަމަށެވެ. އެކި މީޑިއާތަކުން އިއުލާންކުރާ ވޯޓު ފޮށިތައް ތަފާތުވުމުން ނަތީޖާގައި ތަފާތުތައް އުޅެދާނެ ކަމަށް އޭނާ ވިދާޅުވި އެވެ. ނަމަވެސް މީޑިއާތަކުން އާންމުކުރާ ނަތީޖާތައް ކޮމިޝަނުން ތަފްސީލްކޮށް ބަލަމުން ނުދާ ކަމަށް އަކްރަމް ވިދާޅުވި އެވެ. އަކްރަމް ވިދާޅުވީ، އިލެކްޝަން ކޮމިޝަނުން މިއަދު ވަގުތީ ނަތީޖާތައް އާންމުކުރަން ފަށާނެ ކަމަށެވެ. ރަސްމީކޮށް ބުރަވާން ޖެހޭނީ އެ ނަތީޖާއަށެވެ.
ޓީވީތަކުގެ ނަތީޖާތަކަށް ބަލާއިރު ގިނަ އަދަދެއްގެ ވޯޓް ފޮށިތަކެއް ކޮންމެ ބަޔަކު ވެސް ވަނީ މިހާތަނަށް އައިއިރު އިއުލާންކޮށްފަ އެވެ. އެހެން ނަމަވެސް މުޅި ނަތީޖާގައި ރޭގަނޑާއި ދުވާލުހާ ބޮޑު ފަރަގެއް އަދިވެސް އެބަ އޮތެވެ. އެހެން ކަމުން ދިމާވެގެން އުޅެނީ ތަފާތު ވޯޓްފޮށިތަކެއް އިއުލާން ކުރުމުގެ މައްސަލަ ކަމަކަށް ނުބެލެވެ އެވެ. ޕީއެސްއެމްގެ އޮފިޝަލަކު ވިދާޅުވީ އެ ސްޓޭޝަނަކީ ގައުމީ ޓީވީއަށް ވުމުން ނަތީޖާތައް އާންމު ކުރަމުން އަންނަނީ ވަރަށް ބޮޑަށް ވެރިފައި ކޮށްފަ އެވެ. ރާއްޖެ ޓީވީ އިން ބުނެފައި ވަނީ އެ ފަރާތުން ނަތީޖާތައް އާންމު ކުރަނީ ފޮށިތައް ކައިރިއަށް އެ ޓީވީ އިން ހަމަޖެއްސި ވޮލަންޓިއަރުން މެދުވެރިކޮށް ކަމަށެވެ.
ޓީވީއެއްގައި މަސައްކަތް ކުރާ އިސް އޮފިޝަލަކު ވިދާޅުވި ގޮތުގައި ޓީވީތަކުން އިއުލާން ކުރާ ލޯކަލް ކައުންސިލް އިންތިހާބުގެ ނަތީޖާތަކުގައި ބޮޑެތި ފަރަގުތަކެއް ހުންނަނީ އިންތިހާބުގައި ބައިވެރިވާ ކެންޑިޑޭޓުންނާއި އެ މީހުން އިންހާބު ކުރާ ދާއިރާތައް ވެސް ގިނަވުމުގެ ސަބަބުން ތަފާސްހިސާބުތައް އެއްކުރުމަށް އެކަށީގެންވާ ވަރަށް ތައްޔާރުވެފައި ނެތުމެވެ. މީގެ ސަބަބުން ތަފާސްހިސާބުތައް ނުބައި ގޮތްގޮތަށް ޕްރެޒެންޓް ކުރެވި މަސްހުނިވެ ބޮޑެތި އޮޅުންތަކެއް އެރުމުގެ ފުރުސަތު އޮތް ކަމަށް އޭނާ އެއްބަސްވެ ވަޑައިގަންނަވަ އެވެ.
މިކަމަށް ހައްލަކީ ކޮބާ؟
މީޑިއާތަކުން ނަތީޖާތައް އިއުލާން ކުރުމުގައި ގޯހެއް ނެތް ނަމަވެސް އިއުލާން ކުރާ ނަތީޖާތަކަކީ އަމިއްލައަށް ގެނެސްދޭ ނަތީޖާތަކަކަށްވުމުގެ ބަދަލުގައި ރަސްމީ ސިފައެއްގައި އިއުލާން ކުރެވޭ ނަތީޖާތަކަށް ހެދޭނެ ކޮންމެވެސް ނިޒާމެއް ގާއިމުކުރުން މުހިންމެވެ. އެހެން ނޫންނަމަ ނަތީޖާއާ ދޭތެރޭ ބޮޑެތި ސުވާލުތަކެއް މިހާރު އުފެދިފައިމިވާ ގޮތަށް އުފެދޭނެ އެވެ.
އާންމު ރައްޔިތުން މިފަދަ ކަންކަމުގައި މީޑިއާތަކަށް ވަރަށް ބޮޑަށް ބަރޯސާވާއިރު މީޑިއާތަކުން ގެނެސްދޭ ނަތީޖާތަކުގައި ބޮޑު ތަފާތެއް ހުރުމަކީ އިންތިހާބުގެ ނަތީޖާ ރައްޔިތުން ގަބޫލުކުރުމުގައި ހުރަސް އެޅިދާނެ ސަބަބަކަށް ވެދާނެ އެވެ. ރައްޔިތުންގެ އިތުރުން ޕާޓީތަކުން އެކި ބަހަނާތައް ދައްކައި ނަތީޖާ ގަބޫލުނުކުރުމަކީ ވެފައި ހުރި ކަންކަމެވެ. މި އިންތިހާބުގައި ވެސް މިހާތަނަށް ނަތީޖާއާ މެދު ދެ ޕާޓީގެ ދެމެދުގައި އަންނަނީ ބަހުސްތައް ކުރެވެމުންނެވެ. ކޮންމެ ބަޔަކު ވެސް ބުނަނީ މޮޅުވީ އެ މީހުން ކަމަށެވެ.
ޕީޕީއެމްއިން ބުނެފައިވާ ގޮތުގައި ރައީސް އަބްދުﷲ ޔާމީން ވަނީ ގިނިކަންޏާ ނިކުމެވަޑައިގެން އިދިކޮޅު ހުރިހާ ލީޑަރުންނަށްވުރެ ގިނަ ވޯޓު ހޯދައްވަވާފަ އެވެ. އެގޮތަށް އެ ޕާޓީން ބުނެފައިވަނީ ޕީއެސްއެމްއިން އިއުލާން ކޮށްފައިވާ ނަތީޖާއަށް ބެލުމަށްފަހު އެވެ. އެމްޑީޕީއިން އަދި އިދިކޮޅު އެހެން ފަރާތްތަކުން ބުނެފައިވަނީ އެއީ ގޯސް ނަތީޖާއެއް ކަމަށެވެ. އެ ފަރާތްތަކުން ވާހަކަ ދައްކަނީ ރާއްޖެ ޓީވީން އާންމު ކޮށްފައިވާ މައުލޫމާތުތަކަށް ބެލުމަށްފަހު އެވެ.
އިލެކްޝަން ކޮމިޝަން އިއުލާން ކުރާ ވަގުތީ ނަތީޖާ އާއި މިހާރު މީޑިއާއިން އާންމުކޮށްފައިވާ ނަތީޖާތަކާ ތަފާތު ހުރުމަކީ އެކަށީގެންވާ ކަމެކެވެ. މިހާރު އޮތް ގޮތުން ކޮންމެ ވެސް އެއް ޓީވީ ސްޓޭޝަނުން ގެނެސްދީފައިވާ ނަތީޖާއާ ހަމަ ޔަގީނުން ވެސް އިލެކްޝަންސްގެ ނަތީޖާ ދިމައެއް ނުވާނެ އެވެ. ބޮޑެތި ފަރަގުތަކެއް ހުރުން ކައިރި އެވެ. އެހެންވެއްޖެ ކަމަށްވާނަމަ އިންތިހާބުގެ ނަތީޖާ އޮޅި، މައްސަލަތައް ފެންމަތިވުމުގެ ފުރުސަތު އޮތީ އެވެ. މިކަހަލަ ސިނާރިއޯއެއްގައި ދެން އޮހިގަންނާނީ ކޮންމެ ވެސް އެއްބަޔަކު ނަތީޖާ އޮޅުވާލިކަމުގެ ތުހުމަތުތަކެވެ.
ކުރިއަށް އޮތްތާ މިފަދަ ކަންކަން ދިމާ ނުވާނެ ގޮތަކަށް ކަންކަން އިންތިޒާމް ވެގެން ދިޔުމަކީ ވަރަށް މުހިންމު ކަމެކެވެ. އެކަމަށް މީޑިއާތަކާއި އިލެކްޝަން ކޮމިޝަން ގުޅިގެން މަސައްކަތް ކުރެވޭނެ ނިޒާމަކަށް ވިސްނާލަން ޖެހެ އެވެ.